FIFA | ലോകകപ്പ് ഫൈനലിന് ശേഷമുള്ള അതിരുവിട്ട ആഘോഷ പ്രകടനങ്ങൾ; അർജന്റീനയ്‌ക്കെതിരെ ഫിഫ അച്ചടക്ക നടപടി തുടങ്ങി

സൂറിച്ച്: (www.kvartha.com) ഖത്തറിൽ നടന്ന ലോകകപ്പിന്റെ ഇതിഹാസ ഫൈനൽ കഴിഞ്ഞ് ഏകദേശം ഒരു മാസത്തിന് ശേഷം അധിക്ഷേപകരമായ പെരുമാറ്റത്തിന് അർജന്റീനയ്‌ക്കെതിരെ ഫിഫ അച്ചടക്ക നടപടി ആരംഭിച്ചു. ഫിഫ ഡിസിപ്ലിനറി നിയമത്തിലെ ആർട്ടിക്കിൾ 11, 12, ഫിഫ ലോകകപ്പ് ഖത്തർ 2022 ലെ ആർട്ടിക്കിൾ 44 എന്നിവയുടെ ലംഘനത്തിന് സാധ്യതയുള്ളതിനാൽ അർജന്റീനിയൻ ഫുട്ബോൾ അസോസിയേഷനെതിരെ അച്ചടക്ക സമിതി നടപടികൾ ആരംഭിച്ചതായി ഫിഫയുടെ ഔദ്യോഗിക അറിയിപ്പ് വ്യക്തമാക്കുന്നു.

2018ലെ ചാമ്പ്യൻമാരായ ഫ്രാൻസിനെതിരെ ശക്തമായ പോരാട്ടത്തിനൊടുവിലാണ് ലയണൽ മെസിയുടെ നേതൃത്വത്തിലുള്ള അർജന്റീനിയൻ ടീം കിരീടം നേടിയത്. വൈകാരികമായ ആ നിമിഷത്തിൽ അർജന്റീനൻ താരങ്ങളുടെ ആഘോഷം അതിരുവിട്ടതായി പരക്കെ വിമർശനം ഉയർന്നിരുന്നു. വിവിധ മാധ്യമ റിപ്പോർട്ടുകൾ പ്രകാരം, അർജന്റീനിയൻ കളിക്കാർ വിജയം ആഘോഷിക്കുന്നതിനിടയിൽ ഔദ്യോഗിക അഭിമുഖം നടത്തുന്ന മേഖലയിലേക്ക് കടന്നു. തൽഫലമായി, ചുമരിന് കേടുപാടുകൾ സംഭവിച്ചു.

എന്നിരുന്നാലും, ഗോൾകീപ്പർ എമിലിയാനോ മാർട്ടിനെസിന്റെ ആഘോഷമായിരുന്നു കൂടുതൽ വിവാദമായത്. മത്സരത്തിന് ശേഷമുള്ള ചടങ്ങിനിടെ തനിക്ക് ലഭിച്ച ഗോൾഡൻ ഗ്ലോവ് അവാർഡുമായി മാർട്ടിനെസ് കാട്ടിയ മോശം ആംഗ്യങ്ങൾ വലിയ വിമർശനങ്ങൾ ഏറ്റുവാങ്ങി. എന്തിനാണ് ഇത്തരമൊരു ആഘോഷം നടത്തിയതെന്ന് ചോദിച്ചപ്പോൾ, ഫ്രഞ്ചുകാർ തന്നെ ചീത്തവിളിച്ചതുകൊണ്ടാണ് താൻ ചെയ്തതെന്നായിരുന്നു മാർട്ടിനെസിന്റെ പ്രതികരണം.

ലോകകപ്പ് വിജയത്തിന് ശേഷം നാട്ടിലെ ഔദ്യോഗിക പരേഡിലും അർജന്റീനയുടെ ആഘോഷങ്ങൾ നിയന്ത്രണാതീതമായി. ദശലക്ഷക്കണക്കിന് ആരാധകർ ബ്യൂണസ് ഐറിസിന്റെ തെരുവുകളിലേക്ക് ഒഴുകിയെത്തിയപ്പോൾ, അർജന്റീനിയൻ കളിക്കാരെ ഹെലികോപ്റ്റർ വഴി ബസിൽ നിന്ന് സുരക്ഷിത സ്ഥാനത്തേക്ക് മാറ്റാൻ നിർബന്ധിതമായി.

അർജന്റീനയെ കൂടാതെ ക്രൊയേഷ്യ, സെർബിയ, മെക്സിക്കോ, ഇക്വഡോർ എന്നിവർക്കെതിരെയും ഫിഫ അച്ചടക്ക നടപടികൾ ആരംഭിച്ചിട്ടുണ്ട്. ബദ്ധവൈരികളായ സ്വിറ്റ്‌സർലൻഡിനെതിരായ കളിയിൽ സെർബിയൻ അനുയായികൾ അസഭ്യം പറഞ്ഞതിനെ തുടർന്ന് സെർബിയൻ ഫുട്‌ബോൾ അസോസിയേഷന് 54,000 ഡോളർ പിഴയും അതിന്റെ അടുത്ത ഫിഫ മത്സരത്തിൽ സ്റ്റേഡിയം ഭാഗികമായി അടച്ചിടാനും വിധിച്ചിട്ടുണ്ട്.

Keywords: News, World, World Cup, Sports, Argentina, FIFA, Celebrations, FIFA opens disciplinary proceedings against Argentina for World Cup celebrations.