ഒട്ടാവ: (KVARTHA) ന്യൂഫൗണ്ട്‌ലാൻഡിൽ നിന്ന് ഹാലിഫാക്സ് സ്റ്റാൻഫീൽഡ് അന്താരാഷ്ട്ര വിമാനത്താവളത്തിലേക്ക് വന്ന എയർ കാനഡ എക്സ്പ്രസ് വിമാനം ലാൻഡിംഗിനിടെ അപകടത്തിൽപ്പെട്ടു. ലാൻഡിംഗ് ഗിയറിനുണ്ടായ തകരാറാണ് അപകടകാരണം. വിമാനത്തിന് ഭാഗികമായി തീപിടിക്കുകയും ചെയ്തു. ഉടൻ തന്നെ യാത്രക്കാരെയും ജീവനക്കാരെയും ഒഴിപ്പിച്ചു. സംഭവത്തിൽ ആളപായമൊന്നും റിപ്പോർട്ട് ചെയ്തിട്ടില്ല.

ബാങ്കോക്കിൽ നിന്ന് മുവാനിലേക്ക് പോവുകയായിരുന്ന ജെജു എയർ വിമാനം ലാൻഡിംഗിനിടെ തകർന്ന് 181 പേരിൽ 179 പേർ മരിച്ച ദക്ഷിണ കൊറിയയിലെ വലിയ വിമാന ദുരന്തത്തിന് മണിക്കൂറുകൾക്ക് ശേഷമാണ് ഈ സംഭവം. കാനഡയിൽ വിമാനം 20 ഡിഗ്രിയിൽ ചരിഞ്ഞ് റൺവേയിൽ തെന്നി നീങ്ങിയതായി ദൃക്‌സാക്ഷികൾ പറയുന്നു. പാരാമെഡിക്കുകൾ ഉൾപ്പെടെയുള്ള അടിയന്തര സേവന വിഭാഗങ്ങൾ ഉടൻ തന്നെ സ്ഥലത്തെത്തി രക്ഷാപ്രവർത്തനം നടത്തി. 

എല്ലാ യാത്രക്കാരെയും ജീവനക്കാരെയും സുരക്ഷിതമായി വിമാനത്തിൽ നിന്ന് മാറ്റുകയും വൈദ്യ സഹായം നൽകുകയും ചെയ്തതായി വിമാനത്താവള വക്താവ് സ്ഥിരീകരിച്ചു. സാധാരണയായി 80 ഓളം യാത്രക്കാരെ ഉൾക്കൊള്ളുന്ന വിമാനത്തിൽ അപകടം സംഭവിക്കുമ്പോൾ നിറയെ ആളുകളുണ്ടായിരുന്നു. കൃത്യമായ കണക്കുകൾ ഇതുവരെ ലഭ്യമല്ല. ലാൻഡിംഗ് ഗിയർ തകരാറിൻ്റെ കാരണം കണ്ടെത്താൻ അധികൃതർ അന്വേഷണം ആരംഭിച്ചിട്ടുണ്ട്.

#AirCanada #plane crash #aviation #safety #Canada #Halifax #accident