തിരുവനന്തപുരം: (KVARTHA) ബിജെപി കൗൺസിലർ ആർ ശ്രീലേഖയുമായുള്ള തർക്കത്തിനൊടുവിൽ വി കെ പ്രശാന്ത് എംഎൽഎ ശാസ്തമംഗലത്തെ ഓഫീസ് ഒഴിയുന്നു. മരുതംകുഴിയിലെ പുതിയ കെട്ടിടത്തിലേക്ക് ഓഫീസ് മാറ്റാനാണ് തീരുമാനം. ഇരുവരും തമ്മിലുള്ള ഓഫീസ് കെട്ടിട തർക്കം നേരത്തെ വലിയ രീതിയിൽ ചർച്ചയായിരുന്നു.

തർക്കത്തിന്റെ തുടക്കം

തിരുവനന്തപുരം കോർപ്പറേഷനിൽ ബിജെപി അധികാരമേറ്റതിന് പിന്നാലെയാണ് ഓഫീസ് കെട്ടിടവുമായി ബന്ധപ്പെട്ട തർക്കം ഉടലെടുത്തത്. ശാസ്തമംഗലത്തെ കോര്‍പ്പറേഷൻ കെട്ടിടത്തിലാണ് കൗണ്‍സിലര്‍ ഓഫീസും വി കെ പ്രശാന്ത് എംഎൽഎയുടെ ഓഫീസും പ്രവർത്തിക്കുന്നത്. കൗണ്‍സിലര്‍ ഓഫീസിലെ സ്ഥലപരിമിതി ചൂണ്ടിക്കാണിച്ച് വി കെ പ്രശാന്ത് എംഎൽഎയോട് ഓഫീസ് ഒഴിയണമെന്ന് ആര്‍ ശ്രീലേഖ ആവശ്യപ്പെട്ടതോടെയാണ് വിവാദങ്ങൾക്ക് തുടക്കമായത്.

ഇരുപക്ഷ വാദങ്ങൾ

കോര്‍പ്പറേഷൻ കരാറിന്‍റെ അടിസ്ഥാനത്തിൽ കെട്ടിടം തനിക്ക് വാടകക്ക് തന്നിരിക്കുന്നതാണെന്നും മാര്‍ച്ച് വരെ കാലാവധിയുണ്ടെന്നും അതിനാൽ ഇപ്പോൾ ഒഴിയാൻ സാധിക്കില്ലെന്നുമായിരുന്നു വി കെ പ്രശാന്ത് എംഎൽഎ ആദ്യം സ്വീകരിച്ച നിലപാട്. എന്നാൽ സംഭവം വിവാദമായതോടെ നിലപാടിൽ അയവ് വരുത്തി ശ്രീലേഖ രംഗത്തെത്തിയിരുന്നു. താൻ ഓഫീസ് ഒഴിയണമെന്ന് അഭ്യര്‍ത്ഥിക്കുക മാത്രമാണ് ചെയ്തതെന്നും തങ്ങള്‍ ഇരുവരും സുഹൃത്തുക്കളാണെന്നുമായിരുന്നു ആര്‍ ശ്രീലേഖ പിന്നീട് പ്രതികരിച്ചത്.

ശ്രീലേഖയുടെ വീഡിയോയും എംഎൽഎയുടെ തീരുമാനവും

എംഎൽഎ ഓഫീസ് ഒഴിയുന്നതുവരെ ചെറിയ സ്ഥലത്ത് തന്നെ കൗൺസിലർ ഓഫീസ് തുടരുമെന്ന സൂചന നൽകികൊണ്ട് ആര്‍ ശ്രീലേഖ വീണ്ടും ഫേസ്ബുക്കിലൂടെ പ്രതികരിച്ചിരുന്നു. കൗണ്‍സിലര്‍ ഓഫീസിലെ പരിമിതമായ സൗകര്യങ്ങൾ വ്യക്തമാക്കുന്ന വീഡിയോയും അവർ പങ്കുവെച്ചു. ഓഫീസിന്‍റെ ഒരു ഭാഗത്ത് നിറയെ മാലിന്യം കൂട്ടിയിട്ടിരിക്കുകയാണെന്നും ഇവിടെ തന്നെ സേവനം തുടരുമെന്നും ശ്രീലേഖ വീഡിയോയിൽ പറഞ്ഞിരുന്നു. ഇതിന് പിന്നാലെയാണ് ഇപ്പോൾ ഓഫീസ് മരുതംകുഴിയിലേക്ക് മാറ്റാൻ വി കെ പ്രശാന്ത് എംഎൽഎ തീരുമാനിച്ചത്.

വി കെ പ്രശാന്ത് എംഎൽഎയുടെ തീരുമാനം ഉചിതമാണോ? നിങ്ങളുടെ അഭിപ്രായം പങ്കുവെക്കൂ.

Article Summary: V K Prasanth MLA vacates Sasthamangalam office after dispute.

#VKPrasanth #RSreelekha #TrivandrumCorporation #KeralaPolitics #OfficeDispute #Sasthamangalam