ഇടുക്കി: (KVARTHA) മൂന്നാറിന് സമീപമുള്ള ആനച്ചാലിലെ സ്കൈ ഡൈനിങ്ങിൽ (ആകാശത്ത് ഇരുന്ന് ഭക്ഷണം കഴിക്കുന്ന സൗകര്യം) വിനോദസഞ്ചാരികൾ കുടുങ്ങി. ക്രെയിനിൻ്റെ സാങ്കേതിക തകരാർ ആണ് സംഭവത്തിന് കാരണം എന്ന് അധികൃതർ പറയുന്നു. ഒന്നര മണിക്കൂറിലേറെയായി വിനോദ സഞ്ചാരികളും ജീവനക്കാരും 120 അടി ഉയരത്തിൽ കുടുങ്ങിക്കിടക്കുകയാണ്. ഇവരെ താഴെ ഇറക്കാനുള്ള നടപടികൾ തുടങ്ങി.

കുടുങ്ങിയവരുടെ എണ്ണത്തിൽ ആശയക്കുഴപ്പം

ആകാശത്തിരുന്ന് ഭക്ഷണം കഴിക്കുന്നതിനായി അഡ്വൈഞ്ചർ ടൂറിസത്തിൻ്റെ ഭാഗമായി അടുത്തിടെ തുടങ്ങിയതാണ് ഈ പദ്ധതി. സഞ്ചാരികളും ജീവനക്കാരുമുൾപ്പെടെ അഞ്ച് പേരാണ് സ്കൈ ഡൈനിങ്ങിലുള്ളതെന്നാണ് ഔദ്യോഗിക വിശദീകരണം. ഇതിൽ കണ്ണൂരിൽ നിന്നുള്ള ഭാര്യ, ഭർത്താവ്, രണ്ട് കുട്ടികൾ എന്നിവരടങ്ങുന്ന നാലംഗ കുടുംബവും സ്കൈ ഡൈനിങ്ങിലെ ഒരു ജീവനക്കാരനും ഉൾപ്പെടുന്നു. അതേസമയം, സഞ്ചാരികളും ജീവനക്കാരുമുൾപ്പെടെ എട്ട് പേരാണ് സ്കൈ ഡൈനിങ്ങിലുള്ളതെന്നാണ് മറ്റൊരു അനൗദ്യോഗിക വിശദീകരണം. എന്നാൽ അതിലും കൂടുതൽ പേരുണ്ടെന്ന് പ്രദേശത്തുള്ളവർ പറയുന്നുണ്ട്. ഒരേസമയം 15 പേർക്ക് ഇരിക്കാനുള്ള സൗകര്യമാണ് ഈ പ്ലാറ്റ് ഫോമിലുള്ളത്.

രക്ഷാദൗത്യം തുടങ്ങി

ക്രെയിൻ ഉപയോഗിച്ച് ഉയർത്തുന്ന രീതിയാണ് സ്കൈ ഡൈനിങ്ങിനുള്ളത്. എന്നാൽ ക്രെയിനിൻ്റെ സാങ്കേതിക തകരാർ മൂലം ക്രെയിൻ താഴ്ത്താൻ പറ്റാത്തതാണ് നിലവിലെ പ്രശ്നം. കുടുങ്ങിയവരെ വടം ഉപയോഗിച്ച് പുറത്തെത്തിക്കാനുള്ള നീക്കമാണ് ഇപ്പോൾ നടക്കുന്നത്.

അതിനിടെ, അടിമാലിയിൽ നിന്നും മൂന്നാറിൽ നിന്നും ഫയർഫോഴ്സ് സംഘം രക്ഷാദൗത്യത്തിനായി പുറപ്പെട്ടിട്ടുണ്ട്. റോപ്പും സീറ്റ് ബെൽറ്റും ഉൾപ്പെടെയുള്ള സുരക്ഷാ സൗകര്യങ്ങൾ ഉള്ളതിനാൽ അപകടത്തിനുള്ള സാധ്യതയില്ലെന്നാണ് അധികൃതർ പറയുന്നത്. എങ്കിലും കഴിഞ്ഞ ഒന്നര മണിക്കൂറിലേറെയായി ആകാശക്കാഴ്ച്ച ആസ്വദിക്കാൻ പോയവർ ഭയന്ന് കുടുങ്ങിക്കിടക്കുകയാണ്.

ഇത്തരം സാഹസിക ടൂറിസം പദ്ധതികൾക്ക് ലൈസൻസുകൾ നൽകുന്നതിന് മുമ്പ് കൂടുതൽ കർശനമായ സുരക്ഷാ മാനദണ്ഡങ്ങൾ ആവശ്യമാണോ? നിങ്ങളുടെ അഭിപ്രായം അറിയിക്കുക.

Article Summary: Tourists are stranded for over 90 minutes in Munnar Sky Dining at 120 feet.

#Munnar #SkyDining #AdventureTourism #TechnicalGlitch #IdukkiNews #FireForce