തൃപ്പൂണിത്തുറ: (KVARTHA) പൊന്നോണത്തിൻ്റെ വരവറിയിച്ച് അത്തം ഒന്ന്. അടുത്ത പത്ത് ദിവസം വീട്ടു മുറ്റങ്ങളിൽ പൂക്കളം ഒരുങ്ങും. ലോകമെമ്പാടുമുള്ള മലയാളികൾക്ക് ഇനി ആഘോഷത്തിൻ്റെയും ഉത്സവത്തിൻ്റെയും നാളുകളാണ്. സമഭാവനയുടെ സന്ദേശമോതുന്ന തിരുവോണത്തിനായി മാവേലിയെ വരവേൽക്കാൻ നാടും നഗരവും ഒരുങ്ങുകയാണ്.

ഓണത്തിൻ്റെ വരവറിയിച്ച് തൃപ്പൂണിത്തുറയിൽ ചൊവ്വാഴ്ച (26.08.2025) അത്തം ഘോഷയാത്ര നടക്കും. ഇതോടെ സംസ്ഥാനത്തെ ഓണാഘോഷങ്ങൾക്ക് ഔദ്യോഗിക തുടക്കമാകും. രാവിലെ മന്ത്രി എം.ബി. രാജേഷ് ചടങ്ങ് ഉദ്ഘാടനം ചെയ്യും. പി. രാജീവ് അത്തപ്പതാക ഉയർത്തും. നടൻ ജയറാമാണ് ഘോഷയാത്ര ഫ്ലാഗ് ഓഫ് ചെയ്യുന്നത്.

തൃപ്പൂണിത്തുറ ബോയ്സ് ഗ്രൗണ്ടിൽ നിന്ന് ആരംഭിക്കുന്ന ഘോഷയാത്ര നഗരം ചുറ്റി അവിടെ തന്നെ അവസാനിക്കും. സിനിമാ താരം പിഷാരടിയും ആഘോഷങ്ങളിൽ പങ്കെടുക്കും. ആനയും അമ്പാരിയും നിശ്ചലദൃശ്യങ്ങളും അണിനിരക്കുന്ന വർണ്ണാഭമായ കാഴ്ചകൾക്കാകും നഗരം സാക്ഷ്യം വഹിക്കുക. ഘോഷയാത്ര കണക്കിലെടുത്ത് രാവിലെ എട്ട് മണി മുതൽ വൈകിട്ട് മൂന്ന് മണി വരെ തൃപ്പൂണിത്തുറയിൽ ഗതാഗത നിയന്ത്രണം ഏർപ്പെടുത്തിയിട്ടുണ്ട്. സുരക്ഷയ്ക്കായി 450 പോലീസുകാരെ വിന്യസിച്ചിട്ടുണ്ട്.

സംസ്ഥാന സർക്കാർ എ.എ.വൈ. റേഷൻ കാർഡ് ഉടമകൾക്കും ക്ഷേമ സ്ഥാപനങ്ങളിലെ അന്തേവാസികൾക്കും നൽകുന്ന സൗജന്യ ഓണക്കിറ്റ് വിതരണം ചൊവ്വാഴ്ച മുതൽ ആരംഭിക്കും. രാവിലെ 9.30ന് തിരുവനന്തപുരം ജില്ലാ പഞ്ചായത്ത് ഹാളിൽ ഭക്ഷ്യ, പൊതുവിതരണ മന്ത്രി ജി.ആർ. അനിൽ കിറ്റ് വിതരണം ഉദ്ഘാടനം ചെയ്യും. ഓണത്തിന് മുൻപ് എല്ലാവർക്കും കിറ്റ് ലഭ്യമാക്കുമെന്നാണ് അറിയിപ്പ്.
 

ഓണത്തിന്റെ വരവറിയിച്ച് തുടങ്ങിയ ഈ ആഘോഷങ്ങളെക്കുറിച്ച് നിങ്ങൾക്ക് എന്താണ് പറയാനുള്ളത്? അഭിപ്രായം പങ്കുവെക്കൂ.

Article Summary: Atham marks the start of Onam festivities in Thrippunithura.

#Onam #Atham #Thrippunithura #OnamKit #Kerala #Festival