കണ്ണൂർ ജില്ലയിൽ ഇടതുപക്ഷത്തിന്റെ രാഷ്ട്രീയ അടിത്തറ ഇളകിയിട്ടില്ല; തോൽവിക്ക് കാരണം മറ്റു ചിലതാണ്, പാർട്ടി പരിശോധിക്കുമെന്ന് കെ കെ രാഗേഷ്

കണ്ണൂർ: (KVARTHA) ജില്ലയിൽ ഇടതുപക്ഷത്തിന്റെ രാഷ്ട്രീയ അടിത്തറ ഇളകിയിട്ടില്ലെന്ന് സി പി എം കണ്ണൂർ ജില്ലാ സെക്രട്ടറി കെ കെ രാഗേഷ് പറഞ്ഞു. പാർട്ടി ജില്ലാ കമ്മിറ്റി ഓഫീസായ കണ്ണൂർ അഴീക്കോടൻ മന്ദിരത്തിൽ വെച്ച് തെരഞ്ഞെടുപ്പ് ഫലത്തെക്കുറിച്ച് പ്രതികരിക്കുകയായിരുന്നു അദ്ദേഹം.

യു ഡി എഫ് വർഗീയ ശക്തികളുടെ വോട്ട് വാങ്ങിയിട്ടുണ്ട്. 'പണം കൊടുത്ത് വോട്ട് വാങ്ങാനും അവർക്ക് അറിയാം,' കെ കെ രാഗേഷ് ആരോപിച്ചു. അശാസ്ത്രീയമായ വാർഡ് വിഭജനം യു ഡി എഫ് നടത്തിയതിനാൽ തുളിച്ചേരി ഉൾപ്പെടെയുള്ള കോർപ്പറേഷൻ വാർഡുകളിൽ തിരിച്ചടിയുണ്ടായി.

കണ്ണൂർ ജില്ലയിലെ പത്ത് തദ്ദേശ സ്വയംഭരണ സ്ഥാപനങ്ങളിൽ എൽ ഡി എഫ് എതിരില്ലാതെ ജയിച്ചിട്ടുണ്ട്. കണ്ണൂർ ജില്ലാ പഞ്ചായത്തിലും നേട്ടമുണ്ടാക്കുകയും നഗരസഭകൾ എൽ ഡി എഫിന് നിലനിർത്താനാവുകയും ചെയ്തു.

ഗ്രാമ പഞ്ചായത്തുകളിൽ മലയോര മേഖലകളിൽ കഴിഞ്ഞ തവണ എൽ ഡി എഫ് പിടിച്ചെടുത്ത വാർഡുകളാണ് നഷ്ടമായത്. എങ്കിലും, തോൽവി അംഗീകരിച്ചുകൊണ്ട് ആവശ്യമായ സംഘടനാപരമായും രാഷ്ട്രീയപരമായും വേണ്ട തിരുത്തലുകൾ വരുത്തി മുന്നോട്ട് പോകുമെന്ന് അദ്ദേഹം വ്യക്തമാക്കി.

കണ്ണൂരും കാസർകോടും മികച്ച വിജയം തന്നെയാണ് എൽ ഡി എഫ് നേടിയിട്ടുള്ളത്. പയ്യന്നൂർ കാരയിലെ വിമത സ്ഥാനാർത്ഥിയുടെ വിജയം സംഘടനാപരമായി പരിശോധിക്കും. 'തന്റെ വാർഡിൽ യു ഡി എഫ് വിജയിച്ചതിൽ അത്ഭുതമില്ല, ഇടതുപക്ഷത്തിന് സ്വാധീനമുള്ള വാർഡ് അല്ല അത്,' കെ കെ രാഗേഷ് പറഞ്ഞു.

പയ്യന്നൂർ നഗരസഭയിൽ പോലീസിന് നേരെ ബോംബെറിഞ്ഞ കേസിൽ പ്രതിയായി ശിക്ഷിക്കപ്പെട്ട ഡി വൈ എഫ് ഐ പ്രവർത്തകൻ നിയമനടപടികളുമായി മുന്നോട്ട് പോകും. 'കീഴ്ക്കോടതി വിധി അന്തിമമല്ല, വിധിന്യായം വായിച്ചാൽ തന്നെ അതിന്റെ പോരായ്മ മനസിലാകും,' കെ കെ രാഗേഷ് ചൂണ്ടിക്കാട്ടി.

'സർക്കാരിനെതിരെയുള്ള വിധിയെഴുത്താകണമെങ്കിൽ സർക്കാർ എന്തെങ്കിലും കുറ്റം ചെയ്യേണ്ടേ? ക്ഷേമ പെൻഷൻ വർദ്ധിപ്പിച്ചു നൽകിയത് ഒരു കുറ്റമാണെന്ന് ആരും പറയില്ല,' കെ കെ രാഗേഷ് പറഞ്ഞു. സർക്കാർ എന്തെങ്കിലും വികസന പ്രവർത്തനങ്ങൾ നടത്തിയില്ലെന്ന് മാധ്യമങ്ങൾ പോലും പറഞ്ഞിട്ടില്ല. 

ന്യൂനപക്ഷ വോട്ടുകൾ എതിരാണെങ്കിൽ കണ്ണൂർ ജില്ലയിലെ മുഴപ്പിലങ്ങാട് എൽ ഡി എഫ് വിജയിക്കില്ലല്ലോ? കാസർകോടും കണ്ണൂരും ജില്ലാ പഞ്ചായത്തുകളിൽ ന്യൂനപക്ഷ വോട്ടുകൾക്ക് സ്വാധീനമുണ്ട്. അവിടെയും എൽ ഡി എഫിന് ജയിക്കാൻ കഴിഞ്ഞു. അതുകൊണ്ട് തോൽവിക്ക് കാരണം മറ്റു ചില കാരണങ്ങളാണ്, അവയെന്തെന്ന് പാർട്ടി പരിശോധിക്കുമെന്നും കെ കെ രാഗേഷ് വ്യക്തമാക്കി.

സി പി എം കണ്ണൂർ ജില്ലാ സെക്രട്ടറിയുടെ പ്രതികരണത്തെക്കുറിച്ച് നിങ്ങളുടെ അഭിപ്രായം പങ്കുവെക്കൂ. ഷെയർ ചെയ്യുക.

Article Summary: CPI(M) Kannur Secretary KK Ragesh states base is unshaken, alleges UDF bought communal votes.

#KNRnews #K.K.Ragesh #CPM #LDF #KeralaPolitics #Kannur