മണിപ്പാലില്‍ കൂട്ടമാനഭംഗത്തിനിരയായത് തിരുവനന്തപുരത്തെ വിദ്യാര്‍ത്ഥിനി; 4 പേര്‍ പിടിയില്‍

മണിപ്പാല്‍: മണിപ്പാലില്‍ കൂട്ടമാനഭംഗത്തിനിരയായത് തിരുവനന്തപുരം സ്വദേശിനിയാണെന്ന് റിപോര്‍ട്ട്. എന്നാല്‍ പെണ്‍കുട്ടിയെ കുറിച്ചുള്ള കൂടുതല്‍ വിവരങ്ങള്‍ പോലീസ് പുറത്തുവിട്ടിട്ടില്ല. കൂട്ടമാനഭംഗവുമായി ബന്ധപ്പെട്ട് നാല് പേരെ പിടിയിലായി. എന്നാല്‍ ഇക്കാര്യം പോലീസ് ഔദ്യോഗികമായി സ്ഥിരീകരിച്ചിട്ടില്ല.

വ്യാഴാഴ്ച രാത്രി 11.30 മണിയോടെ സര്‍വകലാശാലയിലെ ലൈബ്രറിയില്‍ നിന്നും താമസ സ്ഥലത്തേക്ക് പോകാനായി പുറത്തിറങ്ങിയ പെണ്‍കുട്ടി റോഡില്‍ ഓട്ടോ കാത്ത് നില്‍ക്കുമ്പോഴാണ് ഒരു ഓട്ടോയില്‍ വന്ന നാലംഗ സംഘം വിദ്യാര്‍ത്ഥിനിയെ ബലംപ്രയോഗിച്ച് ഓട്ടോയില്‍ കയറ്റികൊണ്ടുപോയത്. വിദ്യാര്‍ത്ഥിനിയുടെ നിലവിളി പുറത്ത് കേള്‍ക്കാതിരിക്കാന്‍ സംഘം വായപൊത്തിപ്പിടിച്ചിരുന്നു. ഓട്ടോയുടെ ഷട്ടറും താഴ്ത്തി.

പിന്നീട് അഞ്ജാത കേന്ദ്രത്തിലെത്തിച്ച സംഘം വിദ്യാര്‍ത്ഥിനിയെ കൂട്ടമാനഭംഗത്തിനിരയാക്കുകയും പുലര്‍ച്ചെയോടെ താമസ സ്ഥലത്തിന് സമീപം ഉപേക്ഷിക്കുകയുമായിരുന്നു. സഹപാഠിയായ വിദ്യാര്‍ത്ഥിനി വിവരം മെഡിക്കല്‍ കോളജ് അധികൃതരെ അറിയിക്കുകയും അധികൃതരെത്തി ദേഹമാസകലം പരിക്കേറ്റ വിദ്യാര്‍ത്ഥിനിയെ കസ്തൂര്‍ബ മെഡിക്കല്‍ കോളജ് ആശുപത്രിയില്‍ തീവ്രപരിചരണ വിഭാഗത്തില്‍ എത്തിക്കുകയുമായിരുന്നു. പെണ്‍കുട്ടിയുടെ കൈക്കും, കാലിനും കഴുത്തിനുമാണ് ഗുരുതരമായ പരിക്കുള്ളത്.

പെണ്‍കുട്ടിയുടെ നില അതീവ ഗുരുതരമാണ്. അതുകൊണ്ട്തന്നെ പെണ്‍കുട്ടിയില്‍ നിന്നും വിശദമായ മൊഴി ശേഖരിക്കാന്‍ പോലീസിന് കഴിഞ്ഞിട്ടില്ല. നാലുപേരാണ് സംഘത്തിലുണ്ടായിരുന്നതെന്ന് വിദ്യാര്‍ത്ഥിനി അറിയിച്ചിരുന്നു. ഇതിന്റെ അടിസ്ഥാനത്തില്‍ മൂന്ന് പേരെ രാവിലെയും ഒരാളെ ഉച്ചയോടെയും പിടികൂടുകയായിരുന്നു.

File Photo

കുന്താപുരം ഡി.വൈ.എസ്.പി യശോദയാണ് പെണ്‍കുട്ടിയില്‍ നിന്നും മൊഴിയെടുത്തത്. മലയാളി വിദ്യാര്‍ത്ഥിനി കൂട്ടമാനഭംഗത്തിനിരയായ വിവരമറിഞ്ഞ് കേരള സര്‍ക്കാര്‍ കര്‍ണാടക സര്‍ക്കാരുമായി ബന്ധപ്പെടുകയും സംഭവത്തിന്റെ വിശദാംശം ആരായുകയും ചെയ്തിട്ടുണ്ട്. പെണ്‍കുട്ടിക്ക് എല്ലാവിധ വൈദ്യസഹായവും നല്‍കുമെന്ന് കര്‍ണാടക സര്‍ക്കാരും അറിയിച്ചിട്ടുണ്ടെന്നാണ് വിവരം. സംഭവത്തെകുറിച്ച് വിശദമായ അന്വേഷണം നടത്തണമെന്നും കേരള സര്‍ക്കാര്‍ ആവശ്യപ്പെട്ടിട്ടുണ്ട്.

Related News: 

മണിപ്പാലില്‍ മലയാളി എം.ബി.ബി.എസ് വിദ്യാര്‍ത്ഥിനി കൂട്ടമാനഭംഗത്തിനിരയായി

മലയാളി എം.ബി.ബി.എസ്. വിദ്യാര്‍ത്ഥിനി കൂട്ടമാനഭംഗത്തിനിരയായതില്‍ സഹപാഠിക്കും പങ്ക് ?