ശ്രീഹരിക്കോട്ട: (KVARTHA) ഇന്ത്യൻ ബഹിരാകാശ ഗവേഷണ സംഘടനയുടെ ഏറ്റവും വിശ്വസ്‌ത വിക്ഷേപണ വാഹനം എന്നറിയപ്പെടുന്ന പിഎസ്എൽവിയുടെ ചരിത്രത്തില്‍ ഇതാദ്യമായി തുടര്‍ച്ചയായ തിരിച്ചടി. ശ്രീഹരിക്കോട്ടയിലെ സതീഷ് ധവാന്‍ സ്പേസ് സെന്‍ററിലെ ഒന്നാം നമ്പര്‍ ലോഞ്ച് പാഡിൽ നിന്ന് തിങ്കളാഴ്ച (12.01.2026) രാവിലെ 10.17-ന് ബഹിരാകാശത്തേക്ക് കുതിച്ച പിഎസ്എല്‍വി-സി62 (PSLV-C62) റോക്കറ്റ് വിക്ഷേപണം മൂന്നാംഘട്ടത്തില്‍ അനിശ്ചിതത്വത്തിലായി.

തുടര്‍ച്ചയായ രണ്ടാം വിക്ഷേപണത്തിലാണ് ഐഎസ്ആര്‍ഒയുടെ അഭിമാനമായ പിഎസ്എൽവി റോക്കറ്റ് തിരിച്ചടി നേരിടുന്നത് എന്നത് ബഹിരാകാശ ലോകത്തെ ഞെട്ടിച്ചിരിക്കുകയാണ്. ഇന്നത്തെ ദൗത്യത്തില്‍ 'അന്വേഷ' (Anvesha) ഉപഗ്രഹം അടക്കമുള്ള 16 പേലോഡുകൾ നിശ്ചിത ഭ്രമണപഥത്തിൽ വിജയകരമായി വിന്യസിക്കാന്‍ കഴിഞ്ഞോ എന്ന കാര്യത്തിൽ ഇസ്രോ ഇതുവരെ ഔദ്യോഗിക സ്ഥിരീകരണം നൽകിയിട്ടില്ല.

സാങ്കേതിക തകരാർ ഇങ്ങനെ

ശ്രീഹരിക്കോട്ടയില്‍ നിന്ന് കൃത്യസമയത്ത് കുതിച്ചുയര്‍ന്നതിന് പിന്നാലെ റോക്കറ്റിന്‍റെ മൂന്നാം ഭാഗം വേര്‍പ്പെട്ട ശേഷമായിരുന്നു അപ്രതീക്ഷിതമായി സാങ്കേതിക പ്രശ്‌നം ഉടലെടുത്തത്. ഇതോടെ റോക്കറ്റിന്‍റെ സഞ്ചാരപാത മാറിയെന്നും ഉദ്ദേശിച്ച ലക്ഷ്യത്തിൽ എത്താൻ തടസ്സം നേരിട്ടെന്നും ഇസ്രോ ചെയര്‍മാന്‍ ഡോ. വി നാരായണന്‍ അറിയിച്ചു. റോക്കറ്റില്‍ നിന്നുള്ള ഡാറ്റ ശാസ്ത്രജ്ഞർ വിശദമായി വിശകലനം ചെയ്തുവരികയാണെന്നും കൂടുതല്‍ വിവരങ്ങള്‍ പഠിച്ച ശേഷം പുറത്തുവിടുമെന്നും ഐഎസ്ആര്‍ഒ ചെയര്‍മാന്‍ വ്യക്തമാക്കി.

തുടർ പരാജയങ്ങൾ

2025 മേയ് മാസം നടന്ന പിഎസ്എല്‍വിയുടെ കഴിഞ്ഞ വിക്ഷേപണവും (പിഎസ്എല്‍വി-സി61) പരാജയമായിരുന്നു. പിഎസ്എല്‍വിയുടെ ചരിത്രത്തിൽ തന്നെ തുടർച്ചയായ രണ്ട് പരാജയങ്ങൾ സംഭവിക്കുന്നത് ഇതാദ്യമാണ്. കഴിഞ്ഞ വിക്ഷേപണത്തിൽ ഉപഗ്രഹം നഷ്‌ടമായിരുന്നെങ്കിലും, അന്ന് പിഎസ്എല്‍വി റോക്കറ്റിന് സംഭവിച്ച സാങ്കേതിക പ്രശ്‌നം എന്താണെന്നുള്ള കൃത്യമായ വിവരങ്ങള്‍ ഐഎസ്ആര്‍ഒ പുറത്തുവിട്ടിരുന്നില്ല. ഇതിനു പിന്നാലെയാണ് വീണ്ടും സമാനമായ രീതിയിൽ ദൗത്യം പ്രതിസന്ധിയിലായിരിക്കുന്നത്. വിശ്വസ്ത വിക്ഷേപണ വാഹനം എന്ന ഖ്യാതിയുള്ള പിഎസ്എല്‍വിയുടെ തുടര്‍ച്ചയായ പരാജയം വരും ദിവസങ്ങളിൽ വലിയ ചർച്ചകൾക്കും ചോദ്യങ്ങൾക്കും വഴിവെച്ചേക്കും.

എവിടെയാണ് പിഴയ്ക്കുന്നത്? ഇസ്രോയുടെ വിശ്വാസ്യതയെ ഇത് ബാധിക്കുമെന്ന് കരുതുന്നുണ്ടോ? നിങ്ങളുടെ അഭിപ്രായം പറയൂ.

Article Summary: ISRO faces a historic setback as the PSLV-C62 launch encounters technical issues, marking the second consecutive failure for the vehicle.

#ISRO #PSLVC62 #SpaceMission #Sriharikota #AnveshaSatellite #RocketLaunch #ScienceNews