കൊല്ലം: (KVARTHA) കേന്ദ്രമന്ത്രിയും തൃശൂർ എംപിയുമായ സുരേഷ് ഗോപിക്കെതിരെയും സഹോദരൻ സുഭാഷ് ഗോപിക്കെതിരെയും ഇരട്ടവോട്ട് ആരോപണം. സുരേഷ് ഗോപിയുടെ സഹോദരൻ സുഭാഷ് ഗോപിയുടെ പേര് തൃശൂരിലെയും കൊല്ലത്തെയും വോട്ടർപട്ടികയിൽ ഉണ്ടെന്നാണ് പുതിയ വിവരം. കുടുംബവീടായ ലക്ഷ്മി നിവാസിന്റെ മേൽവിലാസത്തിൽ കൊല്ലം ഇരവിപുരം മണ്ഡലത്തിലെ 84-ാം നമ്പർ ബൂത്തിലാണ് സുഭാഷ് ഗോപിക്ക് വോട്ടുള്ളത്. അതേസമയം, കൊല്ലത്ത് അദ്ദേഹം വോട്ട് രേഖപ്പെടുത്തിയോ എന്ന കാര്യത്തിൽ സ്ഥിരീകരണമില്ല. സുരേഷ് ഗോപി തൃശൂരിലേക്ക് വോട്ട് മാറ്റിയത് വിവാദമായതിന് പിന്നാലെയാണ് സഹോദരനെതിരെയും ഇരട്ടവോട്ട് ആരോപണം ഉയർന്നിരിക്കുന്നത്.

സുരേഷ് ഗോപിക്കെതിരെ അന്വേഷണം

ലോക്‌സഭാ തിരഞ്ഞെടുപ്പിന് തൊട്ടുമുമ്പ് സുരേഷ് ഗോപി തൃശൂരിലേക്ക് വോട്ട് മാറ്റിയത് നിയമവിരുദ്ധവും ക്രിമിനൽ ഗൂഢാലോചനയുമാണെന്ന് ചൂണ്ടിക്കാട്ടി കെപിസിസി രാഷ്ട്രീയ കാര്യസമിതി അംഗം ടി.എൻ. പ്രതാപൻ തൃശൂർ സിറ്റി പോലീസ് കമ്മിഷണർ ആർ. ഇളങ്കോയ്ക്ക് പരാതി നൽകിയിരുന്നു. ഈ പരാതി എസിപിയുടെ നേതൃത്വത്തിലുള്ള ഒരു സംഘം അന്വേഷിക്കും. ഇതുമായി ബന്ധപ്പെട്ട് നിയമോപദേശം തേടുമെന്ന് കമ്മിഷണർ അറിയിച്ചു.

തിരുവനന്തപുരത്ത് സ്ഥിരതാമസക്കാരനായ സുരേഷ് ഗോപി, വ്യാജ സത്യപ്രസ്താവന ഉൾപ്പെടെ സമർപ്പിച്ചാണ് തൃശൂർ നിയമസഭാ മണ്ഡലത്തിലെ 115-ാം നമ്പർ ബൂത്തിൽ വോട്ട് ചേർത്തതെന്ന് പരാതിയിൽ പറയുന്നു. ജനപ്രാതിനിധ്യ നിയമമനുസരിച്ച് സ്ഥിരതാമസക്കാരനായ വ്യക്തിക്ക് മാത്രമേ ഒരു ബൂത്തിൽ വോട്ട് ചേർക്കാൻ സാധിക്കൂ. പതിറ്റാണ്ടുകളായി സുരേഷ് ഗോപിയും കുടുംബവും തിരുവനന്തപുരം ശാസ്തമംഗലത്ത് താമസക്കാരാണ്. അദ്ദേഹം കേന്ദ്രമന്ത്രിയായതിന് ശേഷവും തിരുവനന്തപുരം കോർപ്പറേഷൻ പട്ടികയിൽ അദ്ദേഹത്തിന്റെയും കുടുംബാംഗങ്ങളുടെയും പേരുകൾ തുടരുന്നത് കൃത്രിമം നടന്നതിന് തെളിവാണെന്നും പരാതിയിൽ പറയുന്നു. ഇതുസംബന്ധിച്ച് കേന്ദ്ര തിരഞ്ഞെടുപ്പ് കമ്മിഷനും പരാതി നൽകും.
 

ഈ വാർത്തയെക്കുറിച്ചുള്ള നിങ്ങളുടെ അഭിപ്രായം എന്താണ്? കമന്റ് ചെയ്യൂ.

Article Summary: Police to investigate Suresh Gopi's vote transfer to Thrissur and dual voter ID allegations against his brother.

#SureshGopi #KeralaPolitics #VoterFraud #Thrissur #Kollam #PoliceInvestigation