പയ്യന്നൂരിൽ സിപിഎം ബൂത്ത് കയ്യേറിയെന്ന് ആരോപണം: റീപോളിങ് ആവശ്യപ്പെട്ട് ബിജെപി പരാതി നൽകി

കണ്ണൂർ: (KVARTHA) പയ്യന്നൂർ മുനിസിപ്പാലിറ്റിയിലെ വാർഡ് 9 കാനായി നോർത്തിൽ സിപിഎം ബൂത്ത് കയ്യേറി തിരഞ്ഞെടുപ്പ് അട്ടിമറിച്ചതിനാൽ റീപോളിങ് നടത്തണമെന്നാവശ്യപ്പെട്ട് ബിജെപി തിരഞ്ഞെടുപ്പ് കമ്മീഷന് പരാതി നൽകി. ബിജെപി കണ്ണൂർ നോർത്ത് ജില്ലാ പ്രസിഡന്റിന്റെ നിർദ്ദേശപ്രകാരം ന്യൂനപക്ഷ മോർച്ച കണ്ണൂർ നോർത്ത് ജില്ലാ പ്രസിഡന്റ് പിന്റോ ഫ്രഡറിക് ആണ് പരാതി നൽകിയത്.

കണ്ണൂർ ജില്ലാ റിട്ടേണിംഗ് ഓഫീസർ, കേരള ചീഫ് ഇലക്ഷൻ കമ്മീഷണർ, കണ്ണൂർ ജില്ലാ കലക്റ്റർ, കണ്ണൂർ റൂറൽ എസ്പി, പയ്യന്നൂർ പോലീസ് സ്റ്റേഷൻ എസ്എച്ച്ഒ എന്നിവർക്കാണ് പരാതി സമർപ്പിച്ചത്. വൈകുന്നേരം 3.30-ന് സിപിഎമ്മുകാർ ബൂത്ത് കയ്യേറുകയും ബൂത്തിനകത്തെ നിയന്ത്രണം ഏറ്റെടുക്കുകയും ചെയ്തെന്നാണ് പരാതിയിലെ പ്രധാന ആരോപണം. 

തുടർന്ന്, ബിജെപിയുടെയും കോൺഗ്രസിന്റെയും ബൂത്ത് ഏജന്റുമാരെ ഭീഷണിപ്പെടുത്തി പുറത്താക്കി. ബിജെപി സ്ഥാനാർത്ഥി എ ജയന്തി ബൂത്തിനകത്ത് പ്രവേശിക്കാൻ ശ്രമിച്ചെങ്കിലും അവരെയും ഭീഷണിപ്പെടുത്തി തിരിച്ചയച്ചതായി പരാതിയിൽ പറയുന്നു.

കാങ്കോൽ ആലപ്പടമ്പ് ഗ്രാമപഞ്ചായത്തിൽ സിപിഎം കള്ളവോട്ട് നടത്തിയതിന് എതിരെയും ബിജെപി പരാതി നൽകിയിട്ടുണ്ട്. കൂടാതെ, അഴീക്കോട് നീർക്കടവിലെ അഴീക്കോട് എൽപി സ്കൂൾ വടക്കുഭാഗം, അഴീക്കോട് ഫിഷറീസ് എൽപി സ്കൂൾ എന്നിവിടങ്ങളിൽ സ്ത്രീകളെ മുൻനിർത്തി സിപിഎം നടത്തിയ ഇരട്ട വോട്ടിങ്ങിനും എതിരെ ബിജെപി ജില്ലാ ഘടകം തിരഞ്ഞെടുപ്പ് കമ്മീഷന് പരാതി സമർപ്പിച്ചു.

തിരഞ്ഞെടുപ്പ് വാർത്തകളെക്കുറിച്ചുള്ള നിങ്ങളുടെ അഭിപ്രായം കമന്റ് ചെയ്യുക. 

Article Summary: BJP alleges CPM booth capture in Payyanur, demands repolling, and files complaints against bogus voting.

#Payyanur #ElectionAllegations #KeralaPolitics #BJP #CPM #Repolling