'കള്ളക്കേസെടുത്ത് കുടുക്കുന്നു': എസ്ഡിപിഐയുടെ തുറന്നുപറച്ചിൽ

കണ്ണൂർ: (KVARTHA) കായലോടിൽ യുവതി ആത്മഹത്യ ചെയ്ത സംഭവത്തിൽ തങ്ങളുടെ പ്രവർത്തകരെ കള്ളക്കേസിൽ കുടുക്കാൻ സി.പി.എം ഗൂഢാലോചന നടത്തിയെന്ന് എസ്.ഡി.പി.ഐ ആരോപിച്ചു. ഭരണകക്ഷിയുടെ സമ്മർദ്ദത്തിന് വഴങ്ങിയാണ് പിണറായി പോലീസ് കേസെടുത്തതെന്നും എസ്.ഡി.പി.ഐ സംസ്ഥാന ജനറൽ സെക്രട്ടറി കെ.കെ. അബ്ദുൽ ജബ്ബാർ കണ്ണൂരിൽ നടന്ന വാർത്താ സമ്മേളനത്തിൽ വ്യക്തമാക്കി.

റസീന എന്ന യുവതിയുടെ ആത്മഹത്യയുമായി ബന്ധപ്പെട്ട് എസ്.ഡി.പി.ഐ പ്രവർത്തകർക്കെതിരെ ചുമത്തിയ കേസുകൾ അടിസ്ഥാനരഹിതമാണെന്ന് അദ്ദേഹം പറഞ്ഞു. 

റസീനയുടെ കുടുംബപ്രശ്നങ്ങളിൽ ബന്ധുക്കളായ എസ്.ഡി.പി.ഐ പ്രവർത്തകർ ഇടപെട്ടതും പാർട്ടി ഓഫീസിൽ മധ്യസ്ഥ ചർച്ച നടന്നതും എങ്ങനെയാണ് സദാചാര പോലീസിങ്ങായി ചിത്രീകരിക്കുന്നതെന്ന് ജബ്ബാർ ചോദിച്ചു.

കുടുംബ പ്രശ്നങ്ങളിലും കച്ചവട തർക്കങ്ങളിലും പൊതുപ്രവർത്തകർ എന്ന നിലയിൽ എല്ലാ രാഷ്ട്രീയ പാർട്ടി നേതാക്കളും ഇടപെടാറുണ്ട്. വേങ്ങാട് മേഖലയിൽ പാർട്ടിയുടെ വളർച്ചയിൽ വിറളി പൂണ്ടവരാണ് പോലീസിനെ ഉപയോഗിച്ച് എസ്.ഡി.പി.ഐ പ്രവർത്തകരെ കേസിൽ കുടുക്കുന്നതെന്നും അദ്ദേഹം ആരോപിച്ചു. 

ഇതിനെതിരെ ശക്തമായ പ്രതിഷേധ പരിപാടികൾ സംഘടിപ്പിക്കുമെന്നും കെ.കെ. അബ്ദുൽ ജബ്ബാർ അറിയിച്ചു. ജില്ലാ പ്രസിഡൻ്റ് ബഷീർ കണ്ണാടിപറമ്പ്, സെക്രട്ടറി ഷഫീഖ് പി.സി, ജില്ലാ കമ്മിറ്റിയംഗം റുബീന എന്നിവരും വാർത്താ സമ്മേളനത്തിൽ പങ്കെടുത്തു.

എസ്.ഡി.പി.ഐയുടെ ഈ ആരോപണങ്ങളെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: SDPI alleges false cases by CPM in Kannur assault case.

#KannurPolitics, #SDPI, #CPM, #FalseCases, #KeralaNews, #PoliticalConflict