ന്യൂഡല്‍ഹി: (KVARTHA) ഭിന്നശേഷിക്കാരായ യാത്രക്കാരുടെ സഞ്ചാരം കൂടുതല്‍ എളുപ്പമാക്കുന്നതിന് നടപടിയുമായി ഇന്ത്യന്‍ റെയില്‍വേ. ഭിന്നശേഷിക്കാരായ യാത്രക്കാരുടെ സൗകര്യാര്‍ത്ഥം കണ്‍സഷന്‍ ഐഡന്റിറ്റി കാര്‍ഡുകളുടെ ഡിജിറ്റല്‍ രൂപമാണ് അവതരിപ്പിച്ചത്. ഇനിമുതല്‍ ഭിന്നശേഷിക്കാര്‍ക്ക് റെയില്‍ യാത്രയ്ക്കുള്ള കണ്‍സഷന്‍ കാര്‍ഡ് ഓണ്‍ലൈനായി തന്നെ അപേക്ഷിക്കുകയും ലഭിക്കുകയും ചെയ്യാം. റെയില്‍വേ ഓഫീസുകളിലേക്ക് നേരിട്ട് പോകേണ്ട ആവശ്യം ഇല്ലാത്തതിനാല്‍, ഈ നടപടി ഭിന്നശേഷിക്കാര്‍ക്ക് വലിയൊരു ആശ്വാസമായിരിക്കും.

പുതിയ സംവിധാനത്തിന്റെ പ്രത്യേകതകള്‍

* എളുപ്പത്തിലുള്ള ലഭ്യത: ഇനിമുതല്‍ ഭിന്നശേഷിക്കാര്‍ക്ക് വീട്ടിലിരുന്ന് കൊണ്ട് തന്നെ കണ്‍സഷന്‍ കാര്‍ഡിനായി അപേക്ഷിക്കാനും പുതുക്കാനും സാധിക്കും.

* സമഗ്രമായ കവറേജ്: ഇന്ത്യയിലെ എല്ലാ റെയില്‍വേ ഡിവിഷനുകളിലും ഈ സംവിധാനം നടപ്പിലാക്കിയതിനാല്‍, ഇനി ഏത് റെയില്‍വേ സ്റ്റേഷനില്‍ നിന്നും യാത്ര ചെയ്യുമ്പോഴും ഈ സൗകര്യം ലഭ്യമാകും.

* ലളിതമായ അപേക്ഷാ പ്രക്രിയ: ആവശ്യമായ രേഖകള്‍ ഓണ്‍ലൈനായി അപ്ലോഡ് ചെയ്താല്‍ മതി. അംഗീകാരം ലഭിച്ചുകഴിഞ്ഞാല്‍, ഡിജിറ്റല്‍ കണ്‍സഷന്‍ കാര്‍ഡ് നിങ്ങളുടെ മൊബൈലില്‍ ലഭിക്കും.

* മെച്ചപ്പെട്ട ടിക്കറ്റ് ബുക്കിംഗ് സൗകര്യം: റിസര്‍വേഷനുള്ള ടിക്കറ്റുകള്‍ ഓണ്‍ലൈനായോ ടിക്കറ്റ് കൗണ്ടറിലൂടെയോ ബുക്ക് ചെയ്യാം. റിസര്‍വേഷന്‍ ഇല്ലാത്ത ടിക്കറ്റുകള്‍ ടിക്കറ്റ് കൗണ്ടറിലോ മൊബൈല്‍ ആപ്പിലൂടെയോ എടുക്കാം.

ആര്‍ക്കൊക്കെയാണ് ഈ സൗകര്യം ലഭ്യമാകുക?

പൂര്‍ണമായും കാഴ്ച വൈകല്യമുള്ളവര്‍
സഹായി ആവശ്യമായ മാനസിക വെല്ലുവിളി നേരിടുന്നവര്‍
പൂര്‍ണമായി കേള്‍വി, സംസാര വൈകല്യമുള്ളവര്‍
സഹായി ആവശ്യമായ അസ്ഥിരോഗ വൈകല്യമുള്ളവര്‍

എങ്ങനെയാണ് അപേക്ഷിക്കേണ്ടത്?

* https://divyangjanid(dot)indianrail(dot)gov(dot)in എന്ന വെബ്‌സൈറ്റ് സന്ദര്‍ശിക്കുക.
* ഒരു പുതിയ ഉപയോക്താവായി രജിസ്റ്റര്‍ ചെയ്യുക (ആദ്യമായി അപേക്ഷിക്കുകയാണെങ്കില്‍).
* കണ്‍സഷന്‍ സര്‍ട്ടിഫിക്കറ്റ് നല്‍കുന്ന ആശുപത്രി നിലനില്‍ക്കുന്ന സംസ്ഥാനവും അടുത്തുള്ള റെയില്‍വേ സ്റ്റേഷനും അടക്കമുള്ള വിശദാംശങ്ങള്‍ കൃത്യമായി സമര്‍പ്പിക്കുന്നുവെന്ന് ഉറപ്പാക്കുക.
* ഭിന്നശേഷി സര്‍ട്ടിഫിക്കറ്റ്, കണ്‍സഷന്‍ സര്‍ട്ടിഫിക്കറ്റ്, ജനനത്തീയതി തെളിയിക്കുന്ന രേഖ, ഫോട്ടോ ഐഡി, മേല്‍വിലാസം തെളിയിക്കുന്ന രേഖ എന്നിവ ഉള്‍പ്പെടെ ആവശ്യമായ എല്ലാ രേഖകളും അപ്ലോഡ് ചെയ്യുക.
* അപേക്ഷ ഓണ്‍ലൈനായി സമര്‍പ്പിക്കുക.

ആവശ്യമായ രേഖകള്‍:

ഗവണ്‍മെന്റ് അംഗീകൃത ആശുപത്രി നല്‍കുന്ന ഭിന്നശേഷി, കണ്‍സഷന്‍ സര്‍ട്ടിഫിക്കറ്റുകള്‍, പാസ്പോര്‍ട്ട് സൈസ് ഫോട്ടോ, തിരിച്ചറിയല്‍ രേഖ, മേല്‍വിലാസം തെളിയിക്കുന്ന രേഖ (ആധാര്‍, പാസ്പോര്‍ട്ട്, പാന്‍ കാര്‍ഡ്, വോട്ടര്‍ ഐഡി അല്ലെങ്കില്‍ സമാനമായത്) എന്നിവയാണ് അപേക്ഷ സമര്‍പ്പിക്കാന്‍ ആവശ്യമായ രേഖകള്‍. പ്രശ്നങ്ങളോ ചോദ്യങ്ങളോ ഉണ്ടെങ്കില്‍, ഉപയോക്താക്കള്‍ക്ക് https://pgportal(dot)gov(dot)in വഴിയോ പ്രൊഫൈലിലെ ഫീഡ്ബാക്ക് സംവിധാനം വഴിയോ പരാതികള്‍ സമര്‍പ്പിക്കാം.

#IndianRailways, #disability, #accessibility, #onlineservices, #concessioncard, #travel