കൊച്ചി: (KVARTHA) കൊലയാളി പാർട്ടി ആരാണെന്ന് ജനങ്ങൾക്ക് വ്യക്തമായി അറിയാമെന്നും പെരിയ ഇരട്ടക്കൊലപാതക കേസിൽ സിപിഎമ്മിന് യാതൊരു ബന്ധവുമില്ലെന്നും സിപിഎം കേന്ദ്ര കമ്മിറ്റി അംഗം എ കെ ബാലൻ പറഞ്ഞു. പെരിയ കേസിന്റെ വിധി പ്രസ്താവനയോട് പ്രതികരിക്കുകയായിരുന്നു അദ്ദേഹം. കൊലപാതകം സിപിഎം ഉന്നത നേതൃത്വത്തിന്റെ അറിവോടെയല്ല നടന്നതെന്നും അദ്ദേഹം കൂട്ടിച്ചേർത്തു. 

പ്രതികളെ നിയമത്തിനു മുന്നിൽ കൊണ്ടുവരുമെന്നും പൊലീസ് ആരംഭം മുതൽ ശക്തമായ നിലപാടാണ് സ്വീകരിച്ചത്. കേരള പൊലീസിന്റെ അന്വേഷണത്തിന്റെ തുടർച്ചയാണ് സി.ബി.ഐ നടത്തിയത്. നിയമപരമായി ചെയ്യേണ്ട കാര്യങ്ങളെല്ലാം കൃത്യമായി നടക്കുമെന്നും അതിന്റെ ഭാഗമാണ് കോടതി വിധിയെന്നും ബാലൻ വ്യക്തമാക്കി.

സിപിഎമ്മിനെ കൊലയാളി പാർട്ടിയെന്ന് കോൺഗ്രസ് ആരോപിക്കുന്നതിനെ ബാലൻ ശക്തമായി വിമർശിച്ചു. തൃശൂരിൽ നടന്ന ഇരട്ടക്കൊലപാതകം അദ്ദേഹം ഉദാഹരണമായി ചൂണ്ടിക്കാട്ടി. ഒരു കോൺഗ്രസുകാരൻ മറ്റൊരു കോൺഗ്രസുകാരനെ കൊല്ലാൻ മടി കാണിക്കാത്ത സംഭവം കേരളം കണ്ടതാണ്. 

രണ്ട് ഗ്രൂപ്പുകൾ തമ്മിലുള്ള തർക്കമാണ് കൊലപാതകത്തിൽ കലാശിച്ചത്. പരസ്പരം വെട്ടിക്കൊന്ന ആ പാർട്ടിയാണ് സിപിഎമ്മിനെ കൊലയാളി പാർട്ടിയെന്ന് വിളിക്കുന്നതെന്നും ബാലൻ കുറ്റപ്പെടുത്തി. ക്രിമിനൽ പാർട്ടി ഏതാണെന്ന് ജനങ്ങൾക്ക് നല്ല ബോധ്യമുണ്ടെന്നും അദ്ദേഹം കൂട്ടിച്ചേർത്തു.

ശനിയാഴ്ചയാണ് പെരിയ ഇരട്ടക്കൊലപാതക കേസിൽ സിബിഐ കോടതി വിധി പ്രസ്താവിച്ചത്. 24 പേരടങ്ങിയ പ്രതിപട്ടികയിൽ 14 പേരെ കോടതി കുറ്റക്കാരാണെന്ന് കണ്ടെത്തി. പത്ത് പേരെ കുറ്റവിമുക്തരാക്കി.

 #AKBalan #PeriyaMurder #CPM #CongressAllegations #KeralaPolitics #CBIInvestigation