കോട്ടയം: (KVARTHA) മെഡിക്കൽ കോളജ് ആശുപത്രിയിൽ ഒപി വിഭാഗത്തിന്റെ രണ്ടാം നിലയിൽ പ്രവർത്തിക്കുന്ന 18-ാം വാർഡായ ഇഎൻടി വിഭാഗത്തിൽ തറയിലെ ടൈലുകൾ പൊട്ടിത്തെറിച്ചു. ചൊവ്വാഴ്ച (23.12.2025) രാത്രി പത്തരയോടെ വലിയ ശബ്ദത്തോടെ ടൈലുകൾ പൊട്ടിത്തെറിച്ചത് രോഗികളിലും കൂട്ടിരിപ്പുകാരിലും വൻ പരിഭ്രാന്തി പരത്തി. സംഭവസമയത്ത് 20 രോഗികളും അവരുടെ കൂട്ടിരിപ്പുകാരും വാർഡിലുണ്ടായിരുന്നു.

ശബ്ദം കേട്ട് പരിഭ്രാന്തരായ രോഗികളും കൂട്ടിരിപ്പുകാരും ഉടൻ തന്നെ വാർഡിന് പുറത്തേക്ക് ഓടി രക്ഷപ്പെട്ടു. വിവരമറിഞ്ഞെത്തിയ സെക്യൂരിറ്റി ജീവനക്കാർ ഇവരെ ഒപി വിഭാഗത്തിലെ സുരക്ഷിതമായ ഇടങ്ങളിലേക്ക് മാറ്റി. കെട്ടിടത്തിന് തകരാറുകൾ ഇല്ലെന്നാണ് പ്രാഥമിക നിഗമനമെന്ന് പൊലീസ് അറിയിച്ചു. പൊലീസ് സ്ഥലത്തെത്തി സുരക്ഷ ശക്തമാക്കുകയും വിശദമായ പരിശോധനകൾ ആരംഭിക്കുകയും ചെയ്തിട്ടുണ്ട്.

18-ാം വാർഡിലെ രോഗികളെ പിന്നീട് പുതിയ കാഷ്വൽറ്റി കെട്ടിടത്തിന്റെ നാലാം നിലയിലെ വാർഡുകളിലേക്ക് മാറ്റിപ്പാർപ്പിച്ചു. വാർഡ് അറ്റകുറ്റപ്പണികൾക്കായി നേരത്തെ തന്നെ അടച്ചിടാൻ അധികൃതർ തീരുമാനിച്ചിരുന്നതാണ്. പുതിയ സർജിക്കൽ ബ്ലോക്കിലേക്ക് ഇവിടത്തെ രോഗികളെ ഉടൻ മാറ്റാനിരിക്കെയാണ് അപ്രതീക്ഷിതമായി ടൈലുകൾ പൊട്ടിത്തെറിച്ചത്. ഇതേത്തുടർന്ന് 18-ാം വാർഡ് ഇപ്പോൾ പൂർണമായും അടച്ചുപൂട്ടി.

മെഡിക്കൽ കോളജിൽ 1975 കാലഘട്ടത്തിൽ നിർമിച്ച മൂന്ന് കെട്ടിടങ്ങളിൽ ഒന്നാണ് ഈ ഒപി ബ്ലോക്ക്. ഇതിനൊപ്പം നിർമിച്ചിരുന്ന സർജിക്കൽ ബ്ലോക്കിലെ കെട്ടിടം കഴിഞ്ഞ ജൂലൈ മൂന്നിന് ഇടിഞ്ഞു വീണ് ഒരാൾ മരിച്ചിരുന്നു. ആ കെട്ടിടം നിലവിൽ പൊളിച്ചുനീക്കുന്നതിനായി അടച്ചിട്ടിരിക്കുകയാണ്. ആർഎംഒ ഡോ. സാം ക്രിസ്റ്റി മാമ്മൻ രാത്രി തന്നെ സ്ഥലത്തെത്തി രോഗികളെ മാറ്റുന്ന പ്രവർത്തനങ്ങൾക്ക് നേതൃത്വം നൽകി.

കോട്ടയത്തെ വാർത്ത ഇപ്പോൾ തന്നെ മറ്റുള്ളവരിലേക്ക് എത്തിക്കൂ.

Article Summary: Floor tiles exploded at Kottayam Medical College ward causing panic.

#Kottayam #MedicalCollege #KeralaNews #HospitalSafety #Emergency #KVARTHA