തിരുവനന്തപുരം: (KVARTHA) അച്ഛൻ ജീവിതത്തിലേക്ക് തിരിച്ചുവരുമെന്നായിരുന്നു പ്രതീക്ഷയെന്നും എന്നാൽ പെട്ടെന്നാണ് എല്ലാം മാറിയതെന്നും വി.എസ്. അച്യുതാനന്ദൻ്റെ മകൻ വി.എ. അരുൺകുമാർ പറഞ്ഞു. അച്ഛൻ്റെ വിയോഗം ഉൾക്കൊള്ളാൻ ഇതുവരെയും സാധിച്ചിട്ടില്ലെന്നും അദ്ദേഹം വ്യക്തമാക്കി. ജൂലൈ 21-ന് ഉച്ചയായപ്പോഴാണ് വി.എസിൻ്റെ നില ഗുരുതരമാണെന്ന് ഡോക്ടർമാർ അറിയിച്ചതെന്നും അതുവരെ എല്ലാം ഭേദമായി വരുമെന്ന പ്രതീക്ഷയുണ്ടായിരുന്നുവെന്നും അരുൺകുമാർ കൂട്ടിച്ചേർത്തു. അച്ഛൻ്റെ വിയോഗം അംഗീകരിക്കാൻ കുറച്ചുകൂടി സമയമെടുക്കുമെന്നും അദ്ദേഹം സൂചിപ്പിച്ചു. വലിയ ചുടുകാട് എത്തും വരെ ആളുകൾ കാത്തുനിന്ന് സ്വീകരിച്ചുവെന്ന് പറഞ്ഞ അദ്ദേഹം, വി.എസിനെ ചികിത്സിച്ച ഡോക്ടർമാരോടും നെഞ്ചേറ്റിയ ജനസഹസ്രങ്ങളോടും സി.പി.എമ്മിനും നന്ദി അറിയിച്ചു.

ഫെയ്‌സ്ബുക്കിലെ കുറിപ്പ്

ഇന്നത്തെ പ്രഭാതം അച്ഛൻ ഒപ്പമില്ലെന്ന തിരിച്ചറിവിൻ്റേതുകൂടിയാണ്. കടന്നുപോയ ഒരു മാസക്കാലവും അച്ഛനെ ജീവിതത്തിലേക്ക് തിരിച്ചുകൊണ്ടുവരാൻ കഴിഞ്ഞേക്കും എന്ന പ്രത്യാശ വെച്ചുപുലർത്തിയെങ്കിലും വിധിവിഹിതം മറിച്ചായിപ്പോയി. രോഗശയ്യയിൽ കിടക്കുന്ന അച്ഛനെ കാണാൻ താൽപ്പര്യപ്പെട്ട നൂറുകണക്കിന് അടുപ്പക്കാരുണ്ടായിരുന്നു. ഡോക്ടർമാരുടെ കർശന നിർദ്ദേശം നിലവിലുണ്ടായിരുന്നതിനാൽ അന്ത്യനാളുകളിൽ ആരെയും കാണാൻ അനുവദിക്കാൻ കഴിഞ്ഞില്ല. പലർക്കും ഇക്കാര്യത്തിൽ വിഷമമുണ്ടായിട്ടുണ്ടാവും. ആശുപത്രിയിൽ വന്ന് സമാശ്വസിപ്പിച്ചവരോടുപോലും വേണ്ടത്ര ഊഷ്മളമായി പ്രതികരിച്ചുവോ എന്ന് സംശയമുണ്ട്. അച്ഛൻ്റെ വിയോഗം സ്വയം അംഗീകരിക്കാൻ പോലും ഏറെ സമയമെടുത്തു. പിന്നീടങ്ങോട്ട് നടന്നതെല്ലാം ഒരു സ്വപ്നംപോലെ മാത്രമേ ഓർത്തെടുക്കാനാവുന്നുള്ളൂ. അച്ഛനോടൊപ്പം ബസ്സിലിരുന്ന് വലിയ ചുടുകാട് വരെയുള്ള യാത്രയിലുടനീളം കൺമുന്നിലൂടെ ഒഴുകിനീങ്ങിയ ജനസമുദ്രത്തെ കൂപ്പുകൈകളോടെ സ്മരിക്കുന്നു. മണിക്കൂറുകൾ കാത്തുനിന്നിട്ടും അന്ത്യാഭിവാദ്യം അർപ്പിക്കാൻ പോലും കഴിയാതെ നിരാശരായവരുണ്ട് എന്ന് മനസ്സിലാക്കുന്നു. എല്ലാവരോടും നന്ദിയുണ്ട്. ആശുപത്രിയിലെ ഡോക്ടർമാരോട്, സമാശ്വസിപ്പിച്ചവരോട്, അച്ഛനെ നെഞ്ചേറ്റിയ ജനസഹസ്രങ്ങളോട്, പാർട്ടിയോട്....

വി.എസ്. അച്യുതാനന്ദനോടുള്ള ജനങ്ങളുടെ സ്നേഹത്തെക്കുറിച്ച് നിങ്ങളുടെ അഭിപ്രായം പങ്കുവെക്കുക.

Article Summary: V.S. Achuthanandan's son V.A. Arun Kumar expresses gratitude after father's demise.

#VSachuthanandan #VSA #KeralaPolitics #Tribute #Gratitude #CPM #ArunKumar