ടെൽ അവീവ്: (KVARTHA) ഇസ്രാഈൽ പ്രധാനമന്ത്രി ബെഞ്ചമിൻ നെതന്യാഹു പ്രോസ്റ്റേറ്റ് ഗ്രന്ഥി നീക്കം ചെയ്യുന്ന ശസ്ത്രക്രിയ വിജയകരമായി പൂർത്തിയാക്കിയെന്നും അദ്ദേഹത്തിന്റെ ആരോഗ്യനില തൃപ്തികരമാണെന്നും ആശുപത്രി അധികൃതർ അറിയിച്ചു. ഗസ്സയിലെ സ്ഥിഗതികൾ രൂക്ഷമായി തുടരുന്നതിനിടയിലും അഴിമതി ആരോപണങ്ങളുടെ വിചാരണ പുരോഗമിക്കുന്നതിനിടയിലുമാണ് ഈ ശസ്ത്രക്രിയ. 

ഇസ്രാഈലിന്റെ ചരിത്രത്തിൽ ഏറ്റവും കൂടുതൽ കാലം പ്രധാനമന്ത്രി പദം അലങ്കരിച്ച വ്യക്തിയാണ് 75 കാരനായ നെതന്യാഹു. എന്നാൽ കഴിഞ്ഞ കുറച്ചു വർഷങ്ങളായി അദ്ദേഹത്തിന് പല ആരോഗ്യ പ്രശ്നങ്ങളും ഉണ്ടായിട്ടുണ്ട്. പ്രോസ്റ്റേറ്റ് ഗ്രന്ഥിയുമായി ബന്ധപ്പെട്ട പ്രശ്നങ്ങളെ തുടർന്നാണ് നെതന്യാഹുവിനെ ശസ്ത്രക്രിയക്ക് വിധേയനാക്കിയത്. 

ജറുസലേമിലെ ഹദാസ്സ മെഡിക്കൽ സെന്ററിൽ വെച്ചായിരുന്നു ശസ്ത്രക്രിയ. നെതന്യാഹു പൂർണ ബോധവാനാണെന്നും ആരോഗ്യനില തൃപ്തികരമാണെന്നും അദ്ദേഹത്തിന്റെ ഓഫീസ് അറിയിച്ചു. ഹെർണിയ ശസ്ത്രക്രിയയും പേസ് മേക്കർ സ്ഥാപിക്കുന്നതിനുള്ള ശസ്ത്രക്രിയയും ഉൾപ്പെടെ ഈ വർഷം അദ്ദേഹത്തിന് ഇത് മൂന്നാമത്തെ ശസ്ത്രക്രിയയാണ്. ഇതിനു മുൻപും അദ്ദേഹത്തിന് ഹൃദയസംബന്ധമായ ചില ബുദ്ധിമുട്ടുകൾ ഉണ്ടായിരുന്നു. 

ശസ്ത്രക്രിയ വിജയകരമായിരുന്നുവെന്നും അദ്ദേഹത്തിന്റെ ആരോഗ്യത്തെക്കുറിച്ച് ആശങ്കപ്പെടാനില്ലെന്നും ഹദാസ്സ മെഡിക്കൽ സെന്ററിലെ യൂറോളജി വിഭാഗം മേധാവി വീഡിയോ പ്രസ്താവനയിൽ അറിയിച്ചു. നിലവിൽ നെതന്യാഹുവിനെ നിരീക്ഷണത്തിനായി ആശുപത്രിയിലെ പ്രത്യേക വിഭാഗത്തിലേക്ക് മാറ്റിയിരിക്കുകയാണ്. കുറച്ചു ദിവസങ്ങൾ അദ്ദേഹം അവിടെ നിരീക്ഷണത്തിൽ തുടരും. അദ്ദേഹത്തിന്റെ സുരക്ഷ ഉറപ്പാക്കുന്നതിനുള്ള എല്ലാ ക്രമീകരണങ്ങളും ആശുപത്രിയിൽ ഒരുക്കിയിട്ടുണ്ട്.

അഴിമതി കേസിൽ ഈ ആഴ്ച നെതന്യാഹുവിന്റെ സാക്ഷി വിസ്താരം നടക്കാനിരിക്കുകയായിരുന്നു. ശസ്ത്രക്രിയക്ക് ശേഷമുള്ള വിശ്രമം ആവശ്യമായതിനാൽ അദ്ദേഹത്തിന്റെ അഭിഭാഷകൻ കോടതിയിൽ ഹാജരാകുന്നതിൽ നിന്നും ഒഴിവാകാൻ അപേക്ഷ നൽകിയിട്ടുണ്ട്. കൈക്കൂലി, വഞ്ചന, വിശ്വാസവഞ്ചന തുടങ്ങിയ ആരോപണങ്ങളാണ് അദ്ദേഹത്തിനെതിരെ നിലവിലുള്ളത്. എന്നാൽ നെതന്യാഹു ഈ ആരോപണങ്ങളെല്ലാം നിഷേധിച്ചിട്ടുണ്ട്. നീതിന്യായ മന്ത്രി യാരിവ് ലെവിൻ ആക്ടിംഗ് പ്രധാനമന്ത്രിയായി ചുമതലയേറ്റിട്ടുണ്ട്.

നെതന്യാഹുവിന്റെ ശസ്ത്രക്രിയ വാർത്ത പുറത്തുവരുന്നത്, വടക്കൻ ഗസ്സയിലെ അവസാനത്തെ പ്രധാന ആശുപത്രി ഇസ്രാഈൽ സൈന്യം റെയ്ഡ് ചെയ്തതിന് ശേഷമാണ്. ആശുപത്രി ഡയറക്ടറെ അറസ്റ്റ് ചെയ്യുകയും ചെയ്തു. ഒക്ടോബർ ഏഴിന് ശേഷം ഇതുവരെ 45,400 ഫലസ്തീനികൾ കൊല്ലപ്പെടുകയും 108,000-ൽ അധികം പേർക്ക് പരിക്കേൽക്കുകയും ചെയ്തിട്ടുണ്ട്.

#netanyahu #israel #surgery #health #gaza #middleeast #politics #news