രാഹുലിന്റെ രാജി ഉടൻ? പാർട്ടിയിൽ ഒറ്റക്കെട്ടായ ആവശ്യം, വനിതാ നേതാക്കളും രംഗത്ത്

തിരുവനന്തപുരം: (KVARTHA) യുവതികളുടെ വെളിപ്പെടുത്തലുകളെത്തുടർന്ന് പ്രതിരോധത്തിലായ രാഹുൽ മാങ്കൂട്ടത്തിൽ എം.എൽ.എ. ഉടൻ സ്ഥാനമൊഴിഞ്ഞേക്കുമെന്ന് സൂചന. ഇന്ന് (ഓഗസ്റ്റ് 24) വൈകുന്നേരത്തോടെ രാജി പ്രഖ്യാപനം ഉണ്ടാകുമെന്നാണ് വിവരം. 

പ്രതിപക്ഷ നേതാവ് വി.ഡി. സതീശൻ, രമേശ് ചെന്നിത്തല, വി.എം. സുധീരൻ, ഉമ തോമസ്, ഷാനിമോൾ ഉസ്മാൻ എന്നിവരടക്കമുള്ള മുതിർന്ന നേതാക്കൾ രാഹുലിനെതിരെ നിലപാടെടുത്തതോടെയാണ് പാർട്ടിയിൽ രാജിക്ക് വഴിയൊരുങ്ങിയത്.

പാർട്ടിയിൽ ഇക്കാര്യത്തിൽ ഏകാഭിപ്രായം രൂപപ്പെട്ടതായാണ് സൂചന. കെ.പി.സി.സി. അധ്യക്ഷൻ സണ്ണി ജോസഫും രാജി ആവശ്യപ്പെട്ടു. എത്രയും പെട്ടെന്ന് രാഹുലിനെക്കൊണ്ട് രാജിവെപ്പിക്കണമെന്ന് രമേശ് ചെന്നിത്തല നേരത്തെ ആവശ്യപ്പെട്ടിരുന്നു. ഷാനിമോൾ ഉസ്മാൻ, ബിന്ദു കൃഷ്ണ എന്നിവരടക്കമുള്ള വനിതാ നേതാക്കളുടെ ശക്തമായ നിലപാടുകൂടിയായപ്പോൾ രാജി സ്വീകരിക്കുകയല്ലാതെ കോൺഗ്രസിന് മറ്റ് വഴികളില്ലാതായി. 

അതേസമയം, ഷാഫി പറമ്പിൽ മാത്രമാണ് രാഹുലിന് പിന്തുണയുമായി രംഗത്തുള്ളത്. പരാതിയില്ല എന്ന സാങ്കേതികത്വത്തിൽ ഉറച്ചുനിൽക്കേണ്ടതില്ലെന്നാണ് പാർട്ടിയുടെ പൊതുനിലപാട്. കൂടുതൽ ആരോപണങ്ങൾ ഉയരാനുള്ള സാധ്യതയും അത് പാർട്ടിക്കുണ്ടാക്കുന്ന അവമതിപ്പും കണക്കിലെടുത്താണ് രാജി സമ്മർദ്ദം ശക്തമായത്.

വെളിപ്പെടുത്തലുകളും ശബ്ദസന്ദേശങ്ങളും വലിയ വിവാദമായി മാറിയതോടെ മൂന്ന് ദിവസമായി അടൂരിലെ വീട്ടിലാണ് രാഹുൽ. കഴിഞ്ഞ ദിവസം മാധ്യമങ്ങളെ കാണാൻ തീരുമാനിച്ചിരുന്നെങ്കിലും പാർട്ടി നേതൃത്വം ഇടപെട്ട് വിലക്കുകയായിരുന്നു. ആദ്യം രാജി ആലോചിക്കുന്നില്ലെന്ന് അറിയിച്ച രാഹുൽ, പിന്നീട് നിലപാട് മാറ്റിയെന്നാണ് സൂചന. വനിതാ കമ്മീഷൻ കേസെടുത്ത സാഹചര്യവും രാജിക്ക് നിർണായകമായി. നേരത്തെ, എ.ഐ.സി.സി. ജനറൽ സെക്രട്ടറി ദീപാ ദാസ് മുൻഷി രാജി വേണ്ടെന്ന് അറിയിച്ചിരുന്നെങ്കിലും, ആരോപണങ്ങളുടെ ശക്തി വർധിച്ചതോടെ ആ നിലപാട് പാർട്ടിക്ക് മാറ്റേണ്ടി വന്നു. പാലക്കാട് ഡി.സി.സി.യും രാഹുലിനെ തള്ളിപ്പറഞ്ഞിരുന്നു.

രാഹുൽ മാങ്കൂട്ടത്തിലിന്റെ രാജി പാർട്ടിക്ക് ഗുണം ചെയ്യുമോ?നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Rahul Mankootathil MLA likely to resign amid allegations.

#RahulMankootathil #KeralaPolitics #Congress #Resignation #Allegations #Kerala