തദ്ദേശ തിരഞ്ഞെടുപ്പ് പരസ്യ പ്രചാരണം ഞായറാഴ്ച അവസാനിക്കും; കൊട്ടിക്കലാശം സമാധാനപരമാക്കണം: കർശന നിർദേശങ്ങളുമായി തിരഞ്ഞെടുപ്പ് കമ്മീഷൻ

തിരുവനന്തപുരം: (KVARTHA) തദ്ദേശ സ്വയംഭരണ തിരഞ്ഞെടുപ്പിന്റെ ആദ്യഘട്ട വോട്ടെടുപ്പിന് മുന്നോടിയായുള്ള പരസ്യ പ്രചാരണം ഞായറാഴ്ച (ഡിസംബർ 7) വൈകുന്നേരം 6 മണിക്ക് അവസാനിക്കുമെന്ന് സംസ്ഥാന തിരഞ്ഞെടുപ്പ് കമ്മീഷണർ എ ഷാജഹാൻ അറിയിച്ചു. 

വോട്ടെടുപ്പ് നടക്കുന്നതിന് 48 മണിക്കൂർ മുമ്പ് പരസ്യ പ്രചാരണം അവസാനിപ്പിക്കണം എന്ന 1951-ലെ ജനപ്രാതിനിധ്യ നിയമത്തിലെ സെക്ഷൻ 126 (1) അനുസരിച്ചാണ് ഈ നിർദേശം. ഈ വ്യവസ്ഥ തദ്ദേശ സ്വയംഭരണ പൊതുതിരഞ്ഞെടുപ്പിനും ബാധകമാണ്.

ഡിസംബർ 9 ന് വോട്ടെടുപ്പ് നടക്കാൻ നിശ്ചയിച്ചിട്ടുള്ള തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം എന്നീ ജില്ലകളിലാണ് പ്രചാരണം ഞായറാഴ്ച അവസാനിക്കുന്നത്.

കൊട്ടിക്കലാശം സമാധാനപരമാക്കണം

പരസ്യ പ്രചാരണം അവസാനിക്കുന്ന സമയത്ത് രാഷ്ട്രീയ പാർട്ടികൾ നടത്തുന്ന കൊട്ടിക്കലാശം പോലുള്ള പരിപാടികൾ സമാധാനപരമായിരിക്കണം എന്നും ക്രമസമാധാന പ്രശ്നങ്ങൾ ഉണ്ടാകാതെ ശ്രദ്ധിക്കണമെന്നും കമ്മീഷണർ നിർദേശിച്ചു. പൊതുജനങ്ങൾക്ക് മാർഗ്ഗതടസ്സം സൃഷ്ടിക്കുന്ന തരത്തിലുള്ള സമാപന പരിപാടികൾ പാടില്ല.

പ്രചാരണ സമാപനവുമായി ബന്ധപ്പെട്ടുണ്ടാകുന്ന തർക്കങ്ങളും, വെല്ലുവിളികളും, ശബ്ദ നിയന്ത്രണമില്ലാത്ത അനൗൺസ്‌മെന്റുകളും, പ്രചാരണ ഗാനങ്ങൾ ഉച്ചത്തിൽ കേൾപ്പിച്ച് മത്സരിക്കുന്ന പ്രവണതയും കർശനമായി നിയന്ത്രിക്കാൻ കമ്മീഷണർ ജില്ലാ കളക്ടർമാർക്കും പോലീസ് അധികൃതർക്കും നിർദേശം നൽകിയിട്ടുണ്ട്.

പരസ്യ പ്രചാരണത്തിന്റെ സമാപനത്തിലും മാതൃകാ പെരുമാറ്റച്ചട്ടവും, ഹരിത പെരുമാറ്റച്ചട്ടവും സ്ഥാനാർത്ഥികളും രാഷ്ട്രീയ പാർട്ടികളും ഉറപ്പുവരുത്തണം.

മാധ്യമ ബന്ധ സമിതി യോഗം ചേർന്നു

തദ്ദേശ പൊതുതിരഞ്ഞെടുപ്പുമായി ബന്ധപ്പെട്ട് മാധ്യമ സംബന്ധിയായ കാര്യങ്ങൾ പരിശോധിക്കാനും തീർപ്പാക്കാനും രൂപീകരിച്ച സംസ്ഥാനതല മീഡിയ റിലേഷൻസ് കമ്മിറ്റിയുടെ യോഗം സംസ്ഥാന തിരഞ്ഞെടുപ്പ് കമ്മീഷൻ ആസ്ഥാനത്ത് ചേർന്നു. കമ്മിറ്റിക്ക് ലഭിച്ച പരാതികളും ആക്ഷേപങ്ങളും യോഗം വിശദമായി പരിശോധിച്ചു. വേഗത്തിൽ തീർപ്പാക്കേണ്ട പരാതികൾ തുടർനടപടിക്കായി ബന്ധപ്പെട്ട ജില്ലകളിലെ ഉദ്യോഗസ്ഥർക്ക് കൈമാറി.

ശബ്ദ നിയന്ത്രണവുമായി ബന്ധപ്പെട്ട പരാതികൾ മാതൃകാ പെരുമാറ്റച്ചട്ടത്തിന്റെയും ശബ്ദ നിയന്ത്രണ നിയമങ്ങളുടെയും പരിധിയിൽ വരുന്നതിനാൽ കർശനമായ നിയന്ത്രണത്തിന് കമ്മീഷൻ നിർദേശം നൽകിയിട്ടുണ്ട്. ശബ്ദ നിയന്ത്രണവുമായി ബന്ധപ്പെട്ട ശാസ്ത്രീയ പരിശോധനകൾക്കായി സംസ്ഥാന മലിനീകരണ നിയന്ത്രണ ബോർഡുമായി ആലോചിച്ച് തുടർനടപടി സ്വീകരിക്കുമെന്ന് യോഗം അറിയിച്ചു.

ശബരിമല പോസ്റ്ററുകൾക്കെതിരെ നടപടി

ശബരിമലയെ പശ്ചാത്തലമാക്കി തയ്യാറാക്കിയ പ്രചാരണ പോസ്റ്ററുകൾ മാതൃകാ പെരുമാറ്റച്ചട്ട ലംഘനത്തിന്റെ പരിധിയിൽ വരുന്നതിനാൽ, അവ സംബന്ധിച്ച പരാതികൾ പരിശോധിച്ച് നടപടിയെടുക്കാൻ ജില്ലാ കളക്ടർമാർക്ക് നിർദേശം നൽകാൻ യോഗം തീരുമാനിച്ചു.

പരാതികളായി ലഭിക്കുന്ന ഡിജിറ്റൽ ലിങ്കുകൾ ഉൾപ്പെടെയുള്ളവയിൽ വേഗത്തിൽ തുടർനടപടി സ്വീകരിക്കാൻ പോലീസ് സൈബർ ഓപ്പറേഷൻസിന് നിർദേശം നൽകി. പത്ര, ദൃശ്യ, ശ്രാവ്യ, സമൂഹ മാധ്യമങ്ങളിലെ ഉള്ളടക്കങ്ങൾ സംബന്ധിച്ച് സംസ്ഥാന തിരഞ്ഞെടുപ്പ് കമ്മീഷൻ പുറത്തിറക്കിയ മാർഗ്ഗനിർദേശങ്ങൾ പാലിക്കപ്പെടുന്നുണ്ടെന്ന് കമ്മിറ്റി വിലയിരുത്തി.

തിരഞ്ഞെടുപ്പ് കമ്മീഷൻ സെക്രട്ടറി ബി.എസ്. പ്രകാശിൻ്റെ അധ്യക്ഷതയിൽ ചേർന്ന യോഗത്തിൽ മുതിർന്ന മാധ്യമ പ്രവർത്തകൻ മലയിൻകീഴ് ഗോപാലകൃഷ്ണൻ, കെ.യു.ഡബ്ല്യു.ജെ തിരുവനന്തപുരം ജില്ലാ പ്രസിഡൻ്റ് ഷില്ലർ സ്റ്റീഫൻ, കേരളാ പോലീസ് സൈബർ ഓപ്പറേഷൻസ് ഇൻസ്‌പെക്ടർ ബിനോജ് എസ്, കമ്മീഷൻ ലോ ഓഫീസർ പ്രീതി ആർ നായർ, കൺസൾട്ടൻ്റ് എം. ഷാജഹാൻ, പി.ആർ.ഒ കെ.എം. അയ്യപ്പൻ തുടങ്ങിയവർ പങ്കെടുത്തു.

കൊട്ടിക്കലാശം സമാധാനപരമാവേണ്ടതിൻ്റെ പ്രാധാന്യം കമൻ്റ് ചെയ്യുക. 

Article Summary: Local poll campaign ends tomorrow; EC mandates peaceful 'kottikkalasham' and action against Sabarimala posters.

#LocalBodyElection #KeralaPolls #ElectionCommission #Kottikkalasham #Sabarimala #ModelCodeOfConduct