കോഴിക്കോട്: (KVARTHA) കടലോരത്തെ ഒരു തട്ടുകടയില്‍ നിന്ന് ഉപ്പിലിട്ട മാങ്ങ (Salted Mango) കഴിച്ച 9 വയസുകാരിക്ക് ദേഹാസ്വാസ്ഥ്യം അനുഭവപ്പെട്ട സംഭവത്തില്‍ നഗരസഭ ആരോഗ്യ വകുപ്പ് (Municipality Health Department) നടപടി സ്വീകരിച്ചു. കുട്ടിയുടെ പിതാവിന്റെ പരാതിയെ തുടര്‍ന്ന് തട്ടുകട (Vendor) താത്കാലികമായി അടച്ചു.

എളേറ്റില്‍ വട്ടോളി സ്വദേശിയായ മുഹമ്മദ് അഷ്റഫിന്റെ മകള്‍ ഫാത്തിമയാണ് ചൊവ്വാഴ്ച വൈകിട്ട് ബീച്ചരികിലെ തട്ടുകടയില്‍ നിന്ന് ഉപ്പിലിട്ട മാങ്ങ കഴിച്ചത്. വൈകാതെ ദേഹാസ്വാസ്ഥ്യം ഉണ്ടാവുകയും ചുണ്ടിന്റെ നിറം മാറുകയും ചെയ്തു. പിന്നീട് കുട്ടിക്ക് വയറുവേദനയും ഛര്‍ദ്ദിയും ഉണ്ടായതോടെ ഉടന്‍ തന്നെ ആശുപത്രിയില്‍ പ്രവേശിപ്പിക്കുകയായിരുന്നു.

കുട്ടിയുടെ പിതാവ് നല്‍കിയ പരാതിയുടെ അടിസ്ഥാനത്തില്‍ കോര്‍പ്പറേഷന്‍ ആരോഗ്യ വിഭാഗമാണ് സ്ഥലത്തെത്തി പരിശോധന നടത്തിയത്. തട്ടുകടയില്‍ നിന്നും ഭക്ഷണ സാമ്പിളുകള്‍ ശേഖരിച്ച് പരിശോധനയ്ക്ക് അയച്ചു. പരിശോധനാ ഫലം വരുന്നതുവരെ തട്ടുകട താത്കാലികമായി അടച്ചിടാന്‍ തീരുമാനിച്ചു.

ഉപ്പിലിട്ട മാങ്ങയ്ക്ക് ഉപയോഗിച്ച ലായനിയില്‍ അധിക ലവണാംശമോ മായം ചേര്‍ത്തതോ ആകാം കുട്ടിയുടെ ആരോഗ്യ പ്രശ്നത്തിന് കാരണമെന്നാണ് സംശയം. ഭക്ഷണ സാമ്പിളുകളുടെ പരിശോധനാ ഫലം വന്ന ശേഷം കൂടുതല്‍ നടപടികള്‍ സ്വീകരിക്കും. ലൈസന്‍സ് എടുത്ത ആളിന് പകരം ഇതര സംസ്ഥാന തൊഴിലാളികളാണ് തട്ടുകട നടത്തിയിരുന്നതെന്ന് കോര്‍പ്പറേഷന്‍ അന്വേഷണത്തില്‍ വ്യക്തമായിട്ടുണ്ട്. ഇത് നിയമവിരുദ്ധമായതിനാല്‍ തുടര്‍ നടപടി സ്വീകരിക്കുമെന്നും കോര്‍പ്പറേഷന്‍ അറിയിച്ചു. ലൈസന്‍സ് നിയമം ലംഘിച്ചതിന് തട്ടുകട ഉടമയ്ക്കെതിരെ നിയമ നടപടി സ്വീകരിക്കും.

#foodpoisoning #foodsafety #streetfood #health #Kozhikode #Kerala