ടെൽ അവീവ്: (KVARTHA) സൊറോക ആശുപത്രി ആക്രമണത്തിന് ഇറാൻ കനത്ത വില നൽകേണ്ടിവരുമെന്ന് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു മുന്നറിയിപ്പ് നൽകി. സൊറോക ആശുപത്രി സന്ദർശിച്ച ശേഷം, പരമോന്നത നേതാവ് ആയത്തുല്ല അലി ഖമേനിയുൾപ്പെടെ ഇറാനിൽ ആരും സുരക്ഷിതരല്ലെന്ന് നെതന്യാഹു ഭീഷണി മുഴക്കി. ഇറാന്റെ ആണവപദ്ധതികളെ മുച്ചൂടും മുടിക്കുമെന്നും അദ്ദേഹം ആവർത്തിച്ചു. ആശുപത്രി ആക്രമണത്തെ റെഡ് ക്രോസ് ശക്തമായി അപലപിച്ചു.

അതിനിടെ, സയണിസ്റ്റുകളെ അനുകൂലിച്ച് അമേരിക്ക സംഘർഷത്തിൽ ഇടപെട്ടാൽ അവരെ പാഠം പഠിപ്പിക്കുമെന്ന് ഇറാൻ വിദേശകാര്യ സഹമന്ത്രി സയീദ് ഖതിബ് സദേഹ് മുന്നറിയിപ്പ് നൽകി. ഇത് അമേരിക്കയുടെ യുദ്ധമല്ലെന്നും അദ്ദേഹം കൂട്ടിച്ചേർത്തു.

'ഇസ്രയേലിനെ തകർക്കണമെന്നത് യുദ്ധലക്ഷ്യമാണെന്ന് ഖമേനി തുറന്നുപ്രഖ്യാപിച്ചിരിക്കുന്നു. ആശുപത്രികളെ ആക്രമിക്കാൻ വ്യക്തിപരമായി ഉത്തരവിട്ടു. അങ്ങനെയൊരാളെ ജീവനോടെയിരിക്കാൻ അനുവദിക്കില്ല,' ഇസ്രയേൽ കാറ്റ്സ് പ്രതികരിച്ചു.

സൊറോക ആശുപത്രിയെക്കുറിച്ച്

തെക്കൻ ഇസ്രയേലിലെ ഏറ്റവും വലിയ ആശുപത്രിയാണിത്. ഇവിടെ 1000 കിടക്കകളുണ്ട്. മേഖലയിലെ 10 ലക്ഷം ആളുകളുടെ പ്രധാന ആശ്രയമാണിത്. ആക്രമണസാധ്യത മുൻനിർത്തി സമീപകാലത്ത് ഇസ്രയേലിലെ മിക്ക ആശുപത്രികളും അണ്ടർഗ്രൗണ്ട് പാർക്കിങ്ങിനുപയോഗിച്ചിരുന്ന ഇടങ്ങൾ രോഗികളെ കിടത്താനുള്ള മുറികളാക്കി മാറ്റിയിരുന്നു.

ജനീവയിൽ അടിയന്തര യോഗം

സംഘർഷം പരിഹരിക്കാനുള്ള സാധ്യത തേടി യൂറോപ്യൻ രാജ്യങ്ങൾ വെള്ളിയാഴ്ച സ്വിറ്റ്സർലൻഡിലെ ജനീവയിൽ അടിയന്തര യോഗം ചേരും. ഇറാന്റെ വിദേശകാര്യമന്ത്രി അബ്ബാസ് അറഖ്ചി യോഗത്തിൽ പങ്കെടുക്കും. യുഎസ് ഭരണകൂടത്തിന്റെ പിന്തുണയോടെയാണ് യോഗമെങ്കിലും, യുഎസ് പ്രതിനിധികൾ പങ്കെടുക്കില്ല.

ഇറാൻ-ഇസ്രയേൽ സംഘർഷത്തിലെ മറ്റ് വിവരങ്ങൾ

ഇറാനിൽ ഇതുവരെ 639 പേർ മരിച്ചെന്നും അതിൽ 263 പേർ സാധാരണക്കാരാണെന്നും യുഎസ് മനുഷ്യാവകാശ സംഘടനയായ ഹ്യൂമൻ റൈറ്റ്സ് ഗ്രൂപ്പ് അറിയിച്ചു. ഇറാന്റെ 20 സേനാത്താവളങ്ങൾ ആക്രമിച്ചെന്ന് ഇസ്രയേൽ പ്രതിരോധ സേന അവകാശപ്പെട്ടു. യുഎസ് ഇറാനെ ആക്രമിക്കരുതെന്ന് ആവശ്യപ്പെട്ട് വൈറ്റ് ഹൗസിന് മുന്നിൽ പ്രതിഷേധം നടന്നു. അഭിപ്രായ സർവേകളിലും ഭൂരിഭാഗം പേരും യുദ്ധം ആഗ്രഹിക്കുന്നില്ലെന്ന് പറഞ്ഞു. ചൈനയും ഇന്തോനേഷ്യയും ഇസ്രയേലിൽ നിന്ന് പൗരന്മാരെ ഒഴിപ്പിച്ചു. ടെൽ അവീവ്, രാമത് ഗാൻ, ഹൂളൻ എന്നിവിടങ്ങളിലെ ബഹുനിലക്കെട്ടിടങ്ങൾക്കും പാർപ്പിടസമുച്ചയങ്ങൾക്കും നേരെ ഇറാൻ ആക്രമണം നടത്തി. ഇരുനൂറിലേറെപ്പേർക്ക് പരിക്കേറ്റു. വ്യാഴാഴ്ച ഇറാൻ തൊടുത്ത ഇരുപതോളം മിസൈലുകളിൽ അഞ്ചെണ്ണം ഇസ്രയേലിന്റെ അയൺ ഡോമിന് പ്രതിരോധിക്കാനായില്ല. കൃത്യമായ മുന്നൊരുക്കമോ തന്ത്രങ്ങളോ ഇല്ലാതെ ഇസ്രയേൽ-ഇറാൻ സംഘർഷത്തിൽ ട്രംപ് എടുത്തുചാടിയേക്കുമോ എന്ന കാര്യത്തിൽ കടുത്ത ആശങ്കയിലാണെന്ന് പറഞ്ഞ് ചക് ഷൂമറുടെ നേതൃത്വത്തിൽ ഡെമോക്രാറ്റിക് സെനറ്റർമാർ സംയുക്ത പ്രസ്താവനയിറക്കി.

അറാക് ആണവകേന്ദ്രം

ടെഹ്‌റാനിൽ നിന്ന് 250 കിലോമീറ്റർ അകലെയാണ് വ്യാഴാഴ്ച ഇസ്രയേൽ ആക്രമിച്ച ഖോണ്ഡാബിലെ അറാക് ആണവ റിയാക്ടർ. ഇവിടെ അണുവികിരണം ഉണ്ടായിട്ടില്ലെന്നാണ് റിപ്പോർട്ട്. ഘനജലമുപയോഗിച്ചാണ് ഇവിടെ ആണവ റിയാക്ടറുകളെ തണുപ്പിക്കുന്നത്. ഈ പ്രക്രിയയിൽ ഉപോത്പന്നമായി ലഭിക്കുന്ന പ്ലൂട്ടോണിയം ആണവായുധമുണ്ടാക്കുന്നതിൽ യുറേനിയത്തിനു ബദലായി ഉപയോഗിക്കാം. 60 ശതമാനം പരിശുദ്ധിയിൽ യുറേനിയം സമ്പുഷ്ടീകരിക്കുന്ന, ആണവായുധമില്ലാത്ത ഏക രാജ്യമാണ് ഇറാൻ.

അതേസമയം, യുഎസിന്റെയും മറ്റ് പാശ്ചാത്യരാജ്യങ്ങളുടെയും പിന്തുണയോടെ പ്രവർത്തിക്കുന്ന ഇസ്രയേൽ പശ്ചിമേഷ്യയുടെ സമാധാനത്തിനു ഭീഷണിയായ കാൻസറാണെന്ന് ഉത്തരകൊറിയ കുറ്റപ്പെടുത്തി. ആണവപദ്ധതിയുമായി ബന്ധപ്പെട്ട് അന്താരാഷ്ട്ര ഉപരോധം നേരിടുന്ന രാജ്യങ്ങളായ ഉത്തര കൊറിയയും ഇറാനും തമ്മിൽ 1973 മുതൽ നയതന്ത്രബന്ധമുണ്ട്.

ഇസ്രയേലിൽ നിന്ന് യുഎസ് നയതന്ത്ര ഉദ്യോഗസ്ഥരെ ഒഴിപ്പിച്ചു

ജറുസലേമിലെ യുഎസ് സ്ഥാനപതി കാര്യാലയത്തിൽ നിന്ന് അധിക നയതന്ത്ര ഉദ്യോഗസ്ഥരെയും അവരുടെ കുടുംബാംഗങ്ങളെയും യുഎസ് ഒഴിപ്പിച്ചു. ജോർദാനും ഈജിപ്തും വഴിയാണ് ഇവരെ നാട്ടിലെത്തിച്ചത്. അമേരിക്കൻ പൗരന്മാരെ കടൽ, വ്യോമമാർഗം ഒഴിപ്പിക്കാനുള്ള നടപടി തുടങ്ങിയിട്ടുണ്ടെന്ന് ഇസ്രയേലിലെ യുഎസ് സ്ഥാനപതി മൈക്ക് ഹക്കാബി പറഞ്ഞു.

ഇസ്രയേൽ-ഇറാൻ സംഘർഷം ലോക സമാധാനത്തെ എങ്ങനെ ബാധിക്കുമെന്ന് നിങ്ങൾ കരുതുന്നു? അഭിപ്രായങ്ങൾ പങ്കുവെക്കുക.

Article Summary: Netanyahu warns Iran will pay for hospital attack; Iran threatens US if it intervenes in the conflict.

#IsraelIranConflict #MiddleEastCrisis #Netanyahu #IranThreat #USIntervention #GlobalPolitics