കോട്ടയം: (KVARTHA) കേന്ദ്ര മന്ത്രി സുരേഷ് ഗോപിയുടെ വാഹനം തടഞ്ഞുനിർത്തി നിവേദനം നൽകാൻ ശ്രമിച്ചയാളെ ബിജെപി പ്രവർത്തകർ പിടിച്ചുമാറ്റി. രാവിലെ കോട്ടയം പള്ളിക്കത്തോട് ബസ് സ്റ്റാൻഡ് മൈതാനിയിൽ നടന്ന 'കലുങ്ക് സൗഹൃദ സംവാദം' കഴിഞ്ഞ് സുരേഷ് ഗോപി കാറിൽ മടങ്ങുന്നതിനിടെയാണ് നാടകീയ രംഗങ്ങൾ അരങ്ങേറിയത്. കല്ലാടംപൊയ്ക സ്വദേശിയായ ഷാജിയാണ് നിവേദനവുമായി എത്തിയത്.

വാഹനം തടഞ്ഞു; കയ്യേറ്റത്തിന് ശ്രമം

സുരേഷ് ഗോപിയുടെ വാഹനവ്യൂഹം മുന്നോട്ടുപോകുന്നതിനിടെ ഷാജി പെട്ടെന്ന് മുന്നിലെത്തി വാഹനം തടയുകയായിരുന്നു. തുടർന്ന് വാഹനത്തിൻ്റെ ചുറ്റും നടന്ന് തൻ്റെ ആവശ്യം അറിയിക്കാൻ ശ്രമിച്ചെങ്കിലും സുരേഷ് ഗോപി നേരിട്ട് ഇടപെട്ടില്ല. ഇതിനിടെ, പുറത്തുണ്ടായിരുന്ന ബിജെപി പ്രവർത്തകരിൽ ചിലരെത്തി ഇയാളെ ബലമായി പിടിച്ചുമാറ്റുകയായിരുന്നു. വാഹനത്തിന് മുന്നിൽ ചാടി വാഹനം തടഞ്ഞതോടെയാണ് പ്രവർത്തകർ പ്രകോപിതരായത്.

സാമ്പത്തിക സഹായം നൽകി മടക്കിവിട്ടു

വാഹനം തടഞ്ഞതോടെ പ്രവർത്തകരിലൊരാൾ നിവേദനം നൽകാനെത്തിയ ഷാജിയെ കയ്യേറ്റം ചെയ്യാൻ ശ്രമിച്ചു. എന്നാൽ മറ്റു നേതാക്കൾ ഉടൻ ഇടപെട്ട് ഇയാളെ പിന്തിരിപ്പിച്ചു. സാമ്പത്തിക സഹായം ആവശ്യപ്പെട്ടാണ് ഇയാൾ എത്തിയതെന്നാണ് പറയപ്പെടുന്നത്. എന്നാൽ, കയ്യിൽ നിവേദനം ഉണ്ടായിരുന്നെങ്കിലും അതിൽ ഒന്നും എഴുതിയിരുന്നില്ലെന്ന് പിന്നീട് വ്യക്തമായി. തുടർന്ന്, മുതിർന്ന ബിജെപി പ്രവർത്തകർ തന്നെ ഷാജിയെ സമാധാനിപ്പിച്ച് പ്രശ്നം ചോദിച്ചറിഞ്ഞശേഷം സാമ്പത്തിക സഹായം നൽകി വീട്ടിലേക്ക് മടക്കിവിടുകയായിരുന്നുവെന്നാണ് വിവരം.

സുരേഷ് ഗോപിയുടെ വാഹനവ്യൂഹം തടഞ്ഞ സംഭവത്തെക്കുറിച്ച് നിങ്ങളുടെ അഭിപ്രായം എന്താണ്?

Article Summary: Man attempted to stop Minister Suresh Gopi's convoy in Kottayam, was restrained, and later given financial aid.

#SureshGopi #KottayamNews #PoliticalNews #BJPKerala #Incident #FinancialAid