തിരുവനന്തപുരം: (KVARTHA) കോർപ്പറേഷൻ മേയർ സ്ഥാനം അവസാന നിമിഷം കൈവിട്ടുപോയതിൽ മുൻ ഡിജിപി ആർ ശ്രീലേഖ കടുത്ത അതൃപ്തിയിലെന്ന് റിപ്പോർട്ട്. ബിജെപി സ്ഥാനാർത്ഥിയായി മത്സരിച്ച് മികച്ച വിജയം നേടിയ ശ്രീലേഖയെ തെരഞ്ഞെടുപ്പിന്റെ ആദ്യ ഘട്ടം മുതൽ തന്നെ മേയർ സ്ഥാനത്തേക്ക് പരിഗണിക്കുമെന്ന തരത്തിൽ വാർത്തകൾ പ്രചരിച്ചിരുന്നു. എന്നാൽ, അപ്രതീക്ഷിതമായി വി വി രാജേഷിനെ മേയറാക്കാൻ പാർട്ടി തീരുമാനിച്ചതാണ് ശ്രീലേഖയെ ചൊടിപ്പിച്ചത്.

മേയർ പദവി പ്രതീക്ഷിച്ചിരുന്ന ശ്രീലേഖ അവസാന നിമിഷമുണ്ടായ രാഷ്ട്രീയ മാറ്റങ്ങളിലും പാർട്ടി തീരുമാനങ്ങളിലും നിരാശയിലാണ്. തന്റെ അതൃപ്തി അവർ പാർട്ടിയെ നേരിട്ട് അറിയിച്ചതായാണ് സൂചന. ഈ തദ്ദേശ തെരഞ്ഞെടുപ്പിൽ തിരുവനന്തപുരത്ത് ബിജെപിയുടെ പ്രധാന മുഖമായിരുന്നു ശ്രീലേഖ. അതിനാൽ, അവരുടെ അതൃപ്തി ജനങ്ങൾക്കിടയിൽ തെറ്റായ സന്ദേശം നൽകുമെന്ന വിലയിരുത്തലിലാണ് ബിജെപി കേന്ദ്ര നേതൃത്വം.

പ്രശ്നം പരിഹരിക്കാൻ കേന്ദ്ര നേതാക്കൾ അടിയന്തരമായി വിഷയത്തിൽ ഇടപെട്ടിട്ടുണ്ട്. മുതിർന്ന നേതാക്കൾ നേരിട്ട് ശ്രീലേഖയുമായി സംസാരിക്കുമെന്നാണ് വിവരം. ശ്രീലേഖയെ അനുനയിപ്പിക്കാനായി വമ്പൻ വാഗ്ദാനങ്ങളാണ് പാർട്ടി മുന്നോട്ട് വെക്കുന്നത്. വരാനിരിക്കുന്ന നിയമസഭാ തിരഞ്ഞെടുപ്പിൽ തിരുവനന്തപുരത്തെ സുരക്ഷിതമായ സീറ്റ് നൽകുന്ന കാര്യം പാർട്ടിയുടെ സജീവ പരിഗണനയിലുണ്ട്. കൂടാതെ, കേന്ദ്ര തലത്തിൽ മറ്റേതെങ്കിലും നിർണ്ണായകമായ ഉത്തരവാദിത്തങ്ങൾ നൽകി അവരെ പാർട്ടിയിൽ സജീവമായി നിലനിർത്താനും ആലോചനയുണ്ട്. വരും ദിവസങ്ങളിലെ ചർച്ചകൾക്ക് ശേഷമേ ഇക്കാര്യത്തിൽ അന്തിമ തീരുമാനമുണ്ടാകൂ.

അതേസമയം, തിരുവനന്തപുരം കോർപ്പറേഷൻ മേയർ തെരഞ്ഞെടുപ്പിൽ ബിജെപി കേവല ഭൂരിപക്ഷം ഉറപ്പിച്ചു. സ്വതന്ത്ര കൗൺസിലർ പാറ്റൂർ രാധാകൃഷ്ണൻ ബിജെപിക്ക് പിന്തുണ പ്രഖ്യാപിച്ചതോടെയാണിത്. നിലവിൽ നൂറംഗ കൗൺസിലിൽ അൻപത് കൗൺസിലർമാരുള്ള ബിജെപിക്ക് ഇതോടെ 51 പേരുടെ പിന്തുണയായി. വി വി രാജേഷാണ് ബിജെപിയുടെ മേയർ സ്ഥാനാർത്ഥി. ജി എസ് ആശാനാഥ് ഡെപ്യൂട്ടി മേയർ സ്ഥാനാർത്ഥിയായും മത്സരിക്കും.

മേയർ സ്ഥാനത്തേക്ക് എൽഡിഎഫും യുഡിഎഫും മത്സരിക്കുന്നുണ്ട്. ആർ പി ശിവജി ഇടതുമുന്നണിക്കായും കെ എസ് ശബരീനാഥൻ യുഡിഎഫിനായും മത്സരിക്കും. നിലവിൽ എൽഡിഎഫിന് ഇരുപത്തിയൊൻപതും യുഡിഎഫിന് പത്തൊൻപതും അംഗങ്ങളാണുള്ളത്.

ശ്രീലേഖയ്ക്ക് നിയമസഭാ സീറ്റ് വാഗ്ദാനം? തിരുവനന്തപുരത്തെ രാഷ്ട്രീയ നീക്കങ്ങളുടെ വാർത്ത ഷെയർ ചെയ്യൂ.

Article Summary: BJP offers assembly seat to pacify R Sreelekha after denying mayor post in Thiruvananthapuram.

#TrivandrumMayor #BJPKerala #RSreelekha #VVRajesh #KeralaPolitics #KVARTHA