ദുബൈ: (KVARTHA) യാത്രകള്‍ കൂടുതല്‍ എളുപ്പമാക്കാന്‍ ദുബൈ ടാക്‌സി കമ്പനിയും യൂറോപ്യന്‍ രാജ്യമായ എസ്റ്റോണിയയില്‍ നിന്നുള്ള ഇ-ഹെയിലിംഗ് കമ്പനിയായ ബോള്‍ട്ടും ചേര്‍ന്ന് ദുബൈയില്‍ ബോള്‍ട്ട് സര്‍വീസ് ആരംഭിച്ചു. ഇതോടെ യുഎഇയിലെ ജനങ്ങള്‍ക്ക് ഇനി ബോള്‍ട്ട് ആപ്പ് ഉപയോഗിച്ച് ടാക്‌സി ബുക്ക് ചെയ്യാം. 50-ലധികം രാജ്യങ്ങളിലെ 600-ലധികം നഗരങ്ങളില്‍ ഇതിനകം പ്രവര്‍ത്തിക്കുന്ന സംവിധാനമാണ് ബോള്‍ട്ട്.

തുടക്കത്തില്‍, ദുബൈയില്‍ സ്റ്റാന്‍ഡേര്‍ഡ് റൈഡുകള്‍, വലിയ ഗ്രൂപ്പുകള്‍ക്കുള്ള എക്‌സ്എല്‍ കാറുകള്‍, പ്രീമിയം റൈഡുകള്‍ക്കുള്ള ബോള്‍ട്ട് പ്രീമിയം എന്നിവ ബുക്ക് ചെയ്യാം. പിന്നീട് മറ്റ് സേവനങ്ങളും ലഭ്യമാകും. ബോള്‍ട്ട് ടാക്‌സികള്‍ മാത്രമല്ല, ഭക്ഷണവും സര്‍വീസും ഡെലിവറി ചെയ്യുകയും, സ്‌കൂട്ടറും ഇ-ബൈക്കും വാടകയ്ക്ക് നല്‍കുകയും ചെയ്യുന്നു. 

ദുബൈ നിവാസികള്‍ക്ക് ഡിസംബര്‍ 15 വരെ ഏഴ് റൈഡുകളില്‍ 53% വരെ കിഴിവ് ലഭിക്കും. ഈ കിഴിവ് യുഎഇ ദേശീയ ദിനാഘോഷത്തോടനുബന്ധിച്ച് നല്‍കുന്നതാണ്. പരമാവധി 35 ദിര്‍ഹം വരെ കിഴിവ് ലഭിക്കും. ബോള്‍ട്ട് ദുബൈയില്‍ എത്തിയതോടെ യാത്രകള്‍ കൂടുതല്‍ എളുപ്പവും സുരക്ഷിതവുമായി. ആപ്പ് വഴി വാഹനം ബുക്ക് ചെയ്യാനും ട്രാക്ക് ചെയ്യാനും പേയ്‌മെന്റ് നടത്താനും കഴിയും. 

ബോള്‍ട്ടിന്റെ ദുബൈ ടാക്‌സി കമ്പനിയുമായുള്ള പങ്കാളിത്തം ദുബൈയിലെ ഗതാഗത മേഖലയില്‍ വലിയ മാറ്റങ്ങള്‍ കൊണ്ടുവരുമെന്ന് പ്രതീക്ഷിക്കുന്നു. ബോള്‍ട്ട് ആളുകളെ സ്വകാര്യ വാഹനങ്ങള്‍ ഉപയോഗിക്കുന്നത് കുറയ്ക്കാനും പൊതുഗതാഗതം കൂടുതല്‍ ഉപയോഗിക്കാന്‍ പ്രോത്സാഹിപ്പിക്കാനും ലക്ഷ്യമിടുന്നു. ഇത് ഗതാഗതക്കുരുക്ക്, മലിനീകരണം എന്നീ പ്രശ്‌നങ്ങള്‍ക്ക് പരിഹാരമായിരിക്കും.അടുത്ത കുറച്ച് വര്‍ഷങ്ങളില്‍ 80 ശതമാനം ടാക്‌സി യാത്രകളും ഇ-ഹെയിലിംഗ് ആപ്പുകള്‍ വഴി ബുക്ക് ചെയ്യാനാണ് ദുബൈ സര്‍ക്കാര്‍ പദ്ധതിയിടുന്നത്.

#Bolt #Dubai #ridehailing #UAE #transportation #technology #app