ന്യൂഡൽഹി: (KVARTHA) ലോകത്തെല്ലാവരും ജനുവരി ഒന്നിന് പുതുവർഷം ആഘോഷിക്കുന്നു എന്നു കരുതുന്നത് ഒരു വലിയ തെറ്റാണ്. ഓരോ രാജ്യത്തിനും ഓരോ സംസ്കാരത്തിനും അവരുടേതായ പുതുവർഷ ആഘോഷങ്ങളുണ്ട്. ഈ വൈവിധ്യമാർന്ന ആഘോഷങ്ങൾ ഓരോ സംസ്കാരത്തിന്റെയും ചരിത്രത്തെയും വിശ്വാസങ്ങളെയും പ്രതിനിധീകരിക്കുന്നു.

ചൈനീസ് പുതുവർഷം: വസന്തകാലത്തിന്റെ ആഘോഷം

ചൈനയിൽ, ചന്ദ്ര കലണ്ടർ അനുസരിച്ചാണ് പുതുവർഷം ആഘോഷിക്കുന്നത്. സാധാരണയായി ജനുവരി 21 മുതൽ ഫെബ്രുവരി 20 വരെയാണ് ഈ ആഘോഷം. വസന്തകാലത്തിന്റെ തുടക്കത്തെയാണ് ഇത് കുറിക്കുന്നത്. കുടുംബസംഗമങ്ങൾ, ആഘോഷ പരേഡുകൾ, പടക്കങ്ങൾ എന്നിവയാണ് ഈ ആഘോഷത്തിന്റെ പ്രധാന ആകർഷണങ്ങൾ. ഓരോ വർഷവും പന്ത്രണ്ട് രാശിചിഹ്നങ്ങളിൽ ഒന്നുമായി ബന്ധപ്പെട്ടിരിക്കുന്നതും ചൈനീസ് പുതുവർഷത്തിന്റെ ഒരു പ്രത്യേകതയാണ്.

ഹിജ്‌റ പുതുവർഷം: ഇസ്ലാമിക കലണ്ടറിലെ ഒരു പ്രധാന ദിനം

ഹിജ്‌റ പുതുവർഷം ഇസ്ലാമിക ചരിത്രത്തിലെ ഒരു സുപ്രധാന ദിനമാണ്. ഇസ്ലാമിക കലണ്ടർ അഥവാ ഹിജ്‌റ കലണ്ടർ പ്രവാചകൻ മുഹമ്മദ് നബി മക്കയിൽ നിന്ന് മദീനയിലേക്ക് നടത്തിയ പലായനത്തിന്റെ (ഹിജ്‌റ) ഓർമ പുതുക്കുന്ന ദിനമാണ്. ഈ സംഭവം ഇസ്ലാമിന്റെ വളർച്ചയിലെ ഒരു നിർണ്ണായക വഴിത്തിരിവായിരുന്നു. ഹിജ്‌റ വർഷം ആരംഭിക്കുന്നത് മുഹറം മാസത്തിലാണ്. 

ഇത് ലോകമെമ്പാടുമുള്ള മുസ്ലീങ്ങൾക്ക് ഒരു പുതിയ തുടക്കത്തിന്റെയും പ്രാർത്ഥനയുടെയും പ്രതിജ്ഞയുടെയും സമയമാണ്. ഈ ദിവസം മുസ്ലീങ്ങൾ പള്ളികളിൽ ഒത്തുചേർന്ന് പ്രത്യേക പ്രാർത്ഥനകളും പ്രഭാഷണങ്ങളും നടത്തുന്നു. പല സ്ഥലങ്ങളിലും അന്നദാനവും മറ്റു സാമൂഹിക സേവന പരിപാടികളും സംഘടിപ്പിക്കാറുണ്ട്. ഹിജ്‌റ പുതുവർഷം എന്നത് വെറും ഒരു ആഘോഷം മാത്രമല്ല, വിശ്വാസികൾക്ക് അവരുടെ ജീവിതത്തെക്കുറിച്ചും വിശ്വാസത്തെക്കുറിച്ചും ആത്മപരിശോധന നടത്താനുള്ള ഒരു അവസരം കൂടിയാണ്.

റോഷ് ഹഷാന: ജൂത പുതുവർഷം

സെപ്റ്റംബർ-ഒക്ടോബർ മാസങ്ങളിലാണ് ജൂത പുതുവർഷമായ റോഷ് ഹഷാന ആഘോഷിക്കുന്നത്. ഈ ദിനം ആത്മപരിശോധനയ്ക്കും പ്രാർത്ഥനയ്ക്കും ഉള്ളതാണ്. കുടുംബാംഗങ്ങൾ ഒരുമിച്ചിരുന്ന് ആപ്പിൾ തേനിൽ മുക്കി കഴിക്കുന്നത് ഒരു പ്രധാന ആചാരമാണ്.

സോങ്ക്രൺ: തായ്‌ലൻഡിന്റെ വെള്ളപ്പൊങ്കാല

ഏപ്രിൽ മാസത്തിൽ തായ്‌ലൻഡിൽ നടക്കുന്ന ഒരു പ്രധാന ആഘോഷമാണ് സോങ്ക്രൺ. ഇത് തായ്‌ലൻഡിന്റെ പുതുവർഷാരംഭത്തിന്റെ ആഘോഷം കൂടിയാണ്. സോങ്ക്രണിന്റെ ഏറ്റവും വലിയ പ്രത്യേകത, സർവത്ര വെള്ളം നിറഞ്ഞ ഒരുത്സവമാണ് ഇത് എന്നതാണ്. ചെറുപ്പക്കാരും പ്രായമായവരും എന്ന വ്യത്യാസമില്ലാതെ എല്ലാവരും തെരുവിലിറങ്ങി പരസ്പരം വെള്ളം ഒഴിച്ചും ബലൂണുകൾ എറിഞ്ഞും ആഘോഷിക്കുന്നു. 

ചൂടൻ കാലാവസ്ഥയിൽ ഒരു കുളിർമ നൽകുന്ന ഈ വെള്ളം കളി സോങ്ക്രണിന്റെ പ്രധാന ആകർഷണമാണ്. തായ് ലൻഡിന്റെ സംസ്കാരവും പാരമ്പര്യവും വിളിച്ചോതുന്ന ഈ ഉത്സവം കാണാനും ആഘോഷിക്കാനും ലോകത്തിന്റെ പല ഭാഗങ്ങളിൽ നിന്നും സഞ്ചാരികൾ എത്താറുണ്ട്. സോങ്ക്രൺ തായ്‌ലൻഡിന്റെ ഒരു സാംസ്കാരിക ചിഹ്നം കൂടിയാണ്.

നൗറൂസ്: പേർഷ്യൻ പുതുവർഷം

മാർച്ച് 20 ന് അല്ലെങ്കിൽ അതിനടുത്താണ് പേർഷ്യൻ പുതുവർഷമായ നൗറൂസ് ആഘോഷിക്കുന്നത്. വസന്തത്തിന്റെ വരവിനെയാണ് ഇത് കുറിക്കുന്നത്. വീടുകൾ വൃത്തിയാക്കുക, അലങ്കരിക്കുക, സുഹൃത്തുക്കളെയും കുടുംബാംഗങ്ങളെയും സന്ദർശിക്കുക എന്നിവയാണ് ഈ ആഘോഷത്തിന്റെ പ്രധാന ആചാരങ്ങൾ.

അളുത് അവുരുദ്ദ: ശ്രീലങ്കയിലെ പുതുവർഷം

ശ്രീലങ്കയിലെ സിംഹള, തമിഴ് പുതുവർഷമാണ് അളുത് അവുരുദ്ദ. ഇത് സാധാരണയായി ഏപ്രിൽ മാസത്തിലാണ് ആഘോഷിക്കുന്നത്. വിളവെടുപ്പ് കാലത്തിന്റെ അവസാനവും പുതിയൊരു വർഷത്തിന്റെ ആരംഭവുമാണ് ഈ ആഘോഷം കുറിക്കുന്നത്. അതുകൊണ്ട് തന്നെ ഇത് സമൃദ്ധിയുടെയും പുതിയ തുടക്കത്തിന്റെയും ഒരു പ്രതീകമാണ്.

അളുത് അവുരുദ്ദ ആഘോഷം പ്രധാനമായും കുടുംബാംഗങ്ങൾ ഒത്തുചേരലിന്റെയും സന്തോഷം പങ്കുവെക്കലിന്റെയും ഒരു അവസരമാണ്. ഈ ദിവസങ്ങളിൽ വീടുകൾ വൃത്തിയാക്കുകയും അലങ്കരിക്കുകയും ചെയ്യുന്നു. പുതിയ വസ്ത്രങ്ങൾ ധരിക്കുകയും പരമ്പരാഗത ഭക്ഷണങ്ങളായ കിരിബത്ത് (പാൽ ചോറ്), കൊക്കിസ്, കാവുൻ തുടങ്ങിയ വിഭവങ്ങൾ ഉണ്ടാക്കുകയും ചെയ്യുന്നു.

ഈ ആഘോഷത്തിന്റെ പ്രധാന ആകർഷണങ്ങളിൽ ഒന്നാണ് അടുപ്പ് കത്തിക്കൽ. ഒരു പ്രത്യേക സമയത്താണ് അടുപ്പ് കത്തിക്കുന്നത്. ഇത് പുതിയൊരു തുടക്കത്തിന്റെ പ്രതീകമാണ്. കൂടാതെ, കുടുംബാംഗങ്ങൾ ഒരുമിച്ചിരുന്ന് ഭക്ഷണം കഴിക്കുകയും പരസ്പരം സമ്മാനങ്ങൾ കൈമാറുകയും ചെയ്യുന്നു.
മതപരമായ ചടങ്ങുകളും അളുത് അവുരുദ്ദയുടെ ഒരു പ്രധാന ഭാഗമാണ്. 

ഇന്ത്യയിലെ വൈവിധ്യമാർന്ന പുതുവർഷ ആഘോഷങ്ങൾ

ഇന്ത്യയിൽ, പല സ്ഥലങ്ങളിലും അവരവരുടെ കലണ്ടറുകളുണ്ട്. ഈ സാംസ്കാരിക വൈവിധ്യം കാരണം ചില സ്ഥലങ്ങളിൽ വ്യത്യസ്ത ദിവസമാണ് പുതുവർഷം ആഘോഷിക്കുന്നത്. പഞ്ചാബിലെ ബൈശാഖി, ആസാമിലെ ബിഹു, ഒഡീഷയിലെ പാന സംക്രാന്തി, ആന്ധ്രാപ്രദേശ്, തെലങ്കാന, കർണാടക, മഹാരാഷ്ട്ര എന്നിവിടങ്ങളിൽ ഉഗാദി അല്ലെങ്കിൽ ഗുഡി പഡ്വ എന്നിവയാണ് പ്രധാന പുതുവർഷ ആഘോഷങ്ങൾ.

#NewYear #celebrations #cultures #traditions #ChineseNewYear #RoshHashanah