സോൾ: (KVARTHA) ബാങ്കോക്കിൽ നിന്ന് പറന്നുയർന്ന ജെജു എയർ വിമാനം ദക്ഷിണ കൊറിയയിലെ മുവാൻ അന്താരാഷ്ട്ര വിമാനത്താവളത്തിൽ അടിയന്തര ലാൻഡിംഗിനിടെ തകർന്ന് 179 പേർ മരിച്ചതായി അധികൃതർ അറിയിച്ചു. വിമാനത്തിലുണ്ടായിരുന്ന 181 യാത്രക്കാരിൽ രണ്ടുപേർ മാത്രമാണ് രക്ഷപ്പെട്ടതെന്ന് യോൺഹാപ് ന്യൂസ് റിപ്പോർട്ട് ചെയ്യുന്നു. ഞായറാഴ്ച രാവിലെ പ്രാദേശിക സമയം 9:03 ഓടെയാണ് അപകടം സംഭവിച്ചത്. ലാൻഡിംഗ് ഗിയർ തകരാറിലായതിനെ തുടർന്ന് വിമാനം ഇടിച്ചിറക്കാൻ ശ്രമിക്കുകയായിരുന്നു.

രക്ഷാപ്രവർത്തകർ വിമാനത്തിൻ്റെ അവശിഷ്ടങ്ങൾക്കിടയിൽ കൂടുതൽ മൃതദേഹങ്ങൾക്കായി തിരച്ചിൽ തുടരുകയാണ്. പിറകിൽ നിന്ന് രക്ഷപ്പെടുത്തിയ ഒരു യാത്രക്കാരനും ഒരു ജീവനക്കാരനും സമീപത്തെ ആശുപത്രിയിൽ ചികിത്സയിലാണ്. ബോയിംഗ് 737-800 വിമാനമാണ് അപകടത്തിൽപ്പെട്ടത്. വിമാനം എയർപോർട്ടിന്റെ മതിലിൽ ഇടിച്ചു രണ്ടായി പിളർന്ന് തീപിടിക്കുകയായിരുന്നുവെന്ന് ദൃക്സാക്ഷികൾ പറയുന്നു. വിമാനം താഴേക്ക് ഇറങ്ങുമ്പോൾ പക്ഷി ഇടിക്കുന്നതിന്റെ ദൃശ്യങ്ങൾ പ്രാദേശിക ചാനലായ എംബിസി സംപ്രേക്ഷണം ചെയ്തിട്ടുണ്ട്. അപകടത്തിന്റെ കാരണം അന്വേഷിച്ചു കൊണ്ടിരിക്കുകയാണ്.

മരണസംഖ്യ സ്ഥിരീകരിക്കുകയാണെങ്കിൽ, ഇത് ദക്ഷിണ കൊറിയയുടെ ചരിത്രത്തിലെ ഏറ്റവും വലിയ ആഭ്യന്തര വിമാന ദുരന്തമായിരിക്കും. കൂടാതെ രാജ്യത്തെ ഒരു കുറഞ്ഞ നിരക്കിൽ സർവീസ് നടത്തുന്ന ഒരു  വിമാനക്കമ്പനി ഉൾപ്പെടുന്ന ആദ്യത്തെ വലിയ അപകട സംഭവവുമാണിത് എന്ന് ജോങ്ആങ് ഇൽബോ റിപ്പോർട്ട് ചെയ്യുന്നു. 1993 ൽ മൊക്പോയിൽ ഏഷ്യാന എയർലൈൻസ് വിമാനം തകർന്ന് 68 പേരും 2002 ൽ ഗിംഹേ വിമാനത്താവളത്തിന് സമീപം എയർ ചൈന വിമാനം തകർന്ന് 129 പേരും മരിച്ചിരുന്നു. ഇതിനു ശേഷം കൊറിയയിൽ നടക്കുന്ന ഏറ്റവും വലിയ വിമാന ദുരന്തമാണിത്.

#planecrash #SouthKorea #aviation #disaster #accident #emergencylanding