ന്യൂഡൽഹി: (KVARTHA) ലോക ചെസ് ചാമ്പ്യൻഷിപ്പിലെ ഏറ്റവും നാടകീയമായ നിമിഷങ്ങളിലൊന്നായിരുന്നു നിലവിലെ ചാമ്പ്യൻ ഡിംഗ് ലിറനെതിരായ 18 കാരൻ ഗുകേഷിന്റെ വിജയം. അവസാന നിമിഷം വരെ നിറഞ്ഞു നിന്ന ത്രില്ലർ, ചെസ് പ്രേമികളുടെ ഹൃദയമിടിപ്പുകൾ വർധിപ്പിച്ചു. ഈ വിജയത്തോടെ ഇന്ത്യയുടെ ചെസ് ചരിത്രത്തിൽ മാത്രമല്ല, ലോക ചെസ് ചരിത്രത്തിലും ഒരു പുതിയ അധ്യായം രചിക്കപ്പെട്ടു.

ഗെയിമിന്റെ ആവേശകരമായ നീക്കങ്ങളിൽ ആദ്യ മത്സരത്തിൽ ഡിംഗ് വിജയിച്ചെങ്കിലും ഗുകേഷ് മൂന്നാം പോരാട്ടത്തിൽ വിജയിച്ച് സ്‌കോറിന് ഒപ്പമെത്തി. തുടർന്നുള്ള ഏഴ് മത്സരങ്ങളും സമനിലയിൽ പിരിഞ്ഞപ്പോൾ, 11-ാം ഗെയിം വിജയിച്ച് ഗുകേഷ് ഈ സമനില തകർത്തു. എന്നാൽ 12-ാം ഗെയിം ജയിച്ച് ഡിംഗ് അവസാന രണ്ട് ഗെയിമുകളിൽ മുന്നേറി.

അവസാന നിമിഷത്തെ ത്രില്ലർ ക്ലാസിക്കൽ ചെസിൻ്റെ 14-ാമത്തേതും അവസാനത്തേതുമായ ഗെയിമിലേക്ക് നീങ്ങുമ്പോൾ, രണ്ട് പേരും 6.5 പോയിൻ്റിൽ സമനിലയിലായി. എന്നാൽ മത്സരത്തിൻ്റെ അവസാന മിനിറ്റുകളിൽ ഗുകേഷ് വിജയം നേടി, ലോകത്തെ ഞെട്ടിച്ചു. ഈ വിജയത്തോടെ ഗുകേഷ് ചരിത്രത്തിലെ 18-ാമത് ലോക ചാമ്പ്യനായി. വിശ്വനാഥൻ ആനന്ദിന് ശേഷം ഈ കിരീടം നേടുന്ന രണ്ടാമത്തെ ഇന്ത്യക്കാരനാണ്. കൂടാതെ, ചരിത്രത്തിൽ അഭിമാനകരമായ കിരീടം നേടുന്ന ഏറ്റവും പ്രായം കുറഞ്ഞ കളിക്കാരൻ കൂടിയാണ്.

എത്ര സമ്മാനത്തുക കിട്ടും?

2024 ലെ ലോക ചെസ് ചാമ്പ്യൻഷിപ്പിൽ ഓരോ ക്ലാസിക്കൽ ഗെയിം വിജയത്തിനും 200,000 ഡോളർ (ഏകദേശം 1.69 കോടി രൂപ) സമ്മാനത്തുക നിശ്ചയിച്ചിരുന്നു. മൂന്ന് ഗെയിമുകൾ ജയിച്ചതിലൂടെ ഗുകേഷ് 600,000 ഡോളർ (ഏകദേശം 5.07 കോടി രൂപ) നേടിയപ്പോൾ, രണ്ട് ഗെയിമുകൾ ജയിച്ച ലിറന് 400,000 ഡോളർ (ഏകദേശം 3.38 കോടി രൂപ) ലഭിച്ചു. ബാക്കിയുള്ള 1.5 മില്യൺ ഡോളർ സമ്മാനത്തുക ഇരുവർക്കും തുല്യമായി വിഭജിച്ചതോടെ, ഗുകേഷിന്റെ ആകെ സമ്മാനത്തുക 1.35 മില്യൺ ഡോളറായി (ഏകദേശം 11.45 കോടി രൂപ) ഉയർന്നു. അതേസമയം, ലിറന് 1.15 മില്യൺ ഡോളർ (ഏകദേശം 9.75 കോടി രൂപ) ലഭിച്ചു.

ഗുകേഷിന്റെ ചെസ് യാത്ര

ചെന്നൈയിൽ ജനിച്ച ഗുകേഷ് ചെറുപ്പം മുതൽ ചെസിൽ താൽപര്യം കാണിച്ചു. വീട്ടിൽ അനൗപചാരികമായി കളിച്ചാണ് ചെസ് യാത്ര തുടങ്ങിയത്. സ്കൂളിൽ പഠിക്കുമ്പോൾ തന്നെ ഗ്രാൻഡ്മാസ്റ്റർ പട്ടം നേടിയിരുന്നു. മാതാപിതാക്കളുടെയും കോച്ചിന്റെയും പിന്തുണയോടെ ഗുകേഷ് നിരവധി ടൂർണമെന്റുകളിൽ വിജയിച്ചു.

ഗുകേഷിന്റെ നേട്ടങ്ങൾ

* 2019-ൽ ഏറ്റവും പ്രായം കുറഞ്ഞ ഇന്ത്യൻ ഗ്രാൻഡ്മാസ്റ്ററായി.
* ലോകത്തിലെ ഏറ്റവും പ്രായം കുറഞ്ഞ മൂന്നാമത്തെ ഗ്രാൻഡ് മാസ്റ്ററായി.
* റാങ്കിങ്ങിൽ ഇന്ത്യയിൽ രണ്ടാം സ്ഥാനത്തും ലോകത്തിൽ അഞ്ചാം സ്ഥാനത്തുമാണ്.
* ഇഎൽഒ (ELO) റാങ്കിങ്ങിൽ 2750 പോയിൻ്റ് കടക്കുന്ന ഏറ്റവും പ്രായം കുറഞ്ഞ കളിക്കാരനാണ്.
* 2016-ൽ കോമൺവെൽത്ത് ചെസ് ചാമ്പ്യൻഷിപ്പിൽ സ്വർണം നേടിയിരുന്നു.
* 2021 യൂറോപ്യൻ ചെസ് ക്ലബ് കപ്പ് നേടി
* 2020-ൽ ഫ്രാൻസിൽ നടന്ന കാൻ ഓപ്പൺ ഉൾപ്പെടെ പത്ത് ഓപ്പൺ കിരീടങ്ങൾ നേടിയിട്ടുണ്ട്.

ഗുകേഷിന്റെ കുടുംബം

ഗുകേഷിന്റെ പിതാവ് ഡോ. രജനികാന്ത് ഇഎൻടി സർജനാണ്. മകൻ്റെ ചെസ് സ്വപ്‍നം പിന്തുടരാൻ അദ്ദേഹം തൻ്റെ മെഡിക്കൽ ജീവിതം ഉപേക്ഷിച്ചു. ഗുകേഷിൻ്റെ അമ്മ ഡോ. പത്മകുമാരി മദ്രാസ് മെഡിക്കൽ കോളേജിൽ അസിസ്റ്റൻ്റ് പ്രൊഫസറാണ്. ഗുകേഷിന്റെ വിജയം ഇന്ത്യയ്ക്ക് വലിയ അഭിമാനമാണ്. ചെസ് കളിയോടുള്ള താല്പര്യം ഇന്ത്യയിൽ വർദ്ധിപ്പിക്കുന്നതിന് ഈ വിജയം സഹായിക്കും. കൂടാതെ, ഇന്ത്യയിലെ ചെസ് കളിക്കാർക്ക് ഒരു പ്രചോദനമായി മാറും.

#Gukesh #Chess #WorldChampion #India #Sports #Grandmaster