Relief Efforts | വയനാട്ടിൽ 82 ക്യാമ്പുകളിലായി കഴിയുന്നത് 8304 പേര്; ഇടമുറിയാത്ത രക്ഷാദൗത്യം; രക്ഷിച്ചത് 1500 ലേറെ പേരെ
എല്ലാ ക്യാമ്പിലുമായി 3022 പുരുഷന്മാരും 3398 സ്ത്രീകളും 1884 കുട്ടികളും 23 ഗര്ഭിണികളുമാണ് കഴിയുന്നത്.
കൽപറ്റ: (KVARTHA) ജില്ലയില് കാലവര്ഷക്കെടുതിയുടെ ഭാഗമായി 82 ദുരിതാശ്വാസ ക്യാമ്പുകളിലായി 8304 പേരെയാണ് മാറ്റി താമസിപ്പിച്ചിട്ടുള്ളത്. ചൂരല്മല ദുരന്തത്തിന്റെ പശ്ചാത്തലത്തില് ആരംഭിച്ച എട്ട് ക്യാമ്പുകള് ഉള്പ്പെടെയാണിത്. എല്ലാ ക്യാമ്പിലുമായി 3022 പുരുഷന്മാരും 3398 സ്ത്രീകളും 1884 കുട്ടികളും 23 ഗര്ഭിണികളുമാണ് കഴിയുന്നത്.
ദുരിതാശ്വാസ ക്യാമ്പുകളിലേക്ക് ആവശ്യമായിട്ടുള്ള അവശ്യ വസ്തുക്കള് ബന്ധപ്പെട്ട വകുപ്പുകള് ഉറപ്പാക്കുന്നുണ്ട്. റേഷന് കടകളിലും സപ്ലൈകോ വില്പനശാലകളിലും ഭക്ഷ്യധാന്യങ്ങളുടെ ലഭ്യത ഉറപ്പാക്കിയിട്ടുണ്ട്.
ഇടമുറിയാത്ത രക്ഷദൗത്യം
രണ്ട് ദിവസമായി നടന്ന രക്ഷാ പ്രവര്ത്തനത്തില് രക്ഷിക്കാനായത് 1592 പേരെ. ഒരു രക്ഷാ ദൗത്യത്തില് ഇത്രയധികം പേരെ ചുരുങ്ങിയ സമയത്തിനുള്ളില് രക്ഷിക്കാനായത് ഏകോപിതവും അതിവിപുലവുമായ ദൗത്യത്തിന്റെ ഫലം. ആദ്യ ഘട്ടത്തില് തന്നെ ദുരന്ത മുണ്ടായത്തിന്റെ സമീപസ്ഥലങ്ങളിലെ 68 കുടുംബങ്ങളിലെ 206 പേരെ മൂന്ന് ക്യാമ്പുകളിലേക്ക് മാറ്റി.
ഇതില് 75 പുരുഷന്മാര് 88 സ്ത്രീകള്, 43 കുട്ടികള് എന്നിവരാണ്. ഉരുള് പൊട്ടലിനെ തുടര്ന്ന് ഒറ്റപ്പെട്ടു പോയവരും വീടുകളില് കുടുങ്ങി പോയവരുമായ 1386 പേരെ രണ്ട് ദിവസത്തെ രക്ഷാ ദൗത്യത്തിന്റെ ഫലമായി രക്ഷിക്കാനായി. 528 പുരുഷന്മാര്, 559 സ്ത്രീകള്, 299 കുട്ടികള് എന്നിവരെ ഏഴ് ക്യാമ്പുകളിലേക്ക് മാറ്റി. 201 പേരെ രക്ഷിച്ചു ആശുപത്രിയിലെത്തിക്കാനായി. ഇതില് 90 പേരാണ് ഇപ്പോള് ചികിത്സയിലുള്ളത്.
