പുത്തന്‍ വേലിക്കരയില്‍ വീട്ടമ്മയെ കൊലപ്പെടുത്തിയ കേസ്; പ്രതി ആസാം സ്വദേശിക്ക് വേണ്ടി ഹാജരാകുന്നത് അഡ്വ ബി എ ആളൂര്‍

കൊച്ചി: (www.kvartha.com 20.03.2018) പുത്തന്‍ വേലിക്കരയില്‍ വീട്ടമ്മയെ കൊലപ്പെടുത്തിയ കേസില്‍ പ്രതി ആസാം സ്വദേശിക്ക് വേണ്ടി ഹാജരാകുന്നത് അഡ്വ ബി എ ആളൂര്‍. തിങ്കളാഴ്ച രാവിലെ 6.30 മണിയോടെയാണ് പുത്തന്‍ വേലിക്കര പാലാട് ഡേവിസിന്റെ ഭാര്യ മോളി (60) യെ കഴുത്തറത്ത് കൊല്ലപ്പെട്ട നിലയില്‍ കണ്ടെത്തിയത്. മോളിയുടെ കൊലപാതക കേസില്‍ ആസാം സ്വദേശി മുന്നയാണ് പ്രതിയെന്ന് പോലീസ് കണ്ടെത്തിയിരുന്നു.

ഭര്‍ത്താവിന്റെ മരണ ശേഷം 30 വയസ്സോളം പ്രായമുള്ള മാനസിക വെല്ലുവിളി നേരിട്ടിരുന്ന മകനൊപ്പമാണ് മോളി താമസിച്ചിരുന്നത്. പുലര്‍ച്ചെ ഒരു മണിയോടെ വീട്ടില്‍ നിന്ന് ശബ്ദം കേട്ടതായി അയല്‍വാസികള്‍ പറയുന്നുണ്ട് . ബലാത്സംഗ ശ്രമത്തിനിടെയാകാം കൊലപാതകമെന്നാണ് സൂചന.


സൗമ്യ വധക്കേസില്‍ പ്രതി ഗോവിന്ദച്ചാമിയ്ക്ക് വേണ്ടി ഹാജരായതോടെയാണ് ആളൂര്‍ വക്കീല്‍ കുപ്രസിദ്ധനായത്. സുപ്രീം കോടതിയില്‍ നിന്ന് വധശിക്ഷ റദ്ദാക്കികൊണ്ട് ഗോവിന്ദച്ചാമിയ്ക്ക് അനുകൂല വിധി സമ്പാദിച്ചാണ് ആളൂര്‍ വക്കീല്‍ വീണ്ടും വാര്‍ത്തയായത്.

ബണ്ടി ചോറിന് വേണ്ടിയും ജിഷ വധക്കേസിലും ആളൂര്‍ ഹാജരായിട്ടുണ്ട് . ഇത്തരത്തില്‍ മന: സാക്ഷിയെ ഞെട്ടിക്കുന്ന ക്രൂര കൃത്യങ്ങളില്‍ പ്രതിയ്ക്ക് വേണ്ടി വാദിച്ചാണ് ആളൂര്‍ ശ്രദ്ധിക്കപ്പെട്ടത്. ഏതായാലും പുത്തന്‍വേലിക്കര കേസിലും താന്‍ തന്നെ ഹാജരാകുമെന്ന് അഡ്വ ആളൂര്‍ അറിയിച്ചിരിക്കുകയാണ്.