വാഷിംഗ്ടൺ: (KVARTHA) ലോസ് ഏഞ്ചൽസിൽ കാട്ടുതീ അതിരൂക്ഷമായി പടർന്നുപിടിക്കുന്നു. ഇതുവരെ 11 പേർക്ക് ജീവൻ നഷ്ടപ്പെടുകയും നൂറുകണക്കിന് കെട്ടിടങ്ങൾ അഗ്നിക്കിരയാവുകയും ചെയ്തതോടെ നഗരം ദുരിതത്തിലാണ്ടു. രണ്ട് ലക്ഷത്തോളം ആളുകളെ സുരക്ഷിത സ്ഥാനങ്ങളിലേക്ക് മാറ്റാൻ അധികൃതർ നിർദേശം നൽകിയിട്ടുണ്ട്. അഗ്നിശമന സേനയുടെ തീവ്ര ശ്രമങ്ങൾക്കിടയിലും തീ നിയന്ത്രണവിധേയമാക്കാൻ സാധിച്ചിട്ടില്ല. കാലാവസ്ഥാ വ്യതിയാനവും അതിന്റെ കെടുതികളും സ്ഥിതിഗതികൾ കൂടുതൽ വഷളാക്കുമെന്നാണ് വിദഗ്ധരുടെ മുന്നറിയിപ്പ്.

തീവ്രതയുടെ 3 കാരണങ്ങൾ

1 - വരൾച്ചയുടെ കരിനിഴൽ: 

ലോസ് ഏഞ്ചൽസിലെ കാട്ടുതീയുടെ പ്രധാന കാരണങ്ങളിലൊന്ന് ശക്തമായ വരൾച്ചയാണ്. കടുത്ത വരൾച്ച കാരണം മരങ്ങളും ചെടികളും ഉണങ്ങി കരിഞ്ഞുണങ്ങിയ അവസ്ഥയിലാണ്. ഇത് തീ പെട്ടെന്ന് പടർന്നുപിടിക്കാൻ സഹായകമായി. തീപിടിത്തത്തിന്റെ യഥാർത്ഥ കാരണം ഇപ്പോഴും അന്വേഷണത്തിലാണ്. കാലിഫോർണിയ ഫയർ സർവീസ് ബറ്റാലിയൻ ചീഫ് ഡേവിഡ് അക്യുനയുടെ അഭിപ്രായത്തിൽ, ഈ മേഖലയിലെ 95% കാട്ടുതീയും മനുഷ്യരുടെ ഇടപെടൽ മൂലമാണ് ഉണ്ടാകുന്നത്. എന്നിരുന്നാലും, ഈ പ്രത്യേക തീപിടുത്തം എങ്ങനെയാണ് ആരംഭിച്ചതെന്ന് ഇതുവരെ സ്ഥിരീകരിക്കാനായിട്ടില്ല.

2- കാലാവസ്ഥാ വ്യതിയാനത്തിന്റെ കളി:

ശക്തമായ കാറ്റും മഴയുടെ കുറവും ഇപ്പോഴത്തെ തീപിടിത്തത്തിന് കാരണമാണെങ്കിലും, കാലാവസ്ഥാ വ്യതിയാനം സ്ഥിതിഗതികൾ കൂടുതൽ രൂക്ഷമാക്കുന്നു എന്ന് വിദഗ്ദ്ധർ അഭിപ്രായപ്പെടുന്നു. കാലാവസ്ഥാ വ്യതിയാനം മൂലം തീപിടിത്തത്തിനുള്ള സാധ്യത വർധിച്ചു വരികയാണ്. യുഎസ് ഗവൺമെൻ്റിന്റെ പഠനങ്ങൾ പടിഞ്ഞാറൻ അമേരിക്കയിലെ വൻ കാട്ടുതീക്ക് കാലാവസ്ഥാ വ്യതിയാനവുമായി ബന്ധമുണ്ടെന്ന് വ്യക്തമാക്കുന്നു. യുഎസ് ഓഷ്യൻ ആൻഡ് അറ്റ്മോസ്ഫെറിക് അഡ്മിനിസ്ട്രേഷന്റെ റിപ്പോർട്ടുകൾ പ്രകാരം, വർദ്ധിച്ച ചൂട്, നീണ്ട വരൾച്ച, വരണ്ട അന്തരീക്ഷം എന്നിവ കാലാവസ്ഥാ വ്യതിയാനത്തിന്റെ ഫലമായി പടിഞ്ഞാറൻ യുണൈറ്റഡ് സ്റ്റേറ്റ്സിൽ കാട്ടുതീയുടെ അപകടസാധ്യതയും വ്യാപനവും വർദ്ധിപ്പിക്കുന്നു. 

കാലിഫോർണിയയിൽ കടുത്ത വേനൽക്കാലവും സമീപ മാസങ്ങളിൽ മഴയുടെ കുറവും സ്ഥിതിഗതികൾ കൂടുതൽ വഷളാക്കി. തെക്കൻ കാലിഫോർണിയയിലെ തീപിടുത്ത സീസൺ സാധാരണയായി മെയ് മുതൽ ഒക്ടോബർ വരെയാണ്. എന്നാൽ ഇപ്പോൾ വർഷം മുഴുവനും തീപിടുത്തം ഒരു പ്രശ്നമായി മാറിയെന്ന് സംസ്ഥാന ഗവർണർ ഗാവിൻ ന്യൂസോം പറയുന്നു. 'തീക്ക് കാലമില്ല, വർഷം മുഴുവനും തീയുണ്ട്', അദ്ദേഹം കൂട്ടിച്ചേർത്തു. കഴിഞ്ഞ 30 വർഷത്തിനിടയിലെ ജനുവരി മാസത്തിൽ ഉണ്ടായ മൂന്നാമത്തെ വലിയ തീപിടുത്തമാണ് ഇപ്പോഴത്തേതെന്ന് കാലിഫോർണിയ ഫയർ സർവീസ് ബറ്റാലിയൻ ചീഫ് ഡേവിഡ് അക്യുന ബിബിസിയോട് വെളിപ്പെടുത്തി.

3 - സാന്താ അന കാറ്റിന്റെ ദുശ്ശക്തി:

തീ കൂടുതൽ ശക്തമായി പടർത്തുന്നതിൽ 'സാന്താ അന' കാറ്റിന് വലിയ പങ്കുണ്ട്. കിഴക്ക് അല്ലെങ്കിൽ വടക്ക്-കിഴക്ക് ദിശയിൽ നിന്ന് യുഎസ് തീരത്തേക്ക് വീശുന്ന ഈ കാറ്റ് മണിക്കൂറിൽ 100 ​​കിലോമീറ്ററിലധികം വേഗതയിൽ വീശാൻ സാധ്യതയുണ്ട്. സാന്താ അന കാറ്റ് വർഷത്തിൽ പല തവണ വീശാറുണ്ട്. ലോസ് ഏഞ്ചൽസിലും തെക്കൻ കാലിഫോർണിയയുടെ ചില ഭാഗങ്ങളിലും ഈ കാറ്റ് ദൈനംദിന ജീവിതത്തെ തടസ്സപ്പെടുത്താറുണ്ട്. 

കാട്ടുതീയുടെ സാഹചര്യത്തിൽ ഈ കാറ്റ് കൂടുതൽ വിനാശകരമാവുന്നു. സാധാരണയായി സെപ്റ്റംബർ അവസാനം മുതൽ മെയ് വരെയാണ് ഈ കാറ്റ് വീശുന്നത്. കുറച്ചു ദിവസത്തേക്ക് മാത്രം വീശുന്ന ഈ കാറ്റ് ചിലപ്പോൾ ആഴ്ചകളോളം നീണ്ടുനിൽക്കാം. മണിക്കൂറിൽ 60 മുതൽ 80 മൈൽ വരെയാണ് സാധാരണ വേഗത, എന്നാൽ ചില അവസരങ്ങളിൽ ഇത് മണിക്കൂറിൽ 100 ​​മൈൽ വരെ എത്താം. ഈ കാറ്റ് തീയുടെ വ്യാപനത്തെ കൂടുതൽ രൂക്ഷമാക്കുന്നു.

ദുരിതമയമായ കാഴ്ചകൾ

ഏകദേശം 1,79,000 പേരോടാണ് ലോസ് ഏഞ്ചൽസ് കൗണ്ടിയിൽ നിന്ന് വീടൊഴിയാൻ ആവശ്യപ്പെട്ടിരിക്കുന്നത്. ആളുകൾ അവരുടെ കയ്യിലൊതുങ്ങുന്ന സാധനങ്ങളുമായി പലായനം ചെയ്യുകയാണ്. താമസിയാതെ രണ്ടുലക്ഷത്തോളം പേർക്ക് കൂടി വീടൊഴിയേണ്ടി വരുമെന്നാണ് മുന്നറിയിപ്പ്. പൊലീസ് പറയുന്നതനുസരിച്ച്, പ്രദേശത്ത് ഏഴുപേർ മരിച്ചു. മരണസംഖ്യ ഇനിയും ഉയരാൻ സാധ്യതയുണ്ടെന്ന് ലോസ് ഏഞ്ചൽസ് കൗണ്ടി ഷെരീഫ് റോബർട്ട് ലൂണ പറഞ്ഞു. പലായനം ചെയ്ത സ്ഥലങ്ങളിൽ കവർച്ചയും മോഷണവും വർധിച്ചിട്ടുണ്ട്. ഈ കേസുകളിൽ 20 പേരെ അറസ്റ്റ് ചെയ്തിട്ടുമുണ്ട്.

തീയുടെ വ്യാപനം

ഹോളിവുഡ് ഹിൽസ് മേഖലയിൽ പടരുന്ന തീ കുറഞ്ഞുതുടങ്ങിയെങ്കിലും പൂർണമായി നിയന്ത്രണവിധേയമായിട്ടില്ല. ഹോളിവുഡ് ഹിൽസിൽ 5,300-ൽ അധികം കെട്ടിടങ്ങൾ തകർന്നിട്ടുണ്ട്. സൺസെറ്റ് ബൊളിവാർഡിലെ വീടുകളും സ്കൂളുകളും വാണിജ്യ കെട്ടിടങ്ങളും ഇതിൽ ഉൾപ്പെടുന്നു. കാലിഫോർണിയ ഫയർ ഡിപ്പാർട്ട്‌മെൻ്റ് ഉദ്യോഗസ്ഥർ പറയുന്നത് വ്യാഴാഴ്ച ഈ പ്രദേശത്ത് അഞ്ചോളം തീപിടിത്തങ്ങൾ ഉണ്ടായിട്ടുണ്ട് എന്നാണ്. 

പാലിസേഡ്‌സിൽ ചൊവ്വാഴ്ചയാണ് ആദ്യ തീപിടിത്തമുണ്ടായത്. സംസ്ഥാന ചരിത്രത്തിലെ ഏറ്റവും വിനാശകരമായ തീപിടിത്തമായി ഇത് മാറാൻ സാധ്യതയുണ്ട്. 17,000 ഏക്കറിലധികം വരുന്ന പ്രദേശം ഇതിനോടകം കത്തിനശിച്ചു. ലോസ് ഏഞ്ചൽസിന്റെ വടക്കൻ ഭാഗത്താണ് ഈ തീപിടുത്തമുണ്ടായത്. അൾട്ടഡെന പോലുള്ള നഗരങ്ങളിലേക്കും തീ പടർന്നു. ഏകദേശം 14,000 ഏക്കർ പ്രദേശം കത്തിനശിച്ച ഈ പ്രദേശത്തെ രണ്ടാമത്തെ വലിയ തീപിടുത്തമാണിത്. 

സാൻ ഫെർണാണ്ടോയുടെ വടക്കുഭാഗത്ത് ഹർസ്റ്റിൽ ചൊവ്വാഴ്ച രാത്രിയോടെ കാടുകൾ കത്താൻ തുടങ്ങി. 670 ഏക്കർ പ്രദേശത്ത് തീ പടർന്നു. ലോസ് ഏഞ്ചൽസിന്റെ വടക്ക് മലയോര പ്രദേശമായ ആക്‌ടണിൽ ബുധനാഴ്ച ഉച്ചയോടെ 350 ഏക്കർ സ്ഥലത്തും തീ പടർന്നു. ലോസ് ഏഞ്ചൽസിന്റെയും വെഞ്ചുറ കൗണ്ടിയുടെയും അതിർത്തിയിൽ വ്യാഴാഴ്ച പുതിയ തീപിടുത്തമുണ്ടായി. ഇതുവരെ 50 ഏക്കർ പ്രദേശം കത്തിനശിച്ചു. ബുധനാഴ്ച വൈകുന്നേരം ഹോളിവുഡ് ഹിൽസിൽ ഉണ്ടായ തീ ഒരു മണിക്കൂറിനുള്ളിൽ 20 ഏക്കറോളം പടർന്നു. 

സാമ്പത്തിക ആഘാതം

ഈ തീപിടുത്തത്തിൽ വീട് നഷ്ടപ്പെട്ട പ്രമുഖ വ്യക്തികളിൽ ലെയ്‌ടൺ മീസ്റ്റർ, ആദം ബ്രോഡി, പാരീസ് ഹിൽട്ടൺ എന്നിവരും ഉൾപ്പെടുന്നു. യുഎസ് ചരിത്രത്തിലെ ഏറ്റവും നാശനഷ്ടം വരുത്തിയ കാട്ടുതീയായി ഇത് മാറാൻ സാധ്യതയുണ്ടെന്ന് യുഎസ് ഇൻഷുറൻസ് വ്യവസായം ഭയപ്പെടുന്നു. ഏകദേശം എട്ട് ബില്യൺ ഡോളറിൻ്റെ ഇൻഷ്വർ ചെയ്ത സ്വത്ത് നഷ്ടപ്പെടാൻ സാധ്യതയുണ്ട്. അതേസമയം, അടുത്ത ആഴ്ച വരെ ഈ പ്രദേശത്ത് മഴയ്ക്ക് സാധ്യതയില്ലെന്ന് ബിബിസി കാലാവസ്ഥാ നിരീക്ഷകൻ സാറാ കീത്ത്-ലൂക്കാസ് പറയുന്നു.

രാഷ്ട്രീയ വിവാദങ്ങൾ

തീ അണയ്ക്കാനുള്ള മുന്നൊരുക്കങ്ങളുമായി ബന്ധപ്പെട്ട് രാഷ്ട്രീയ വിവാദങ്ങളും ഉടലെടുത്തിട്ടുണ്ട്. ചില അഗ്നിശമന സേനാംഗങ്ങളുടെ പൈപ്പിൽ വെള്ളം പോലുമില്ലായിരുന്നു എന്ന് ആരോപണമുണ്ട്. യുഎസ് പ്രസിഡൻ്റ് സ്ഥാനം ഏറ്റെടുക്കാൻ പോകുന്ന ഡൊണാൾഡ് ട്രംപാണ് ഈ വിഷയം ഉന്നയിച്ചത്. എന്നാൽ അഗ്നിശമന സേനാംഗങ്ങൾക്ക് വെള്ളമില്ലാത്തതായി റിപ്പോർട്ടുകളൊന്നും ലഭിച്ചിട്ടില്ലെന്ന് ഫയർഫോഴ്‌സ് മേധാവി ആൻ്റണി മാരോൺ പറഞ്ഞു.

#californiawildfire #losangeles #climatechange #santaanawinds #disaster #us