ഇൻവോയ്‌സുകൾ വ്യാജം, പണം ഇന്ത്യയിലേക്ക്: 500 മില്യൺ ഡോളർ വായ്പാ തട്ടിപ്പിന്റെ ചുരുളഴിയുന്നു

ന്യൂഡൽഹി: (KVARTHA) ആഗോള നിക്ഷേപ ഭീമനായ ബ്ലാക്ക്‌റോക്കും മറ്റ് പ്രമുഖ ധനകാര്യ സ്ഥാപനങ്ങളും വായ്പാ തട്ടിപ്പിന് ഇരയായതായി റിപ്പോർട്ട്. ഇന്ത്യൻ വംശജനായ ടെലികോം എക്‌സിക്യൂട്ടീവ് ബങ്കിം ബ്രഹ്മഭട്ടിന്റെ നേതൃത്വത്തിൽ നടന്നുവെന്ന് ആരോപിക്കപ്പെടുന്ന 500 മില്യൺ ഡോളറിലധികം (ഏകദേശം 4150 കോടിയിലധികം രൂപ) വരുന്ന വായ്പാ തട്ടിപ്പ് ആഗോള സാമ്പത്തിക ലോകത്തെ ഞെട്ടിച്ചിരിക്കുകയാണ്. ബ്രോഡ്‌ബാൻഡ് ടെലികോം, ബ്രിഡ്ജ്‌വോയ്‌സ് എന്നീ ടെലികോം സേവന സ്ഥാപനങ്ങളുടെ ഉടമയാണ് ബ്രഹ്മഭട്ട്.

അമേരിക്കൻ മാധ്യമമായ വാൾ സ്ട്രീറ്റ് ജേണലിന്റെ പ്രത്യേക റിപ്പോർട്ടനുസരിച്ച് ബ്ലാക്ക്‌റോക്കിന്റെ പങ്കാളി സ്ഥാപനമായ എച്ച്പിഎസ് ഇൻവെസ്റ്റ്‌മെന്റ് പാർട്ണർമാർ ഉൾപ്പെടെയുള്ള വായ്പാദാതാക്കൾക്കാണ് തട്ടിപ്പിലൂടെ വൻ നഷ്ടം സംഭവിച്ചിരിക്കുന്നത്. വലിയ വായ്പകൾക്ക് ഈടായി ഹാജരാക്കിയ ഇൻവോയ്‌സുകളും, ഉപഭോക്താക്കളിൽ നിന്ന് ലഭിക്കാനുള്ള പണം രേഖപ്പെടുത്തുന്ന അക്കൗണ്ടുകളും ബ്രഹ്മഭട്ട് വ്യാജമായി നിർമ്മിച്ചു നൽകിയെന്നാണ് പ്രധാന ആരോപണം. കഴിഞ്ഞ ഓഗസ്റ്റിൽ യുഎസിൽ ഫയൽ ചെയ്ത കേസിൽ ബ്രഹ്മഭട്ടിന്റെ കമ്പനികളുടെ ശൃംഖല കടലാസിൽ മാത്രമുള്ള സാമ്പത്തിക ഭദ്രതയുടെ മിഥ്യാധാരണ സൃഷ്ടിച്ച് വായ്പയായി ലഭിച്ച പണം ഇന്ത്യയിലേക്കും മൗറീഷ്യസിലേക്കും കടത്തിയതായി പറയുന്നു. 

ബ്രഹ്മഭട്ടിന്റെ സ്ഥാപനങ്ങൾക്ക് എച്ച്പിഎസ് നൽകിയ വായ്പകൾക്ക് ഫ്രഞ്ച് മൾട്ടിനാഷണൽ ബാങ്കായ ബിഎൻപി പാരിബയും സാമ്പത്തിക സഹായം നൽകിയിരുന്നു. എന്നാൽ, യൂറോപ്പിലെ ഏറ്റവും വലിയ വായ്പാദാതാക്കളിൽ ഒന്നായ ഈ ഫ്രഞ്ച് ബാങ്ക് കേസിനെക്കുറിച്ച് പരസ്യമായി പ്രതികരിച്ചിട്ടില്ല. സ്വകാര്യ-ക്രെഡിറ്റ് വിപണികളിലേക്ക് തങ്ങളുടെ പ്രവർത്തനം വ്യാപിപ്പിക്കുന്നതിന്റെ ഭാഗമായി ഈ വർഷം ആദ്യം എച്ച്പിഎസ് ഇൻവെസ്റ്റ്‌മെന്റ് പാർട്ണർമാരെ ഏറ്റെടുത്ത ബ്ലാക്ക്‌റോക്കിന് ഈ തട്ടിപ്പ് വലിയ തിരിച്ചടിയാണ് നൽകിയിരിക്കുന്നത്. 2020 സെപ്റ്റംബറിൽ ബ്രഹ്മഭട്ടുമായി ബന്ധപ്പെട്ട സ്ഥാപനങ്ങൾക്ക് എച്ച്പിഎസ് വായ്പ നൽകിത്തുടങ്ങിയിരുന്നു. 2021-ൽ 385 മില്യൺ ഡോളറായിരുന്ന മൊത്തം നിക്ഷേപം. പിന്നീട് 2024 ഓഗസ്റ്റോടെ ഏകദേശം 430 മില്യൺ ഡോളറായി വർദ്ധിപ്പിക്കുകയും ചെയ്‌തെന്ന് വാൾ സ്ട്രീറ്റ് ജേണൽ റിപ്പോർട്ട് ചെയ്യുന്നു.

2025 ജൂലൈയിലാണ് തട്ടിപ്പ് പുറത്തുവന്നത്. വായ്പ നൽകുന്നതിന് മുൻപ് ഇൻവോയ്‌സുകൾ പരിശോധിക്കാൻ ഉപയോഗിച്ചിരുന്ന ഉപഭോക്തൃ ഇമെയിൽ വിലാസങ്ങളിൽ ഒരു എച്ച്പിഎസ് ജീവനക്കാരൻ ക്രമക്കേടുകൾ ശ്രദ്ധിച്ചതോടെയാണ് കാര്യങ്ങൾ മാറിമറിഞ്ഞത്. ഈ വിലാസങ്ങളിൽ പലതും യഥാർത്ഥ ടെലികോം കമ്പനികളെ അനുകരിക്കുന്ന വ്യാജ ഡൊമെയ്‌നുകളിൽ നിന്നുള്ളതാണെന്ന് കണ്ടെത്തി. കൂടുതൽ അന്വേഷണത്തിൽ, ക്ലയന്റുകളിൽ നിന്നുള്ളതായി കരുതപ്പെടുന്ന ചില കത്തിടപാടുകളും കെട്ടിച്ചമച്ചതാണെന്ന് സ്ഥിരീകരിച്ചു.

സംശയം തോന്നിയ എച്ച്പിഎസ് ഉദ്യോഗസ്ഥർ ചോദ്യം ചെയ്യാൻ ശ്രമിച്ചപ്പോൾ ബ്രഹ്മഭട്ട് ആദ്യം ആശങ്കകൾ തള്ളിക്കളഞ്ഞു. പിന്നീട് അദ്ദേഹം ഫോൺ കോളുകൾക്ക് മറുപടി നൽകുന്നത് നിർത്തുകയും ചെയ്തു എന്നാണ് റിപ്പോർട്ട്. ഇതോടെ ന്യൂയോർക്കിലെ ഗാർഡൻ സിറ്റിയിലെ ബ്രഹ്മഭട്ടിന്റെ കമ്പനികളുടെ ഓഫീസുകൾ സന്ദർശിച്ച എച്ച്പിഎസ് ജീവനക്കാരൻ കണ്ടത് പൂട്ടിയിട്ടതും ആളൊഴിഞ്ഞതുമായ പരിസരമാണ്. സമീപ ആഴ്ചകളിലായി ഒരു ജീവനക്കാരും ഓഫീസിൽ പ്രവേശിക്കുകയോ പുറത്തുപോകുകയോ ചെയ്തിട്ടില്ലെന്ന് സമീപത്തെ വാടകക്കാർ സ്ഥിരീകരിച്ചതായി വാൾ സ്ട്രീറ്റ് ജേണൽ റിപ്പോർട്ട് ചെയ്യുന്നു.

ക്രമക്കേടുകൾ കണ്ടെത്തിയതിനെത്തുടർന്ന് എച്ച്പിഎസ് പ്രമുഖ യുഎസ് നിയമ സ്ഥാപനമായ ക്വിൻ ഇമ്മാനുവലിനെയും സിബിഐസെഡിനെയും അവലോകനം നടത്താൻ നിയമിച്ചു. വാൾ സ്ട്രീറ്റ് ജേണൻരെ റിപ്പോർട്ടനുസരിച്ച്, കഴിഞ്ഞ രണ്ട് വർഷമായി ഇൻവോയ്‌സുകൾ പരിശോധിക്കുന്നതിനായി ബ്രഹ്മഭട്ടിന്റെ സ്ഥാപനങ്ങൾ നൽകിയ എല്ലാ ഉപഭോക്തൃ ഇമെയിലുകളും വ്യാജമാണെന്നും 2018 മുതലുള്ള ചില കരാറുകൾ വ്യാജമായി നിർമ്മിച്ചതാണെന്നും ഇവർ നടത്തിയ അന്വേഷണത്തിൽ കണ്ടെത്തി. ബെൽജിയൻ ടെലികോം കമ്പനിയായ ബിഐസിഎസ് (BICS) ഒരു ഉദാഹരണമായി റിപ്പോർട്ടിൽ പറയുന്നുന്നു. ബ്രഹ്മഭട്ടിന്റെ സ്ഥാപനം പങ്കിട്ട ഇമെയിലുകളുമായി കമ്പനിക്ക് യാതൊരു ബന്ധവുമില്ലെന്ന് ബിഐസിഎസ് സുരക്ഷാ ജീവനക്കാരൻ ക്വിൻ ഇമ്മാനുവലിനോട് രേഖാമൂലം സ്ഥിരീകരിച്ചു.

'കടലാസിൽ മാത്രമുള്ള ആസ്തികളുടെ വിപുലമായ ബാലൻസ് ഷീറ്റ്' ബ്രഹ്മഭട്ട് ഉണ്ടാക്കിയെന്നും പണം ഇന്ത്യയിലെയും മൗറീഷ്യസിലെയും ഓഫ്‌ഷോർ അക്കൗണ്ടുകളിലേക്ക് അഥവാ വിദേശരാജ്യങ്ങളിലെ അക്കൗണ്ടുകളിലേക്ക് കൈമാറ്റം ചെയ്‌തെന്നും വായ്പാദാതാക്കളുടെ പരാതിയിൽ പറയുന്നു.

ഈ ഞെട്ടിക്കുന്ന വായ്പാ തട്ടിപ്പിനെക്കുറിച്ചുള്ള ഈ വാർത്ത നിങ്ങളുടെ സുഹൃത്തുക്കളുമായി പങ്കുവെക്കുക.

Article Summary: Indian-origin CEO Bankim Brahmbhatt accused of over $500M loan fraud involving BlackRock's partner HPS.

Hashtags: #BlackRock #LoanFraud #BankimBrahmbhatt #IndianCEO #HPSInvestmentPartners #GlobalFinance