ന്യൂഡല്‍ഹി: (KVARTHA) ബീഹാർ വോട്ടെടുപ്പ്‌ പൂർത്തിയായതിന്‌ പിന്നാലെ കോൺഗ്രസ്‌ നേതാവും മുൻ എം പി-യും അഞ്ച്‌ തവണ എം എൽ എ-യും ആയിരുന്ന ഷക്കീൽ അഹമ്മദ്‌ പാർട്ടിയിൽ നിന്നും രാജിവെച്ചു. ഷക്കീൽ അഹമ്മദ്‌ പാർട്ടി ദേശീയ വക്താവായും പ്രവർത്തിച്ചിട്ടുണ്ട്‌. നേതൃത്വത്തിൽ ഉള്ള ചില നേതാക്കളുമായുള്ള അഭിപ്രായ വ്യത്യാസമാണ്‌ പാർട്ടി വിടാൻ കാരണമെന്ന്‌ രാജിക്കത്തിൽ പറയുന്നു.

അതേസമയം, താൻ മറ്റു പാർട്ടിയിൽ ചേരില്ലെന്നും അന്ത്യം വരെ കോൺഗ്രസ്‌ ആശയങ്ങളിൽ അടിയുറച്ചു നിൽക്കുമെന്നും ഷക്കീൽ അഹമ്മദ്‌ വ്യക്തമാക്കി. ബീഹാറിൽ നിന്നുള്ള നേതാവാണ്‌ ഷക്കീൽ അഹമ്മദ്‌. ബീഹാറിൽ വോട്ടെടുപ്പ്‌ പൂർത്തിയായതിന്‌ പിന്നാലെയാണ്‌ കോൺഗ്രസിന്‌ തിരിച്ചടിയായി രാജി സംഭവിച്ചിരിക്കുന്നത്‌.

എൻഡിഎക്ക്‌ വൻ ഭൂരിപക്ഷം: എക്സിറ്റ് പോൾ

ഷക്കീൽ അഹമ്മദിൻ്റെ രാജി വാർത്ത പുറത്തുവരുന്നതിനിടെ, ബീഹാറിൽ എൻ ഡി എ ഭരണം തുടരുമെന്നാണ്‌ എക്സിറ്റ് പോൾ പ്രവചനങ്ങൾ സൂചിപ്പിക്കുന്നത്‌. പുറത്തുവന്ന ഒരു പ്രവചനവും മഹാസഖ്യത്തിന്‌ സാധ്യത പറയുന്നില്ല. പുറത്തുവന്ന ഏഴ്‌ എക്സിറ്റ് പോൾ ഫലങ്ങളും എൻ ഡി എ വൻ ഭൂരിപക്ഷത്തിൽ അധികാരത്തിലേക്കെന്ന്‌ പ്രവചിക്കുന്നു. 133 മുതൽ 167 സീറ്റുകൾ വരെ എൻ ഡി എ നേടുമെന്നാണ്‌ പ്രവചനം. മാട്രിസ്‌ ഐ എ എൻ എസ്‌ (Matrise IANS) സർവേയാണ്‌ എൻ ഡി എക്ക്‌ 167 സീറ്റുകൾ വരെ പ്രവചിക്കുന്നത്‌.

മഹാസഖ്യം ഒരു പ്രവചനത്തിൽ പോലും കേവല ഭൂരിപക്ഷത്തിനടുത്തെത്തുന്നില്ല. മഹാസഖ്യം അധികാരത്തിൽ വരില്ലെന്ന്‌ പറയുമ്പോഴും, തേജസ്വി യാദവ്‌ മുഖ്യമന്ത്രിയാകണമെന്ന്‌ താൽപര്യപ്പെടുന്ന ചെറിയ വിഭാഗമുണ്ടെന്ന്‌ ചില സർവേകൾ ചൂണ്ടിക്കാട്ടുന്നു. പതിനായിരം രൂപ അകൗണ്ടിലേക്കെത്തിച്ചതടക്കമുള്ള സ്ത്രീകൾക്കായി നടത്തിയ പ്രഖ്യാപനങ്ങളാണ്‌ എൻ ഡി എക്ക്‌ അനുകൂലമായതെന്നാണ്‌ സർവേകളിലെ വിലയിരുത്തൽ.

പോളിംഗ്‌ ശതമാനം

അവസാന ഘട്ട വോട്ടെടുപ്പ്‌ പൂർത്തിയാകുമ്പോൾ 69 ശതമാനം പോളിംഗ്‌ രേഖപ്പെടുത്തിയതായാണ്‌ തെരഞ്ഞെടുപ്പ്‌ കമ്മീഷൻ വ്യക്തമാക്കുന്നത്‌. ഇത്‌ ആദ്യ ഘട്ട പോളിംഗ്‌ ശതമാന റെക്കോർഡിനെ (64.66 ശതമാനം) മറികടക്കുന്നതാണ്‌. പോളിംഗ്‌ ശതമാനം പരിശോധിച്ചാൽ ന്യൂനപക്ഷ മേഖലയായ സീമാഞ്ചലിലെ മണ്ഡലങ്ങളിലാണ്‌ കൂടുതൽ വോട്ടിംഗ്‌ നടന്നത്‌. മഹാസഖ്യം പ്രതീക്ഷ വെക്കുന്ന ഈ മേഖലയിൽ കഴിഞ്ഞ തവണ പക്ഷേ എൻ ഡി എയാണ്‌ മുന്നിലെത്തിയത്‌. എൻ ഡി എ കേന്ദ്രങ്ങളായ ചമ്പാരൻ മേഖലകളിലെ ബൂത്തുകളിലും നല്ല പോളിംഗ്‌ രേഖപെടുത്തി. കഴിഞ്ഞ തവണ 122-ൽ 62 സീറ്റുകൾ നേടി എൻ ഡി എ രണ്ടാംഘട്ടത്തിൽ മേൽക്കൈ നേടിയിരുന്നു. 49 സീറ്റാണ്‌ മഹാസഖ്യത്തിന്‌ കിട്ടിയത്‌.

ഷക്കീൽ അഹമ്മദിൻ്റെ രാജി കോൺഗ്രസിന്‌ എന്ത്‌ സന്ദേശമാണ്‌ നൽകുന്നത്‌? നിങ്ങളുടെ അഭിപ്രായം പങ്കുവെക്കുക.

Article Summary: Congress leader Shakeel Ahmad resigned after Bihar polls exit polls predicted landslide victory for NDA.

#BiharElection #ShakeelAhmad #Congress #NDA #ExitPolls #Bihar