ചെന്നൈ: (KVARTHA) നടൻ വിജയിയുടെ തമിഴക വെട്രി കഴകത്തിൻ്റെ ആദ്യ സംസ്ഥാന സമ്മേളനം ജനസാഗരമായി. സമ്മേളനത്തിൽ ദളപതി വിജയ് പാർട്ടിയുടെ നയങ്ങളും കർമ്മപദ്ധതികളും പ്രഖ്യാപിച്ചു. തമിഴ് ഭാഷയ്ക്കും സംസ്ഥാനത്തിന്റെ അഭിമാനത്തിനും പ്രാധാന്യം നൽകുന്ന നിരവധി നയങ്ങളാണ് പാർട്ടി പ്രഖ്യാപിച്ചിരിക്കുന്നത്.

പാർട്ടി പ്രഖ്യാപനത്തിൽ ഗവർണർ പദവിയെ രൂക്ഷമായി വിമർശിച്ചിട്ടുണ്ട്. 'ആത്മാഭിമാനം നശിപ്പിക്കുന്ന ഗവർണർ ഭരണത്തിൻ്റെ ആവശ്യമില്ല' എന്നാണ് നയപ്രഖ്യാപനത്തിൽ പറയുന്നത്. കൂടാതെ മാതൃഭാഷയായ തമിഴിനോടൊപ്പം ലോകഭാഷയായ ഇംഗ്ലീഷിനെ ഉൾപ്പെടുത്തിയുള്ള ദ്വിഭാഷാ നയം തങ്ങളുടെ പാർട്ടി പിന്തുടരുമെന്നും വ്യക്തമാക്കി. ഇതോടെ മറ്റ് ദ്രാവിഡ പാർട്ടികളെ പോലെ ഹിന്ദിയെ എതിർക്കുന്ന നിലപാടാണ് വിജയിയുടെ പാർട്ടിയുടേതെന്നും വ്യക്തമായി.

സർക്കാരിന്‍റെ ഔദ്യോഗിക ഭാഷയായും ആരാധനയ്ക്കുള്ള ഭാഷയായും തമിഴ് ഉപയോഗിക്കുമെന്നാണ് വാഗ്ദാനം. കോടതികളിൽ തമിഴ് ഭാഷ ഉപയോഗിക്കുന്നതിന് നിർണായക നടപടികൾ സ്വീകരിക്കും. അതുപോലെ തന്നെ, ഗവേഷണ പഠനം വരെ തമിഴ് ഭാഷയിൽ നടത്താനും, സർക്കാർ ജോലികളിൽ തമിഴ് മീഡിയം വിദ്യാഭ്യാസത്തിന് പ്രാധാന്യം നൽകുമെന്നും പറഞ്ഞിട്ടുണ്ട്. അതേസമയം ദ്രാവിഡ പാർട്ടികളുടെ മുഖമുദ്രയായ നിരീശ്വരവാദം തമിഴക വെട്രി കഴകത്തിന്‍റെ നയത്തിൽ ഉൾപ്പെടുത്തിയിട്ടില്ലെന്നത് ശ്രദ്ധേയമാണ്.

വിദ്യാഭ്യാസം സംസ്ഥാന പട്ടികയിലേക്കു മാറ്റാൻ സമ്മർദം ചെലുത്തും, അഴിമതി നിർമാർജനം ചെയ്യും, ലിംഗസമത്വം പ്രോത്സാഹിപ്പിക്കുന്നതിനുള്ള നീക്കത്തിൽ, പാർട്ടിയുടെയും നിയമസഭാ ടിക്കറ്റുകളുടെയും മൂന്നിലൊന്ന് സീറ്റുകൾ സ്ത്രീകൾക്കായി സംവരണം ചെയ്യും എന്നിങ്ങനെയാണ് മറ്റു പ്രധാന വാഗ്ദാനങ്ങൾ.

മറ്റ് പ്രധാന നയപ്രഖ്യാപനങ്ങൾ:

* മദ്യവും മയക്കുമരുന്നും മുക്തമായ തമിഴ്നാട്: സംസ്ഥാനത്തെ മദ്യവും മയക്കുമരുന്നും മുക്തമാക്കുക എന്ന ലക്ഷ്യത്തോടെ വിപുലമായ പരിപാടികൾ ആവിഷ്കരിക്കും.
* കാമരാജ് മോഡൽ സർക്കാർ സ്‌കൂളുകൾ: വിദ്യാഭ്യാസ നിലവാരം ഉയർത്തുന്നതിനും ഗുണനിലവാരമുള്ള വിദ്യാഭ്യാസം നൽകുന്നതിനുമായി എല്ലാ ജില്ലകളിലും കാമരാജ് മോഡൽ സർക്കാർ സ്‌കൂളുകൾ സ്ഥാപിക്കും.
* ജാതി, മത, വർണ, ഭാഷാ വിവേചനം അവസാനിപ്പിക്കുക: സമൂഹത്തിൽ നിലനിൽക്കുന്ന ജാതി, മത, വർണ, ഭാഷാ വിവേചനം അവസാനിപ്പിക്കുക എന്ന ലക്ഷ്യത്തോടെ പ്രവർത്തിക്കും.
* മധുരയിൽ സെക്രട്ടേറിയറ്റ് ബ്രാഞ്ച്: മധുരയിൽ സെക്രട്ടേറിയറ്റ് ബ്രാഞ്ച് സ്ഥാപിക്കും.
 

#VijayParty #TamilNadu #Politics #TamilLanguage #Education #India