വാഷിംഗ്ടണ്‍: (KVARTHA) ഇറാനും ഇസ്രായേലും തമ്മിലുള്ള സംഘര്‍ഷം രൂക്ഷമാകുന്നതിനിടെ, ടെഹ്‌റാനില്‍ നിന്ന് ഉടനടി ആളുകള്‍ ഒഴിഞ്ഞുപോകണമെന്ന് യുഎസ് പ്രസിഡന്റ് ഡോണള്‍ഡ് ട്രംപ് മുന്നറിയിപ്പ് നല്‍കി. ഇറാന്‍ അമേരിക്കയുമായി ഒരു ആണവ കരാര്‍ ഒപ്പിടേണ്ടതായിരുന്നുവെന്നും, ഇറാന് ഒരു ആണവായുധം ഉണ്ടാകാന്‍ പാടില്ലെന്നും ട്രംപ് തന്റെ ട്രൂത്ത് സോഷ്യല്‍ പ്ലാറ്റ്‌ഫോമില്‍ കുറിച്ചു. ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹു ഇറാന് നേരെ സൈനിക നടപടികള്‍ ശക്തമാക്കിയതിന് പിന്നാലെയാണ് ട്രംപിന്റെ ഈ ആഹ്വാനം.

ഈ നടപടികള്‍ സംഘര്‍ഷം വര്‍ദ്ധിപ്പിക്കാനല്ല, മറിച്ച് അവസാനിപ്പിക്കാനാണ് ലക്ഷ്യമിടുന്നതെന്ന് നെതന്യാഹു വാദിച്ചിരുന്നു. ഇറാന്റെ പരമോന്നത നേതാവ് ആയത്തുള്ള അലി ഖമേനിയെ വധിക്കുന്നത് ഇസ്രായേലും ഇറാനും തമ്മിലുള്ള സംഘര്‍ഷം അവസാനിപ്പിക്കുമെന്ന് നെതന്യാഹു പറഞ്ഞിരുന്നു. അതേസമയം, ഖമേനിയെ വധിക്കാനുള്ള ഇസ്രായേലിന്റെ നീക്കം അമേരിക്ക തടഞ്ഞുവെന്ന റിപ്പോര്‍ട്ടുകള്‍ തിങ്കളാഴ്ച പുറത്തുവന്നിരുന്നു. 'ഇറാന്‍കാര്‍ അമേരിക്കക്കാരെ ആരെയും കൊന്നില്ലല്ലോ. അവരത് ചെയ്യുംവരെ രാഷ്ട്രീയ നേതൃത്വത്തെ ഉന്നംവയ്ക്കുന്ന വിഷയം നാം സംസാരിക്കാന്‍ പോകുന്നില്ല,' എന്ന് ട്രംപ് നിലപാടെടുത്തെന്നാണ് രണ്ട് യുഎസ് ഉദ്യോഗസ്ഥരെ ഉദ്ധരിച്ച് റോയിട്ടേഴ്സ് റിപ്പോര്‍ട്ട് ചെയ്തത്.

അതേസമയം, ഇറാനുമായി ആണവ കരാറിന് ഉടന്‍ സാധ്യതയുണ്ടെന്നും ഇറാനും ഇസ്രായേലും തമ്മിലുള്ള സംഘര്‍ഷത്തില്‍ ഒരു നയതന്ത്ര പരിഹാരമുണ്ടാകുമെന്നും ഡൊണാള്‍ഡ് ട്രംപ് കാനഡയില്‍ അറിയിച്ചു. ജി7 ഉച്ചകോടിക്ക് ശേഷം മടങ്ങിയെത്തിയാല്‍ ഇത് നടക്കുമെന്നും ഇറാന്‍ അംഗീകരിച്ചില്ലെങ്കില്‍ അത് വിഡ്ഢിത്തമാകുമെന്നും ട്രംപ് പ്രതികരിച്ചു. ഇറാന്‍ ആണവായുധം നിര്‍മിക്കുന്നത് തടയുകയാണ് തന്റെ ലക്ഷ്യം. ഈ പ്രതിസന്ധി ഇറാന്‍ വരുത്തിവെച്ചതാണെന്നും അവരെ പലതവണ ഉപദേശിച്ചതാണെന്നും ട്രംപ് കൂട്ടിച്ചേര്‍ത്തു. ജി7 രാജ്യങ്ങളുടെ സംയുക്ത പ്രസ്താവനയില്‍ അമേരിക്ക ഒപ്പ് വെക്കില്ലെങ്കിലും, ഇറാന്‍-ഇസ്രായേല്‍ സംഘര്‍ഷം അവസാനിപ്പിക്കാന്‍ പ്രസിഡന്റ് ട്രംപ് ശ്രമിച്ചു വരികയാണെന്നും വൈറ്റ് ഹൗസ് വ്യക്തമാക്കി.

ഇതിനിടെ, യുഎസ് പൗരന്മാര്‍ ഇസ്രായേലിലേക്ക് യാത്ര ചെയ്യരുതെന്ന് സ്റ്റേറ്റ് ഡിപ്പാര്‍ട്ട്‌മെന്റ് നിര്‍ദേശം നല്‍കി. ലെവല്‍ 4 (Do Not Travel) മുന്നറിയിപ്പ് നിലവില്‍ വന്നു. അമേരിക്കയില്‍ നിന്ന് ഇസ്രായേലിലേക്കുള്ള സര്‍വീസുകള്‍ എയര്‍ലൈനുകള്‍ നിര്‍ത്തലാക്കിയിട്ടുണ്ട്.

ഈ നിർണായക വാർത്ത നിങ്ങളുടെ സുഹൃത്തുക്കളുമായി പങ്കുവെച്ച് അഭിപ്രായം അറിയിക്കുക.

Article Summary: Trump warns Tehran to evacuate amid escalating Israel-Iran tensions; urges nuclear deal.

#Tehran #Trump #IranIsraelConflict #NuclearDeal #USWarning #MiddleEast