കോഹ്ലിയുടെ സെഞ്ച്വറി പാഴായി; നേപ്പിയര്‍ ഏകദിനത്തില്‍ ഇന്ത്യയ്ക്ക് തോല്‍വി

നേപ്പിയര്‍: ന്യൂസിലാന്‍ഡിനെതിരായ ഏകദിന പരമ്പരയിലെ ആദ്യ മത്സരത്തില്‍ ഇന്ത്യയ്ക്ക് തോല്‍വി. 24 റണ്‍സിനാണ് ആഥിതേയരായ ന്യൂസിലാന്‍ഡ് ഇന്ത്യയെ പരാജയപ്പെടുത്തിയത്. 293 റണ്‍സ് വിജയലക്ഷ്യം പിന്തുടര്‍ന്ന ഇന്ത്യ വിരാട് കോഹ്ലി (123)യുടെ സെഞ്ച്വറിയുടെ പിന്‍ബലത്തില്‍ വിജയത്തിലേക്ക് കുതിച്ചെങ്കിലും ഫലം കണ്ടില്ല.

അവസാന ഓവറുകളില്‍ വിക്കറ്റുകള്‍ ഒന്നൊന്നായി വീണതാണ് ഇന്ത്യയുടെ തോല്‍വിക്ക് വഴിവെച്ചത്. നേരത്തെ ടോസ് നേടിയ ഇന്ത്യ ന്യൂസിലാന്‍ഡിനെ ബാറ്റിംഗിന് അയക്കുകയായിരുന്നു. വില്യംസണ്‍ (71), ടെയ്‌ലര്‍ (55), ആന്‍ഡേഴ്‌സണ്‍ (68) എന്നിവരുടെ അര്‍ധ സെഞ്ച്വറിയുടെ പിന്‍ബലത്തിലാണ് ന്യൂസിലാന്‍ഡ് മികച്ച സ്‌കോര്‍ പടുത്തുയര്‍ത്തിയത്. എന്നാല്‍ മറുപടി ബാറ്റിംഗിനിറങ്ങിയ ഇന്ത്യയ്ക്ക് വേണ്ടി കോഹ്ലിയൊഴികെ മറ്റാര്‍ക്കും കാര്യമായി തിളങ്ങാനായില്ല. ഇന്ത്യ വിജയത്തിലേക്ക് കുതിക്കുന്ന ഘട്ടത്തിലായിരുന്നു കോഹ്ലി ഔട്ടായത്. ഇതോടെ വിജയം ഇന്ത്യയുടെ കയ്യില്‍ നിന്നും കിവീസ് തട്ടിയെടുത്തു. 48.4 ഓവറില്‍ 268ന് ഇന്ത്യ ഓള്‍ ഔട്ടായി.
111 പന്തില്‍ രണ്ട് സിക്‌സറുകളുടെയും 11 ഫോറുകളുടെയും അകമ്പടിയോടെയായിരുന്നു കോഹ്ലിയുടെ ഇന്നിംഗ്‌സ്. ഇന്ത്യയ്ക്ക് വേണ്ടി നായകന്‍ ധോണി (40), ഓപണര്‍ ശിഖര്‍ ധവാന്‍ (32) റണ്‍സെടുത്തു. നാല് വിക്കറ്റ് വീഴ്ത്തിയ മിച്ചല്‍ മക്ലഹാനാണ് കളിയുടെ ഗതി മാറ്റിമറിച്ചത്. ആന്‍ഡേഴ്‌സണ്‍ രണ്ട് വിക്കറ്റ് വീഴ്ത്തി.

ഇന്ത്യയ്ക്ക് വേണ്ടി മുഹമ്മദ് ഷാമി ഒമ്പത് ഓവറില്‍ 55 റണ്‍സ് വഴങ്ങി നാല് വിക്കറ്റ് വീഴ്ത്തി. ഭുവനേശ്വര്‍ കുമാര്‍, ഇശാന്ത് ശര്‍മ, രവീന്ദ്ര ജഡേജ എന്നിവര്‍ ഓരോ വിക്കറ്റ് വീതം വീഴ്ത്തി. വിജയത്തോടെ അഞ്ച് ഏകദിനങ്ങളടങ്ങുന്ന പരമ്പരയില്‍ ന്യൂസിലാന്‍ഡ് 1-0ന് മുന്നിലെത്തി.