വാഷിംഗ്ടണ്‍: (KVARTHA) അമേരിക്കൻ പ്രസിഡന്റ് ട്രംപ് എച്ച്1ബി വിസ അപേക്ഷ ഫീസ് കുത്തനെ വർധിപ്പിച്ചു. ഫീസ് ഒരു ലക്ഷം ഡോളർ ആയി ഉയർത്തിയാണ് ട്രംപ് ഭരണകൂടം ഉത്തരവിറക്കിയത്. നിലവിൽ 1700നും 4500 ഡോളറിനും ഇടയിലാണ് എച്ച്1ബി വിസ ഫീസ്. ടെക് കമ്പനികൾക്ക് ഇത് വൻ തിരിച്ചടിയാകുമെന്നാണ് വിലയിരുത്തൽ.

ഇന്ത്യൻ ഐടി പ്രൊഫഷണലുകൾക്കും ചെറുകിട കമ്പനികൾക്കും താങ്ങാനാകാത്ത ഫീസ് ആണിത്. അതേസമയം, ടെക്നോളജി രംഗത്ത് അമേരിക്കക്കാർക്ക് അവസരങ്ങൾ വർധിപ്പിക്കാനുള്ള നടപടിയാണിതെന്ന് ട്രംപ് പ്രതികരിച്ചു. വൈദഗ്ധ്യം ആവശ്യമുള്ള തൊഴിൽ മേഖലകളിൽ വിദേശ തൊഴിലാളികളെ നിയമിക്കാൻ അനുവദിക്കുന്ന നോൺ-ഇമിഗ്രന്റ് വിസയാണ് എച്ച്1ബി വിസ. വിവരസാങ്കേതികവിദ്യ, എഞ്ചിനീയറിംഗ്, ശാസ്ത്രം, ഫിനാൻസ്, വൈദ്യശാസ്ത്രം തുടങ്ങിയ തൊഴിൽ മേഖലകളിലാണ് ഇത് ഉപയോഗിക്കുന്നത്.

അതിനിടെ, എച്ച്1ബി വിസകൾ ഏറ്റവും കൂടുതൽ ലഭിക്കുന്നത് ഇന്ത്യക്കാർക്കാണ്. 2020 മുതൽ 2023 വരെയുള്ള കാലയളവിൽ അനുവദിച്ച എച്ച്1ബി വിസകളുടെ 73 ശതമാനവും ഇന്ത്യക്കാർക്കായിരുന്നു. അതിനാൽ, ഫീസ് വർദ്ധന ഇന്ത്യക്കാർക്ക് കനത്ത തിരിച്ചടിയാകും. വിസക്ക് തൊഴിലുടമയാണ് അപേക്ഷിക്കേണ്ടത്. തൊഴിലാളികൾക്ക് നേരിട്ട് ഇത് അപേക്ഷിക്കാൻ കഴിയില്ല. യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസിൽ ആണ് ഇതിനായുള്ള അപേക്ഷ സമർപ്പിക്കേണ്ടത്.

മയക്കുമരുന്ന് കടത്ത്: ചില ഇന്ത്യക്കാരുടെ വിസ റദ്ദാക്കി

ഇതിനിടെ, കഴിഞ്ഞ ദിവസം സിന്തറ്റിക് ഒപിയോയിഡ് (Synthetic Opioid) വിഭാഗത്തിൽപ്പെട്ട ഫെന്റാനൈൽ കടത്തുമായി ബന്ധമുണ്ടെന്ന് സംശയിച്ച് ചില ഇന്ത്യൻ വ്യവസായികളുടെയും കോർപ്പറേറ്റ് തലവൻമാരുടെയും കുടുംബാംഗങ്ങളുടെയും വിസ അമേരിക്ക റദ്ദാക്കി. അപകടകരമായ സിന്തറ്റിക് മയക്കുമരുന്നുകളിൽ നിന്ന് അമേരിക്കക്കാരെ സുരക്ഷിതരാക്കാനുള്ള ശ്രമങ്ങളുടെ ഭാഗമായാണ് ട്രംപ് ഭരണകൂടത്തിന്റെ ഈ നിർണായക തീരുമാനമെന്ന് ദില്ലിയിലെ അമേരിക്കൻ എംബസി വാർത്താക്കുറിപ്പിൽ അറിയിച്ചു.

മാരക കെമിക്കൽ മയക്കുമരുന്നുകളുടെ ഉപയോഗം കുറയ്ക്കുക എന്ന ലക്ഷ്യമിട്ടുള്ള നീക്കത്തിന്റെ ഭാഗമായാണ് ഈ നടപടിയെന്നാണ് വിശദീകരണം. ഇത്തരക്കാർക്ക് ഭാവിയിൽ യു.എസിലേക്ക് പ്രവേശനം നിഷേധിക്കും. എന്നാൽ ആരുടെയെല്ലാം വിസയാണ് റദ്ദാക്കിയതെന്ന പേരുവിവരങ്ങൾ അമേരിക്ക പുറത്തുവിട്ടിട്ടില്ല. മയക്കുമരുന്ന് കടത്ത് തടയുന്നതിനുള്ള ട്രംപ് ഭരണകൂടത്തിന്റെ ശ്രമങ്ങളുടെ ഭാഗമായാണ് ഈ നടപടികൾ. അനധികൃതമായി മയക്കുമരുന്ന് ഉൽപാദിപ്പിക്കുകയും കടത്തുകയും ചെയ്യുന്ന വ്യക്തികൾക്കും സ്ഥാപനങ്ങൾക്കും അവരുടെ കുടുംബങ്ങൾക്കും യു.എസിലേക്ക് പ്രവേശനം നിഷേധിക്കുന്നതുൾപ്പെടെയുള്ള പ്രത്യാഘാതങ്ങൾ നേരിടേണ്ടി വരുമെന്ന് യു.എസ്. എംബസി വ്യക്തമാക്കി.
 

എച്ച്1ബി വിസ ഫീസ് വർദ്ധനയെക്കുറിച്ച് നിങ്ങളുടെ അഭിപ്രായം എന്താണ്? കമന്റ് ചെയ്യുക.

Article Summary: U.S. President Donald Trump hikes H1B visa fees.

#H1BVisa #DonaldTrump #USVisa #ITProfessionals #IndianIT #VisaFeeHike