പാകിസ്താനെ ഞെട്ടിച്ച് അഫ്ഗാന്റെ നീക്കം: ഇന്ത്യയുടെ വഴിയിൽ കുനാർ നദിയിൽ അണക്കെട്ട് ഉടൻ

കാബൂൾ: (KVARTHA) അതിർത്തി സംഘർഷം കടുക്കുന്നതിനിടെ, പാകിസ്താനുള്ള നദീജലത്തിന്റെ ഒഴുക്ക് നിയന്ത്രിക്കാൻ അണക്കെട്ടുകൾ നിർമ്മിക്കാനുള്ള അഫ്ഗാനിസ്ഥാന്റെ പ്രഖ്യാപനം മേഖലയിൽ പുതിയ പ്രതിസന്ധിക്ക് തിരികൊളുത്തിയിരിക്കുകയാണ്. ഇന്ത്യയുടെ സമീപനത്തിന് സമാനമായി, തങ്ങളുടെ 'ജലത്തിന്റെ അവകാശം' പ്രഖ്യാപിച്ചുകൊണ്ടാണ് അഫ്ഗാൻ്റെ നീക്കം. കുനാർ നദിയിലെ അണക്കെട്ട് നിർമ്മാണം ഉടൻ വേഗത്തിലാക്കാൻ പരമോന്നത നേതാവ് മൗലവി ഹിബത്തുല്ല അഖുന്ദ്‌സദ നിർദ്ദേശം നൽകിയതായി രാജ്യത്തെ വാർത്താവിതരണ മന്ത്രാലയം സ്ഥിരീകരിച്ചു. പാകിസ്താനുമായി അതിർത്തിയിൽ നടന്ന സംഘർഷത്തിൽ നൂറുകണക്കിന് ആളുകൾക്ക് ജീവൻ നഷ്ടപ്പെട്ടതിനു പിന്നാലെയാണ് ജലത്തെക്കുറിച്ചുള്ള നിർണ്ണായകമായ ഈ തീരുമാനം ഉണ്ടായിരിക്കുന്നത്.

ഇന്ത്യയുടെ വഴി പിന്തുടർന്ന് കാബൂൾ

പാകിസ്താനിലേക്ക് ഒഴുകുന്ന നദീജലം തടയാനുള്ള അഫ്ഗാനിസ്ഥാന്റെ ഈ തീരുമാനം, പാകിസ്താനുമായുള്ള ജലം പങ്കുവെയ്ക്കൽ സംബന്ധിച്ച് ഇന്ത്യ സ്വീകരിച്ച നിലപാടിന് സമാനമാണെന്നാണ് വിലയിരുത്തപ്പെടുന്നത്. നേരത്തെ, പഹൽ​ഗാം ആക്രമണത്തിന്റെ പശ്ചാത്തലത്തിൽ, പാകിസ്താനുമായി മൂന്ന് പടിഞ്ഞാറൻ നദികളിൽ നിന്നുള്ള വെള്ളം പങ്കുവെക്കാൻ ഇന്ത്യയെ ബാധ്യതപ്പെടുത്തുന്ന 'സിന്ധു നദീജല ഉടമ്പടി' ഇന്ത്യ താൽക്കാലികമായി നിർത്തിവച്ചിരുന്നു. ഇതിന് പിന്നാലെയാണ് ഇപ്പോൾ അഫ്ഗാനിസ്ഥാന്റെ പ്രഖ്യാപനംവും വന്നിരിക്കുന്നത്.

അണക്കെട്ട് നിർമ്മാണം ഉടൻ ആരംഭിക്കാനും ആഭ്യന്തര കമ്പനികളുമായി കരാറുകൾ അന്തിമമാക്കാനും രാജ്യത്തിന്റെ പരമോന്നത നേതാവ് ജല-ഊർജ്ജ മന്ത്രാലയത്തിന് നിർദ്ദേശം നൽകി. ഈ പ്രഖ്യാപനം ഇൻഫർമേഷൻ ഡെപ്യൂട്ടി മന്ത്രി മുഹാജർ ഫറാഹിയാണ് 'എക്സി'ലൂടെ പുറത്തുവിട്ടത്. ഇന്ത്യക്ക് പിന്നാലെ, പാകിസ്താനിലേക്കുള്ള ജലവിതരണം നിയന്ത്രിക്കുനുള്ള ഊഴം ഇപ്പോൾ അഫ്ഗാനിസ്ഥാന്റെ ആയിരിക്കാമെന്ന്, ലണ്ടൻ ആസ്ഥാനമായുള്ള പത്രപ്രവർത്തകൻ സാമി യൂസഫ്‌സായി എക്സിൽ കുറിച്ചു. കൂടാതെ വിദേശ കമ്പനികൾക്കായി കാത്തിരിക്കാതെ ആഭ്യന്തര അഫ്ഗാൻ കമ്പനികളുമായി ഉടൻ കരാറുകൾ ഒപ്പിടാനാണ് മന്ത്രാലയത്തിന് കർശന നിർദ്ദേശം നൽകിയതായും സാമി യൂസഫ്‌സായി എക്സിൽ പറഞ്ഞു.

The Ministry of Water and Energy stated that the esteemed Amir al-Mu'minin (may Allah protect him) has instructed them to begin construction of dams on the Kunar River as soon as possible and to sign contracts with domestic companies instead of waiting for foreign ones pic.twitter.com/da0o1ne6E0

— Afghanistan Defense Forces (@AfghanForces0) October 24, 2025

തർക്കത്തിന്റെ കേന്ദ്രബിന്ദു: കുനാർ നദി

ഏകദേശം 480 കിലോമീറ്റർ നീളമുള്ള കുനാർ നദി പാകിസ്താനടുത്തുള്ള ഹിന്ദു കുഷ് പർവതനിരകളിൽ നിന്നാണ് ഉത്ഭവിക്കുന്നത്. അഫ്ഗാനിസ്ഥാനിലെ കുനാർ, നംഗർഹാർ പ്രവിശ്യകളിലൂടെ ഒഴുകിയ ശേഷം ഇത് പാകിസ്താനിലെ ഖൈബർ പഖ്തൂൺഖ്‌വയിലേക്ക് പ്രവേശിക്കുകയും കാബൂൾ നദിയിൽ ചേരുകയും ചെയ്യുന്നു. പാകിസ്താനിൽ ഈ നദി 'ചിത്രൽ നദി' എന്ന പേരിലാണ് അറിയപ്പെടുന്നത്.

കുനാർ നദി ഒഴുകി ചേരുന്ന കാബൂൾ നദി ഇരു രാജ്യങ്ങൾക്കുമിടയിലെ പ്രധാനപ്പെട്ട അതിർത്തി കടന്നുള്ള ജല സംവിധാനമാണ്. പാകിസ്താന്റെ വടക്കുപടിഞ്ഞാറൻ പ്രവിശ്യകളിലെ കൃഷിക്കും മറ്റുമുള്ള ഒരു സുപ്രധാന ജലസ്രോതസ്സാണിത്. മാത്രമല്ല കുനാർ നദിയിലെ നീരൊഴുക്ക് കുറയ്ക്കുന്നത് സിന്ധു തടത്തെ ഗുരുതരമായി ബാധിക്കുകയും പഞ്ചാബിലെ ജലവിതരണത്തെ തകർക്കുകയും ചെയ്യുമെന്ന് വിദഗ്ധർ മുന്നറിയിപ്പ് നൽകുന്നു.

അതിർത്തിയിലുണ്ടായ സംഘർഷങ്ങൾക്കു പിന്നാലെ വന്ന തീരുമാനം

അഫ്ഗാനിസ്ഥാനെയും പാകിസ്താനെയും വേർതിരിക്കുന്ന 'യഥാർത്ഥ അതിർത്തിയായ ഡ്യൂറണ്ട് രേഖയിലുണ്ടായ സംഘർഷങ്ങൾക്ക് ശേഷമാണ് ജലവുമായി ബന്ധപ്പെട്ട ഈ നിർണ്ണായക തീരുമാനം. ബ്രിട്ടീഷ് കൊളോണിയൽ ഭരണകാലത്ത് വരച്ച ഈ അതിർത്തിയുടെ നിയമസാധുത അഫ്ഗാൻ സർക്കാർ ഇപ്പോഴും ചോദ്യം ചെയ്യുന്നുണ്ട്.

2021-ൽ ഭരണം പിടിച്ചെടുത്ത ശേഷം, അയൽരാജ്യങ്ങളോടുള്ള ആശ്രിതത്വം കുറയ്ക്കുന്നതിനായി അഫ്ഗാനിസ്ഥാൻ ജലപരമാധികാരത്തിന് കൂടുതൽ ഊന്നൽ നൽകി വരികയായിരുന്നു. ഇതിന്റെ ഭാഗമായി അണക്കെട്ട്, ജലവൈദ്യുത പദ്ധതികൾ എന്നിവയുടെ നിർമ്മാണം ത്വരിതപ്പെടുത്തുകയും ചെയ്തിട്ടുണ്ട്. ഇസ്ലാമാബാദും കാബൂളും തമ്മിൽ നിലവിൽ ഒരു ഔപചാരിക ജലം പങ്കുവെയ്ക്കൽ കരാറും നിലവിലില്ല എന്നതും പ്രശ്നം വഷളാക്കുന്നു. പാകിസ്താന്റെ നിലവിലുള്ള ഊർജ്ജ-ഭക്ഷ്യസുരക്ഷാ പ്രശ്‌നങ്ങൾ കണക്കിലെടുക്കുമ്പോൾ അഫ്ഗാനിസ്ഥാന്റെ നിലവിലെ ഈ ഏകപക്ഷീയമായ ജല നിയന്ത്രണ നടപടി ഒരു പ്രാദേശിക ജല പ്രതിസന്ധിക്ക് കാരണമായേക്കുമെന്ന് പാകിസ്താൻ നേരത്തെ മുന്നറിയിപ്പ് നൽകിയിരുന്നു.

ഇന്ത്യയുമായി സൗഹൃദം ദൃഢമാക്കി അഫ്ഗാൻ

അഫ്ഗാൻ വിദേശകാര്യ മന്ത്രി മൗലവി അമീർ ഖാൻ മുത്തഖി ഇന്ത്യ സന്ദർശിക്കുകയും വിദേശകാര്യ മന്ത്രി എസ്. ജയശങ്കറുമായി ചർച്ച നടത്തുകയും ചെയ്തതിന് ഒരാഴ്ചയ്ക്ക് ശേഷമാണ് ഈ നിർണ്ണായക പ്രഖ്യാപനം എന്നതും ശ്രദ്ധേയമാണ്. കൂടാതെ ഇരു രാജ്യങ്ങളും പുറത്തിറക്കിയ സംയുക്ത പ്രസ്താവനയിൽ ഹെറാത്തിലെ ഇന്ത്യ-അഫ്ഗാനിസ്ഥാൻ സൗഹൃദ അണക്കെട്ടിന്റെ (സൽമ ഡാം) നിർമ്മാണത്തിലും പരിപാലനത്തിലും ഇന്ത്യ നൽകിയ സഹായത്തെ അഭിനന്ദിക്കുകയും, ഇരുപക്ഷവും സുസ്ഥിരമായ ജല മാനേജ്‌മെന്റിന്റെ പ്രാധാന്യം ഊന്നിപ്പറയുകയും ജലവൈദ്യുത പദ്ധതികളിൽ സഹകരിക്കാൻ സമ്മതിക്കുകയും ചെയ്തിരുന്നു.

ജലവൈദ്യുത-ജലസേചന പദ്ധതികളിൽ ഇന്ത്യയും അഫ്ഗാനിസ്ഥാനും ദീർഘകാലമായി സഹകരിച്ച് പ്രവർത്തിക്കുകയും അടിസ്ഥാന സൗകര്യ പങ്കാളിത്തം ശക്തിപ്പെടുത്തുകയും ചെയ്യുന്നുണ്ട്. ഏകദേശം 300 മില്യൺ ഡോളർ ഇന്ത്യൻ ധനസഹായം ഉപയോഗിച്ച് 2016-ൽ പൂർത്തിയാക്കിയ 'സൽമ ഡാം', അഫ്ഗാനിസ്ഥാന്റെ വൈദ്യുതി ഇറക്കുമതിയിലുള്ള ആശ്രിതത്വം ഗണ്യമായി കുറച്ചിരുന്നു. ഇതിന്റെ തുടർച്ചയായി, കാബൂളിലെ രണ്ട് ദശലക്ഷത്തിലധികം താമസക്കാർക്ക് കുടിവെള്ളം നൽകാൻ ലക്ഷ്യമിട്ടുള്ള 'ഷഹതൂത്ത് അണക്കെട്ട് പദ്ധതി'യിൽ 250 മില്യൺ ഡോളർ സഹായം നൽകുന്ന കരാറിലും 2021ൽ ഇന്ത്യ ഒപ്പു വച്ചിരുന്നു.

പാകിസ്താനിലേക്കുള്ള ജലത്തിന്റെ ഒഴുക്ക് നിയന്ത്രിക്കാൻ കുനാർ നദിയിൽ അണക്കെട്ട് നിർമ്മിക്കാനുള്ള അഫ്ഗാനിസ്ഥാന്റെ പ്രഖ്യാപനത്തെ കുറിച്ചുള്ള ഈ പ്രധാന വാര്‍ത്ത നിങ്ങളുടെ സുഹൃത്തുക്കളുമായി പങ്കുവെക്കുന്നതോടൊപ്പം കൂടുതൽ വാർത്തകൾക്കായി ഞങ്ങളുടെ വാട്സാപ്പ് ചാനൽ പിന്തുടരുക.

Article Summary: Afghanistan announces plans to build a dam on the Kunar River to control water flow to Pakistan, following India's approach.

Hashtags: #Afghanistan #Pakistan #KunarRiver #WaterWar #India #SalmaDam