കൊച്ചി: (KVARTHA) ഭൂട്ടാൻ പട്ടാളം ഉപേക്ഷിച്ച വാഹനങ്ങൾ ഇറക്കുമതി തീരുവ നൽകാതെ കടത്തിയെന്ന പരാതിയെ തുടർന്ന് സിനിമാ താരങ്ങളുടെ വീടുകളിൽ കസ്റ്റംസ് പരിശോധന. നടൻ പൃഥ്വിരാജ്, ദുൽഖർ സൽമാൻ, മമ്മൂട്ടി, അമിത് ചക്കാലയ്ക്കൽ എന്നിവരുടെ വീടുകളിലാണ് കസ്റ്റംസ് ഉദ്യോഗസ്ഥർ പരിശോധന നടത്തിയത്. ഹിമാചൽപ്രദേശിൽ രജിസ്റ്റർ ചെയ്ത് രാജ്യവ്യാപകമായി വിറ്റഴിച്ച വാഹനങ്ങളെക്കുറിച്ചുള്ള രഹസ്യാന്വേഷണ റിപ്പോർട്ടിന്റെ അടിസ്ഥാനത്തിലാണ് നടപടി.

'ഓപറേഷൻ നുംഖൂർ' എന്ന പേരിൽ രാജ്യവ്യാപകമായി നടക്കുന്ന പരിശോധനയുടെ ഭാഗമായാണ് താരങ്ങളുടെ വീടുകളിൽ കസ്റ്റംസ് എത്തിയത്. കൊച്ചി, തിരുവനന്തപുരം, തൃശ്ശൂർ, മലപ്പുറം, കോഴിക്കോട് ജില്ലകളിലായി 30 ഇടങ്ങളിലാണ് പരിശോധന പുരോഗമിക്കുന്നത്. വാഹനങ്ങൾ വാങ്ങിയതിന്റെ രേഖകളും കസ്റ്റംസ് ഉദ്യോഗസ്ഥർ പരിശോധിക്കുന്നുണ്ട്.

വിപുലമായ പരിശോധന

കൊച്ചിയിൽ മമ്മൂട്ടിയുടെ പനമ്പിള്ളി നഗറിലെ വീട്ടിലും ദുൽഖർ സൽമാന്റെ എളംകുളത്തെയും എളമക്കരയിലെയും വീടുകളിലാണ് കസ്റ്റംസ് പരിശോധന നടത്തിയത്. ഇതിൽ എളമക്കരയിലെ വീട്ടിലെ പരിശോധന അവസാനിച്ചതായിട്ടാണ് വിവരം. അമിത് ചക്കാലയ്ക്കലിന്റെ തൃശൂരിലെ വീട്ടിലും കോഴിക്കോട് റോഡ് വേയ്‌സ് കാർ ഷോറൂമിലും മുക്കത്തും കസ്റ്റംസ് പരിശോധന നടക്കുന്നുണ്ട്. അതേസമയം, പരിശോധനയ്ക്കായി എത്തിയപ്പോൾ മമ്മൂട്ടിയുടെ പനമ്പിള്ളി നഗറിലെ വീട് പൂട്ടിക്കിടക്കുകയായിരുന്നു. നിലവിൽ ഹോംസ്റ്റേയായി വാടകയ്ക്ക് നൽകിയിരിക്കുന്നതിനാൽ ഉദ്യോഗസ്ഥർക്ക് അകത്ത് കയറാൻ സാധിച്ചില്ല. പിന്നീട് തൊട്ടടുത്തുള്ള മമ്മൂട്ടിയുടെ വാഹന ഗാരേജിലെത്തി ഉദ്യോഗസ്ഥർ വാഹനങ്ങൾ പരിശോധിച്ചു.

ഭൂട്ടാനിൽ നിന്ന് പട്ടാളം ഉപേക്ഷിച്ച 150 ഓളം വാഹനങ്ങൾ നിയമവിരുദ്ധമായി ഇന്ത്യയിലേക്ക് കടത്തി എന്നാണ് റിപ്പോർട്ടുകൾ. കേരളത്തിൽ മാത്രം ഇത്തരത്തിലുള്ള 20-ൽ അധികം വാഹനങ്ങളുണ്ടെന്ന് അന്വേഷണ ഉദ്യോഗസ്ഥർക്ക് വിവരം ലഭിച്ചിട്ടുണ്ട്. ടൊയോട്ട ലാൻഡ് ക്രൂസർ, ലാൻഡ് റോവർ, ടാറ്റ എസ്‌യുവികൾ തുടങ്ങി വിവിധതരം വാഹനങ്ങളാണ് ഇത്തരത്തിൽ കടത്തിയത്.

വൻ തട്ടിപ്പ്

ഭൂട്ടാൻ മിലിറ്ററി ലേലത്തിൽ വെക്കുന്ന വാഹനങ്ങൾ കുറഞ്ഞ വിലയ്ക്ക് വാങ്ങി ഹിമാചൽപ്രദേശിലെ ഷിംല റൂറൽ (എച്ച്.പി 52) ആർടിഒയ്ക്ക് കീഴിൽ രജിസ്റ്റർ ചെയ്ത് നാലിരട്ടി വിലയ്ക്ക് വിറ്റഴിച്ചുവെന്നാണ് കണ്ടെത്തൽ. മൂന്ന് ലക്ഷത്തിനും അഞ്ച് ലക്ഷത്തിനും ഇന്ത്യയിലേക്ക് എത്തിച്ച വാഹനങ്ങൾ 35-45 ലക്ഷം രൂപയ്ക്ക് വരെ വിറ്റുവെന്ന് പരാതി ഉയർന്നിരുന്നു. ഒരു ലക്ഷം രൂപയ്ക്ക് വാങ്ങിയ ഒരു കാർ കേരളത്തിൽ 10 ലക്ഷം രൂപയ്ക്കാണ് വിറ്റഴിച്ചത്. ഇത്തരത്തിൽ വൻ ലാഭമാണ് ഓരോ വാഹന ഇടപാടിലും ഇടനിലക്കാർ ഉണ്ടാക്കിയത്. ഈ തട്ടിപ്പ് അറിഞ്ഞുകൊണ്ടാണോ താരങ്ങൾ ഉൾപ്പെടെയുള്ളവർ വാഹനങ്ങൾ വാങ്ങിയതെന്ന് കസ്റ്റംസ് പരിശോധിക്കും.

കോഴിക്കോട്, മലപ്പുറം ജില്ലകളിൽ നിന്നായി നിയമലംഘനം നടത്തിയ 11 വാഹനങ്ങൾ കസ്റ്റംസ് പിടിച്ചെടുത്തിട്ടുണ്ട്. ഭൂട്ടാൻ പട്ടാളം ഉപേക്ഷിച്ച കാറാണെന്ന് അറിയില്ലായിരുന്നുവെന്ന് കേരളത്തിൽ 25 ലക്ഷം രൂപയ്ക്ക് വാഹനം വാങ്ങിയ ഒരാൾ പ്രാഥമിക തെളിവെടുപ്പിൽ ഉദ്യോഗസ്ഥരോട് പറഞ്ഞതായി വിവരമുണ്ട്. സംസ്ഥാന മോട്ടോർവാഹന വകുപ്പും സംഭവത്തിൽ അന്വേഷണം ആരംഭിച്ചിട്ടുണ്ട്. Disclaimer: ഈ വാർത്ത ഔദ്യോഗിക വൃത്തങ്ങളിൽ നിന്നും ലഭിച്ച വിവരങ്ങളെ അടിസ്ഥാനമാക്കിയുള്ളതാണ്.

ഈ സംഭവത്തെക്കുറിച്ച് നിങ്ങളുടെ അഭിപ്രായം എന്താണ്? അഭിപ്രായം പങ്കുവെക്കൂ.

Article Summary: Customs raid actors' homes over illegal Bhutanese car smuggling.

#Bhutan #CustomsRaid #KeralaNews #CarSmuggling #CelebrityNews #IllegalImport