തൃശൂർ: (KVARTHA) ചേര്‍പ്പിലെ കലുങ്ക് സംവാദത്തിനിടെ വയോധികന്റെ അപേക്ഷ നിരസിച്ച സംഭവത്തിൽ വിശദീകരണവുമായി കേന്ദ്രമന്ത്രി സുരേഷ് ഗോപി. നിവേദനം നിരസിച്ചതിൽ സംഭവിച്ചത് കൈപ്പിഴയെന്നാണ് അദ്ദേഹം പരസ്യമായി പ്രതികരിച്ചത്. ഈ വിഷയം കലുങ്ക് ചർച്ചയുടെ പൊലിമ കെടുത്താനുള്ള ശ്രമമാണെന്നും അദ്ദേഹം ആരോപിച്ചു.

രാഷ്ട്രീയ ആയുധമാക്കി സിപിഎം

കലുങ്ക് സംവാദത്തിനിടെ പ്രദേശവാസിയായ കൊച്ചു വേലായുധൻ എന്ന വയോധികനാണ് സുരേഷ് ഗോപിക്ക് അപേക്ഷയുമായി എത്തിയത്. നിവേദനമടങ്ങിയ കവർ തുറന്നുപോലും നോക്കാതെ അത് നിരസിക്കുന്ന ദൃശ്യങ്ങൾ പുറത്തുവന്നതോടെ സംഭവം രാഷ്ട്രീയ വിവാദമായിരുന്നു. സുരേഷ് ഗോപിക്കെതിരെ ശക്തമായ രാഷ്ട്രീയ ആയുധമാക്കിയ സിപിഎം, കൊച്ചു വേലായുധന് വീട് നിർമ്മിച്ച് നൽകുമെന്ന് കഴിഞ്ഞ ദിവസം പ്രഖ്യാപിക്കുകയും ചെയ്തു.

‘ഇനിയും കൊച്ചു വേലായുധന്മാരെ കാണിച്ചു തരാം’

കൊച്ചു വേലായുധന് വീട് ലഭിച്ചതിൽ സന്തോഷമുണ്ടെന്ന് സുരേഷ് ഗോപി പ്രതികരിച്ചു. 'കൊച്ചു വേലായുധന്മാരെ ഇനിയും കാണിച്ചുതരാം. വേലായുധൻ ചേട്ടന്മാരെ ഇനിയും അങ്ങോട്ട് അയക്കും, പാർട്ടി വഴി നടപടി എടുപ്പിക്കും' എന്നും അദ്ദേഹം കൂട്ടിച്ചേർത്തു. വീടില്ലാത്തവരുടെ പട്ടിക പുറത്തുവിടുമെന്നും അദ്ദേഹം വ്യക്തമാക്കി.

കലുങ്ക് സംവാദം തുടരും

കൈപ്പിഴകൾ ഉയർത്തിക്കാട്ടി കലുങ്ക് സൗഹൃദ സംവാദത്തിന്റെ തീപ്പന്തം കെടുത്താൻ ആരും ശ്രമിക്കേണ്ടെന്നും അത് നടക്കില്ലെന്നും സുരേഷ് ഗോപി വെല്ലുവിളിച്ചു. 14 ജില്ലകളിലും കലുങ്ക് സൗഹൃദ സദസ് നടത്തുമെന്നും നിവേദനങ്ങൾ ബിജെപി ജില്ലാ പ്രസിഡന്റിനെ ഏൽപിക്കണമെന്നും അദ്ദേഹം പറഞ്ഞു. വ്യക്തിപരമായ ആവശ്യങ്ങൾക്കല്ല, സമൂഹത്തിനാണ് ഒരു ജനപ്രതിനിധി മുൻഗണന നൽകേണ്ടതെന്നും അദ്ദേഹം കൂട്ടിച്ചേർത്തു. 'എന്താണ് അധികാര പരിധിയിൽ വെച്ച് ചെയ്യാൻ സാധിക്കുന്ന കാര്യങ്ങളെക്കുറിച്ച് ധാരണയുണ്ട്. എം പി സ്ഥാനത്ത് ഇരുന്നുകൊണ്ട് ചെയ്യാൻ സാധിക്കുന്ന കാര്യങ്ങൾ ചെയ്തിട്ടുണ്ട്' എന്ന് സുരേഷ് ഗോപി പറഞ്ഞു. സിനിമയിൽ നിന്ന് ഇറങ്ങിയിട്ടില്ല എന്ന ആരോപണത്തെക്കുറിച്ചുള്ള ചോദ്യത്തിന് 'എന്തിന് സിനിമയിൽ നിന്ന് ഇറങ്ങണം, സിനിമയിൽ നിന്ന് ഇറങ്ങാൻ സൗകര്യമില്ല' എന്നും അദ്ദേഹം മറുപടി നൽകി. കേന്ദ്ര ഫണ്ട് ഉപയോഗിച്ചുള്ള പദ്ധതികൾക്കാണ് മുൻഗണനയെന്നും അദ്ദേഹം വ്യക്തമാക്കി. ഇന്ന് തൃശൂരിലെ കൊടുങ്ങല്ലൂർ, ഇരിഞ്ഞാലക്കുട, മരത്താക്കര, പുതുക്കാട് എന്നിവിടങ്ങളിലാണ് സുരേഷ് ഗോപിയുടെ കലുങ്ക് സൗഹൃദ സംവാദം നടക്കുന്നത്. പ്രാദേശികമായുള്ള പൊതു ആവശ്യങ്ങൾ സംവാദ പരിപാടിയിൽ ചർച്ച ചെയ്യുമെന്നും അദ്ദേഹം കൂട്ടിച്ചേർത്തു.
 

കലുങ്ക് സൗഹൃദ സംവാദങ്ങളെക്കുറിച്ച് നിങ്ങളുടെ അഭിപ്രായം എന്താണ്?

Article Summary: Suresh Gopi clarifies on rejecting a petition.

#SureshGopi #KaluankSamvad #Thrissur #KeralaPolitics #PoliticalNews #India