കൊച്ചി: (KVARTHA) മുൻ മാനേജരെ മർദിച്ചെന്ന കേസിൽ ഗൂഢാലോചന ആരോപിച്ച് നടൻ ഉണ്ണി മുകുന്ദൻ സംസ്ഥാന പോലീസ് മേധാവിക്ക് പരാതി നൽകി. ഡിജിപിക്കും ക്രമസമാധാന ചുമതലയുള്ള എഡിജിപിക്കുമാണ് ഉണ്ണി മുകുന്ദൻ പരാതി നൽകിയിരിക്കുന്നത്. ഉണ്ണി മുകുന്ദന്റെ മുൻകൂർ ജാമ്യാപേക്ഷ എറണാകുളം ജില്ലാ കോടതി വരുന്ന ശനിയാഴ്ച പരിഗണിക്കാനിരിക്കെയാണ് ഈ നീക്കം.

വിപിൻ കുമാറിന്റെ പ്രതികരണം

അതേസമയം, നിയമ നടപടിയുമായി മുന്നോട്ട് പോകുമെന്ന് പരാതിക്കാരനായ മുൻ മാനേജർ വിപിൻ കുമാർ പ്രതികരിച്ചു. ഗൂഢാലോചന എന്ന ഉണ്ണി മുകുന്ദന്റെ വാദം അടിസ്ഥാനരഹിതമാണെന്നും ഉണ്ണി മുകുന്ദന്റെ ട്രാക്ക് റെക്കോർഡ് എല്ലാവർക്കും അറിയാമെന്നും വിപിൻ കുമാർ പറഞ്ഞു. തന്നെ കയ്യേറ്റം ചെയ്തതാണ് വിഷമിപ്പിച്ചതെന്നും നിലവിലെ പോലീസ് അന്വേഷണത്തിൽ തൃപ്തനാണെന്നും വിപിൻ കുമാർ കൂട്ടിച്ചേർത്തു.

ടൊവിനോ ചിത്രം 'നരിവേട്ട'യെ പ്രശംസിച്ച് പോസ്റ്റിട്ടതിൽ പ്രകോപിതനായാണ് ഉണ്ണി മുകുന്ദൻ തന്നെ മർദിച്ചതെന്നാണ് വിപിൻ കുമാറിന്റെ പരാതി. 'മാർകോ' എന്ന സിനിമയ്ക്ക് ശേഷം പുതിയ സിനിമകൾ ലഭിക്കാത്തതിന്റെ നിരാശ ഉണ്ണി മുകുന്ദൻ പലരോടും തീർക്കുകയാണെന്നും വിപിൻ ആരോപണം ഉന്നയിച്ചിരുന്നു. മർദിച്ചതിനും അസഭ്യം പറഞ്ഞതിനും ജാമ്യം ലഭിക്കാവുന്ന വകുപ്പുകളിലാണ് നിലവിൽ ഇൻഫോപാർക്ക് പോലീസ് ഉണ്ണി മുകുന്ദനെതിരെ കേസെടുത്തിരിക്കുന്നത്.

എന്നാൽ, കൂടുതൽ ഗുരുതര വകുപ്പുകൾ ചുമത്താനുള്ള സാധ്യത മുന്നിൽ കണ്ടാണ് നടൻ മുൻകൂർ ജാമ്യാപേക്ഷ നൽകിയത്. മർദിച്ചെന്ന് വിപിൻ പറയുന്നത് അടിസ്ഥാനരഹിതമാണെന്നും തനിക്കെതിരെ നടക്കുന്ന സംഘടിത ഗൂഢാലോചനയുടെ ഭാഗമാണ് ഇയാളുടെ പരാതിയെന്നും ഉണ്ണി മുകുന്ദൻ പ്രതികരിച്ചിരുന്നു. നടനെ നോട്ടീസ് അയച്ച് വിളിപ്പിക്കുന്നതിൽ പോലീസ് ഇതുവരെ തീരുമാനമെടുത്തിട്ടില്ല.

ഉണ്ണി മുകുന്ദനെതിരെയുള്ള ഈ ആരോപണങ്ങളെക്കുറിച്ച് നിങ്ങളുടെ അഭിപ്രായം എന്താണ്? വാർത്ത സുഹൃത്തുക്കളുമായി പങ്കുവെച്ച് കമ്മന്‍റ് രേഖപ്പെടുത്തൂ.

Article Summary: Unni Mukundan files DGP complaint alleging conspiracy in manager assault case.

#UnniMukundan #KeralaPolice #AssaultCase #ConspiracyTheory #Mollywood #LegalNews