കോഴിക്കോട്: (KVARTHA) സാമൂഹിക മാധ്യമ നിരോധനത്തിനെതിരെ നേപ്പാളിൽ ഉടലെടുത്ത പ്രക്ഷോഭത്തെത്തുടർന്ന് കേരളത്തിൽനിന്നും പോയ നിരവധി വിനോദ സഞ്ചാരികൾ യാത്രമധ്യേ കുടുങ്ങി. കോഴിക്കോട് ജില്ലയിലെ കൊടുവള്ളി, മുക്കം, കൊടിയത്തൂർ എന്നിവിടങ്ങളിൽ നിന്ന് നേപ്പാളിലേക്ക് പോയ 40ഓളം വിനോദ സഞ്ചാരികളാണ് കാഠ്മണ്ഡുവിന് സമീപം കുടുങ്ങിയത്. നിലവിൽ ഗോസാല എന്ന സ്ഥലത്താണ് ഇവർ ഉള്ളത്.

ഞായറാഴ്ചയാണ് മലയാളി സംഘം നേപ്പാളിൽ എത്തിയത്. കാഠ്മണ്ഡുവിലേക്ക് പോകുന്നതിനിടെയാണ് സംഘർഷത്തെക്കുറിച്ച് ഇവർ അറിയുന്നത്. റോഡിൽ ടയർ ഇട്ട് കത്തിച്ചുള്ള പ്രക്ഷോഭം തുടരുന്നതിനാൽ ഇവർക്ക് മുന്നോട്ട് പോകാൻ കഴിഞ്ഞിട്ടില്ല. സംഘർഷം രൂക്ഷമായതോടെ യാത്ര പ്രതിസന്ധിയിലായെന്ന് കുടുങ്ങിയ മലയാളികൾ പറഞ്ഞു.

നേപ്പാൾ സർക്കാർ സാമൂഹിക മാധ്യമങ്ങൾക്കുള്ള നിരോധനം പിൻവലിച്ചെങ്കിലും രാജ്യത്തെ സംഘർഷങ്ങൾക്ക് ഇപ്പോഴും അയവില്ല. വിവിധ നഗരങ്ങളിൽ ഇപ്പോഴും സംഘർഷാവസ്ഥ തുടരുകയാണ്. ഇത് വിനോദ സഞ്ചാരികളടക്കമുള്ളവർക്ക് വലിയ ബുദ്ധിമുട്ടാണ് ഉണ്ടാക്കുന്നത്. തങ്ങളുടെ യാത്രാസംഘം സുരക്ഷിതരാണെന്നും, അധികൃതരുമായി ബന്ധപ്പെട്ട് മുന്നോട്ടുള്ള വഴി കണ്ടെത്താൻ ശ്രമിക്കുകയാണെന്നും കുടുങ്ങിയ മലയാളികൾ അറിയിച്ചു.

നേപ്പാളിലെ ഇപ്പോഴത്തെ സാഹചര്യത്തെക്കുറിച്ച് നിങ്ങൾക്ക് എന്തു തോന്നുന്നു?

Article Summary: Kerala tourists are stranded in Nepal due to ongoing protests.

#NepalProtests #MalayaliTourists #Kathmandu #SocialMediaBan #KeralaNews #TravelAdvisory