ന്യൂഡൽഹി: (KVARTHA) ഹരിയാനയിൽ നിയമസഭാ തെരഞ്ഞെടുപ്പിൻ്റെ വോട്ടെണ്ണൽ പുരോഗമിക്കുമ്പോൾ ഏവരും ഉറ്റുനോക്കുന്ന ജുലാന മണ്ഡലത്തിൽ കോൺഗ്രസ് സ്ഥാനാർഥി വിനേഷ് ഫോഗട്ട് 2,128 വോട്ടുകൾക്ക് പിന്നിൽ. ഗുസ്തി താരമായിരുന്ന വിനേഷ് ഫോഗട്ടിനെതിരെ ബിജെപിയുടെ ക്യാപ്റ്റൻ യോഗേഷ് ബൈരാഗിയാണ് ആദ്യ ഫലസൂചനകളിൽ മുന്നേറുന്നത്. 

2024 ലെ പാരീസ് ഒളിമ്പിക്സിന് ശേഷം ഗുസ്തിയിൽ നിന്ന് വിരമിച്ച് കോൺഗ്രസിൽ ചേർന്ന് രാഷ്ട്രീയത്തിലേക്ക് കടന്നുവന്ന വിനേഷിനും ഈ ഫലം  നിർണായകമാണ്. ഗുസ്തി ലോകത്ത് നിരവധി നേട്ടങ്ങൾ കൈവരിച്ച വിനേഷ് ഫോഗട്ട്, രാഷ്ട്രീയ രംഗത്ത് തന്റെ സാന്നിധ്യം അറിയിച്ചത് ബ്രിജ് ഭൂഷൺ ശരൺ സിംഗിനെതിരായ ലൈംഗികാതിക്രമ വിരുദ്ധ പ്രതിഷേധത്തിൽ സജീവമായി പങ്കെടുത്തുകൊണ്ടാണ്. 

റെസ്ലിംഗ് ഫെഡറേഷൻ ഓഫ് ഇന്ത്യയുടെ മുൻ മേധാവിയും ബിജെപി നേതാവുമായ ബ്രിജ് ഭൂഷൺ ശരൺ സിംഗിനെതിരെയുള്ള ഗുസ്തിക്കാരുടെ പ്രതിഷേധം രാജ്യത്തുടനീളം വലിയ ചർച്ചയായിരുന്നു. മുമ്പ് ഒമ്പത് വർഷത്തോളം കരസേനയിൽ സേവനമനുഷ്ഠിച്ചിട്ടുള്ള ബൈരാഗി മുൻ വാണിജ്യ പൈലറ്റുമാണ്. ഫോഗട്ടിനൊപ്പം 11 സ്ഥാനാർത്ഥികളും ജുലാന നിയമസഭാ മണ്ഡലത്തിൽ ജനവിധി തേടുന്നുണ്ട്.

1.85 ലക്ഷത്തിലധികം വോട്ടർമാരുള്ള ജുലാനയിൽ 40 ശതമാനം വോട്ടർമാരും ജാട്ട് സമുദായത്തിൽ നിന്നുള്ളവരാണ്. ഫോഗട്ട്, ജാട്ട് സമുദായത്തിൽ നിന്നുള്ള വ്യക്തിയായതിനാൽ അവർക്ക് സമുദായത്തിന്റെ പിന്തുണ ലഭിക്കുമെന്നായിരുന്നു പ്രതീക്ഷിക്കപ്പെട്ടത്.

#VineshPhogat #JulanaElections #HaryanaPolitics #VoteCounting #BJP #Congress