തിരുവനന്തപുരം: (KVARTHA) സംസ്ഥാന സർക്കാരിന്റെ നിയന്ത്രണത്തിലുള്ള ഓൺലൈൻ ടാക്‌സി പ്ലാറ്റ്‌ഫോമായ ‘കേരള സവാരി’ ഡ്രൈവർമാർക്കും യാത്രക്കാർക്കും ഒരുപോലെ ആശ്വാസമാകുന്നു. പദ്ധതി വഴി ഡ്രൈവർമാർ സവാരി ഓടി ഇതുവരെ നേടിയത് 27.58 കോടി രൂപയുടെ വരുമാനമാണ്. 11,36,000 യാത്രകൾ വിജയകരമായി പൂർത്തിയാക്കാനും കേരള സവാരിക്ക് സാധിച്ചു.

കമ്മീഷനില്ല, സർജ് പ്രൈസിംഗില്ല

മറ്റ് ഓൺലൈൻ ടാക്സി പ്ലാറ്റ്‌ഫോമുകളിൽ നിന്ന് വ്യത്യസ്തമായി സർക്കാർ അംഗീകൃത ഓട്ടോ, ടാക്‌സി നിരക്കുകളിൽ മാത്രമാണ് കേരള സവാരി പ്രവർത്തിക്കുന്നത്. തിരക്കുള്ള സമയങ്ങളിൽ അധിക നിരക്ക് ഈടാക്കുന്ന 'സർജ് പ്രൈസിംഗ്' (Surge Pricing) രീതി ഇതിലില്ല. കൂടാതെ, യാതൊരുവിധ കമ്മീഷനും ഈടാക്കാത്തതിനാൽ സവാരിയിൽ നിന്നും ലഭിക്കുന്ന വരുമാനം പൂർണ്ണമായും ഡ്രൈവർമാർക്ക് തന്നെ ലഭിക്കുന്നുവെന്നതാണ് ഇതിന്റെ പ്രധാന ആകർഷണം. സുതാര്യവും ന്യായവുമായ നിരക്കുകൾ ഉറപ്പാക്കുന്നതിലൂടെ പദ്ധതി അതിവേഗം ജനപ്രിയമായി മാറുകയാണ്.

അഞ്ച് ലക്ഷത്തോളം ഉപയോക്താക്കൾ

2025 നവംബറിൽ തൊഴിൽ വകുപ്പിന് കീഴിൽ ആരംഭിച്ച പദ്ധതിയിൽ ഇതിനോടകം 25,000-ത്തിലധികം ഡ്രൈവർമാർ ഓൺബോർഡ് ചെയ്തിട്ടുണ്ട്. നിലവിൽ തിരുവനന്തപുരം, എറണാകുളം, തൃശൂർ ജില്ലകളിലായി 5000-ത്തിലധികം സജീവ ടാക്‌സി ഡ്രൈവർമാരുണ്ട്. ഇതിൽ പത്തിലധികം ഡ്രൈവർമാർ വനിതകളാണെന്നതും ശ്രദ്ധേയമാണ്. കേരള സവാരി വെബ്‌പോർട്ടലിലും മൊബൈൽ ആപ്പിലുമായി 4.29 ലക്ഷം ഉപയോക്താക്കൾ രജിസ്റ്റർ ചെയ്തിട്ടുണ്ട്.

സുരക്ഷയ്ക്ക് മുൻഗണന; പോലീസുമായി കൈകോർക്കുന്നു

യാത്രക്കാർക്ക് സുരക്ഷിതമായ സേവനം ഉറപ്പുവരുത്തുന്നതിന്റെ ഭാഗമായി അടുത്തഘട്ട നടപടികളിലേക്ക് കടക്കുകയാണ് കേരള സവാരി. ഇതിനായി പോലീസുമായി സഹകരിച്ച് ഡ്രൈവർമാർക്ക് വിശദമായ പരിശീലനം നൽകും. കൂടാതെ, കേരളാ പോലീസിന്റെ 'പോൽ ആപ്പുമായി' (Pol App) കേരള സവാരി ആപ്പ് ബന്ധിപ്പിക്കാനും പദ്ധതിയുണ്ട്. ഇത് പദ്ധതിയുടെ പ്രവർത്തനം കൂടുതൽ സുരക്ഷിതമാക്കുമെന്നാണ് വിലയിരുത്തൽ.

തുടർന്ന് സംസ്ഥാനത്തുടനീളം കേരള സവാരി പദ്ധതി വ്യാപിപ്പിക്കാനും അതുവഴി കൂടുതൽ തൊഴിലവസരങ്ങൾ സൃഷ്ടിക്കാനും സർക്കാർ ലക്ഷ്യമിടുന്നു.

തൊഴിൽ മേഖലയിൽ വിപ്ലവമാകുന്ന ഈ സർക്കാർ മാതൃക മറ്റ് മേഖലകളിലേക്കും വ്യാപിപ്പിക്കേണ്ടതുണ്ടോ? അഭിപ്രായം കമന്‍റ് ചെയ്യൂ.

Article Summary: Kerala Savari online taxi platform records 27.58 Crore revenue for drivers.

#KeralaSavari #KeralaGovernment #OnlineTaxi #NoCommission #SafeTravel #KeralaPolice