തിരുവനന്തപുരം: (KVARTHA) രണ്ടാം പിണറായി സർക്കാരിന്റെ അവസാന ബജറ്റിനെതിരെ രൂക്ഷ വിമർശനവും പരിഹാസവുമായി പ്രതിപക്ഷ നേതാവ് വി.ഡി. സതീശൻ രംഗത്ത്. 'പൂച്ചപെറ്റുകിടക്കുന്ന ഖജനാവും' നിരന്തരമായ പ്ലാൻ കട്ടിങും കൊണ്ട് വിശ്വാസ്യത തകർന്ന ധനകാര്യ സംവിധാനമുള്ള സർക്കാർ അവതരിപ്പിച്ച ബജറ്റ് ജനങ്ങൾ വിശ്വസിക്കില്ലെന്ന് അദ്ദേഹം പറഞ്ഞു. 

കഴിഞ്ഞ 10 വർഷം ചെയ്യാതിരുന്ന കാര്യങ്ങൾ ചെയ്യുമെന്ന് പ്രഖ്യാപിക്കുകയാണ് സർക്കാർ ഇപ്പോൾ ചെയ്യുന്നത്. പൂർണമായി പരാജയപ്പെട്ട മേഖലകളിൽ മാറ്റമുണ്ടാകുമെന്ന അവകാശം മാത്രമാണിതെന്നും, അനാവശ്യമായ രാഷ്ട്രീയം കലർത്തി അവതരിപ്പിച്ചതോടെ ബജറ്റിന്റെ പവിത്രത നഷ്ടമാക്കിയെന്നും സതീശൻ കുറ്റപ്പെടുത്തി. വാർഷിക ധനകാര്യ സ്‌റ്റേറ്റ്‌മെന്റ് തിരഞ്ഞെടുപ്പ് മുന്നിൽ കണ്ട് തയ്യാറാക്കിയ രാഷ്ട്രീയ രേഖയാണെന്നും അദ്ദേഹം ആരോപിച്ചു.

വിപണി ഇടപെടലിലും പരാജയം

സംസ്ഥാനത്തെ വിപണി ഇടപെടലിൽ സർക്കാർ ദയനീയ പരാജയമായിരുന്നുവെന്ന് പ്രതിപക്ഷ നേതാവ് ചൂണ്ടിക്കാട്ടി. കഴിഞ്ഞ ബജറ്റിൽ നീക്കിവച്ച തുക പോലും ഇതിനായി വിനിയോഗിച്ചില്ല. ഇത് ധനകാര്യ വ്യവസ്ഥിതിയുടെ വിശ്വാസ്യത തകർത്തുവെന്നും അദ്ദേഹം കൂട്ടിച്ചേർത്തു. കഴിഞ്ഞ അഞ്ചുമാസമായി സംസ്ഥാനത്ത് ട്രഷറി നിയന്ത്രണമുണ്ട്. മുൻപെങ്ങുമില്ലാത്ത സ്ഥിതിയാണിത്. ഈ ഖജനാവ് വെച്ചാണ് ധനകാര്യമന്ത്രി ബജറ്റ് പ്രസംഗം നടത്തിയതെന്നും അതിൽ പ്രതിപക്ഷത്തിന് അത്ഭുതമുണ്ടെന്നും സതീശൻ പറഞ്ഞു.

ശമ്പള കമ്മിഷനും ബാധ്യതയും

പോകുന്ന പോക്കിൽ ശമ്പള കമ്മിഷനും ധനമന്ത്രി പ്രഖ്യാപിച്ചു. അധികാരം ഒഴിയാൻ പോകുന്ന സർക്കാർ അടുത്ത സർക്കാരിന് ബാധ്യതയുണ്ടാക്കുന്ന രീതിയിലാണ് പ്രഖ്യാപനങ്ങൾ നടത്തിയിരിക്കുന്നത്. അടുത്ത ബജറ്റ് യു.ഡി.എഫ് സർക്കാർ അവതരിപ്പിക്കുമെന്നും നടപ്പാക്കുന്ന ബജറ്റ് അതാകുമെന്നും സതീശൻ അവകാശപ്പെട്ടു. അധികാരത്തിൽ തിരിച്ചുവരില്ലെന്ന് അറിയാവുന്നത് കൊണ്ടാണ് ശമ്പള കമ്മിഷൻ ഇപ്പോൾ പ്രഖ്യാപിച്ചത്. അധികാരത്തിലുണ്ടായിരുന്നപ്പോഴൊന്നും കമ്മിഷനെ നിയമിക്കുകയോ നടപടികൾക്ക് തുടക്കമിടുകയോ ചെയ്തില്ലെന്നും അദ്ദേഹം കുറ്റപ്പെടുത്തി. ഡി.എ (DA) കുടിശ്ശികയായ വലിയ തുക നൽകാതെയാണ് ഈ സർക്കാർ പോകുന്നത്. അത് അടുത്ത സർക്കാരിന്റെ തലയിലേക്ക് കെട്ടിവയ്ക്കുകയാണെന്നും അദ്ദേഹം പറഞ്ഞു.

ക്ഷേമ പെൻഷൻ

1600 രൂപയായിരുന്ന സാമൂഹിക ക്ഷേമ പെൻഷൻ വർധിപ്പിക്കുമെന്ന് 2020ലാണ് ജനങ്ങളോട് പറഞ്ഞത്. എന്നാൽ നാലേമുക്കാൽ കൊല്ലം ഇതിൽ ഒരു ചില്ലിക്കാശ് പോലും കൊടുത്തില്ലെന്നും അടുത്തയിടെയാണ് 600 രൂപ കൂട്ടിയതെന്നും അദ്ദേഹം വിമർശിച്ചു. ക്ഷേമപെൻഷൻ തുടങ്ങിയത് ആർ.ശങ്കറിന്റെ (R. Sankar) കാലത്താണെന്നും വാർധക്യ പെൻഷനും വിധവാ പെൻഷനും കേരളത്തിൽ സി.പി.എമ്മോ, കമ്മ്യൂണിസ്റ്റ് സർക്കാരോ അല്ല ആരംഭിച്ചതെന്നും വി.ഡി. സതീശൻ ഓർമ്മിപ്പിച്ചു. ആശാ വർക്കർമാരുടെ ഓണറേറിയം വർധിപ്പിച്ചത് സമരം ചെയ്തപ്പോൾ പരിഗണിക്കാതിരുന്ന സർക്കാർ ഇപ്പോൾ തിരഞ്ഞെടുപ്പ് മുന്നിൽ കണ്ടാണ് വർധിപ്പിച്ചതെന്നും അദ്ദേഹം പറഞ്ഞു. കഴിഞ്ഞ ബജറ്റിലെ 75 ശതമാനം പദ്ധതികളും നടപ്പിലാക്കിയില്ലെന്നും വന്യജീവി ആക്രമണത്തിന് നീക്കിവെച്ച തുകയിൽ 40 ശതമാനം മാത്രമാണ് ചെലവാക്കിയതെന്നും പ്രതിപക്ഷ നേതാവ് കുറ്റപ്പെടുത്തി.

സാമ്പത്തിക സ്ഥിതിയെക്കുറിച്ചുള്ള യാഥാർത്ഥ്യമാണോ? തിരഞ്ഞെടുപ്പ് മുന്നിൽ കണ്ടുള്ള ബജറ്റാണെന്ന ആരോപണത്തിൽ കഴമ്പുണ്ടോ? നിങ്ങളുടെ അഭിപ്രായം പറയൂ.

Article Summary: Opposition Leader V.D. Satheesan strongly criticizes the Kerala Budget, calling it a political document with empty promises from a government facing a financial crisis.

#VDSatheesan #KeralaBudget #OppositionLeader #KeralaPolitics #UDF #LDFGovernment