ശബരിമല: (KVARTHA) തീർത്ഥാടന കാലത്തിന് ശേഷം ശബരിമല സന്നിധാനത്തും പമ്പയിലും രൂക്ഷമായ ഈച്ചശല്യം കാരണം ദേവസ്വം ജീവനക്കാരും സുരക്ഷാ ഉദ്യോഗസ്ഥരും ദുരിതത്തിൽ. പുറത്തിറങ്ങിയാൽ ഈച്ച പൊതിയുന്ന അവസ്ഥയാണെങ്കിൽ മുറിക്കുള്ളിൽ കയറിയാലും രക്ഷയില്ലാത്ത സ്ഥിതിയാണ്. ശക്തമായി ഫാൻ ഇട്ടശേഷം ഒരു കൈയിൽ വിശറിയുമായി ഇരുന്നാണ് പലരും ഭക്ഷണം കഴിക്കുന്നത്.

വില്ലനായി മലിനജലവും മാലിന്യവും

തീർത്ഥാടന കാലത്ത് സന്നിധാനത്തും പമ്പയിലും അടിഞ്ഞുകൂടിയ ചപ്പുചവറുകളും ഖരമാലിന്യങ്ങളും വിശുദ്ധിസേന പ്രവർത്തകർ നീക്കം ചെയ്തിരുന്നു. എന്നാൽ മലിനജലം പലഭാഗത്തും ഇപ്പോഴും കെട്ടിക്കിടക്കുകയാണ്. ഓടകൾ നിറഞ്ഞു കിടക്കുന്നതും ഈച്ച പെരുകാൻ കാരണമായി. പമ്പാ മണപ്പുറത്തെ മാലിന്യം നീക്കിയെങ്കിലും നദിയിൽ തീർത്ഥാടകർ ഉപേക്ഷിച്ച വസ്ത്രങ്ങൾ വലിയ ഭീഷണിയാണ് ഉയർത്തുന്നത്. കഴിഞ്ഞ ദിവസം കരാറുകാരൻ നദിയിൽ നിന്ന് 3 ലോഡ് വസ്ത്രങ്ങളാണ് ശേഖരിച്ചത്. തുണികൾ കിടന്ന് പമ്പാനദിയിലെ വെള്ളവും മലിനമായിരിക്കുകയാണ്.

വലഞ്ഞ് ഉദ്യോഗസ്ഥർ

നട അടച്ചശേഷം സന്നിധാനത്ത് മേൽശാന്തിമാർ, സഹായികൾ, ദേവസ്വം ജീവനക്കാർ, സെക്യൂരിറ്റി ഗാർഡുകൾ, പൊലീസ്, മരാമത്ത് ജീവനക്കാർ, വനപാലകർ എന്നിവർ ഉൾപ്പെടെ 62 പേരാണ് ഡ്യൂട്ടിയിലുള്ളത്. പമ്പ ഗണപതികോവിലിൽ നിത്യപൂജയുള്ളതിനാൽ അവിടെയും ജീവനക്കാരുണ്ട്. കൂടാതെ സ്ഥിരം പൊലീസ് സ്റ്റേഷൻ, പോസ്റ്റ് ഓഫിസ്, കെഎസ്ഇബി സബ് സ്റ്റേഷൻ, ഇറിഗേഷൻ, ബിഎസ്എൻഎൽ, വനംവകുപ്പ് എന്നിവയിലെ ജീവനക്കാർ ഉൾപ്പെടെ നൂറിലേറെ പേർ പമ്പയിലുണ്ട്. ഇവരെല്ലാം ഈച്ചശല്യം കാരണം വല്ലാത്ത അവസ്ഥയിലാണ്.

അട്ടത്തോട്ടിലും ദുരിതം

പമ്പയിൽ നിന്ന് 18 കിലോമീറ്റർ അകലെയുള്ള അട്ടത്തോട് പ്രദേശത്തും ഈച്ചശല്യം രൂക്ഷമാണ്. ഇവിടെ താമസിക്കുന്ന നൂറിലേറെ കുടുംബങ്ങൾക്ക് സമാധാനമായി ഭക്ഷണം കഴിക്കാൻ പോലും കഴിയാത്ത സാഹചര്യമാണുള്ളത്. നിലയ്ക്കലും സമാനമായ അവസ്ഥയാണുള്ളത്. ശബരിമല, പമ്പ, നിലയ്ക്കൽ മേഖലകളിൽ ഇതുവരെയും വേനൽമഴ ലഭിച്ചിട്ടില്ല. ശക്തമായ മഴ പെയ്താൽ മലിനജലം ഒഴുകിപ്പോകുമെന്നും ഈച്ചശല്യത്തിന് ശമനമുണ്ടാകുമെന്നുമുള്ള പ്രതീക്ഷയിലാണ് നാട്ടുകാരും ജീവനക്കാരും.

ശബരിമലയിലും പമ്പയിലും ഈച്ചശല്യം രൂക്ഷം; ജീവനക്കാരുടെ ദുരിതം അറിയിക്കാൻ ഈ വാർത്ത ഷെയർ ചെയ്യൂ. കൂടുതൽ വാർത്തകൾക്കും അപ്‌ഡേറ്റുകൾക്കുമായി ഞങ്ങളുടെ വാട്സ്ആപ്പ് ചാനൽ ഫോളോ ചെയ്യൂ.

Article Summary: Severe fly infestation at Sabarimala and Pampa post-pilgrimage season affects employees and locals; stagnant sewage cited as the cause.

#Sabarimala #Pampa #KeralaNews #Environment #HealthHazard #Attathode #Sannidhanam