‘പോലീസിൽ ആർ എസ് എസ്സിന്റെ പണി എടുക്കുന്നവർ പുറത്തുപോകും’: മുഖ്യമന്ത്രി പിണറായി വിജയൻ

തിരുവനന്തപുരം: (KVARTHA) സംസ്ഥാന പോലീസിൽ ആരെങ്കിലും ആർ എസ് എസ്സിന്റെ പണി എടുക്കാമെന്ന് മോഹിക്കുന്നുണ്ടെങ്കിൽ അവർക്ക് പിന്നെ ആ പണി സേനയ്ക്ക് പുറത്തുപോയി ചെയ്യേണ്ടിവരുമെന്ന് മുഖ്യമന്ത്രി പിണറായി വിജയൻ. കേരളത്തിലെ പോലീസ് സേനയിൽ ഒരു വർഗീയ ശക്തിയുടെയും സ്വാധീനമില്ലെന്നും അതിന് അനുവാദം നൽകില്ലെന്നും അദ്ദേഹം വ്യക്തമാക്കി. 'സമകാലിക മലയാളം' വാരികയുടെ ഓണപ്പതിപ്പിന് നൽകിയ അഭിമുഖത്തിലാണ് മുഖ്യമന്ത്രി ഇക്കാര്യങ്ങൾ പറഞ്ഞത്.

പോലീസിൽ വർഗീയ സംഘടനകളുടെ, പ്രത്യേകിച്ച് ആർ എസ് എസ്സിന്റെ സ്വാധീനമുണ്ടോ, അത് മറികടക്കാൻ എന്താണ് ചെയ്യുന്നതെന്ന ചോദ്യത്തിനാണ് മുഖ്യമന്ത്രിയുടെ മറുപടി. കേരളത്തിൽ വർഗീയ ധ്രുവീകരണ ശ്രമങ്ങൾ എപ്പോഴൊക്കെ നടന്നോ അപ്പോഴൊക്കെയും മതനിരപേക്ഷത ഉയർത്തിപ്പിടിച്ച് ഇടപെട്ടത് കേരളാ പോലീസാണ്. വർഗീയ കലാപങ്ങളില്ലാത്ത സംസ്ഥാനമാണ് കേരളമെന്നും മലയാളം വാരിക പത്രാധിപസമിതി അംഗം പി എസ് റംഷാദുമായുള്ള അഭിമുഖത്തിൽ പിണറായി വിജയൻ പറഞ്ഞു.

സംഘപരിവാറിനെതിരായ നിലപാട്

സംഘപരിവാറിനെതിരായ സി പി എം- എൽ ഡി എഫ് നിലപാട് വിട്ടുവീഴ്ചയില്ലാത്തതാണ്. ആർ എസ് എസ്സിനെതിരെ പറയാൻ തങ്ങൾക്കാർക്കും മുട്ടുവറയ്ക്കാറില്ലെന്നും, ഇക്കാര്യത്തിൽ കോൺഗ്രസ് പാർട്ടിയുടെ സർട്ടിഫിക്കറ്റ് ആവശ്യമില്ലെന്നും മുഖ്യമന്ത്രി പറഞ്ഞു. ഗുജറാത്ത് വംശഹത്യയ്ക്കിടെ സംഘപരിവാർ ചുട്ടുകൊന്ന മുൻ കോൺഗ്രസ് എം പി ഏഹ്സാൻ ജഫ്രിയുടെ ഓർമ്മ പുതുക്കാൻ പോലും അവർ ഇഷ്ടപ്പെടുന്നില്ല. ഈ വർഷമാണ് ഏഹ്സാൻ ജഫ്രിയുടെ ജീവിതപങ്കാളി സാകിയ ജഫ്രി നീതിക്കായുള്ള തന്റെ പോരാട്ടമവസാനിപ്പിച്ച് വിടവാങ്ങിയത്. സമൂഹമാധ്യമങ്ങളിൽ ഒരു അനുശോചനം നൽകാൻ പോലും കോൺഗ്രസ് നേതൃത്വം തയ്യാറായോ എന്നും പിണറായി വിജയൻ ചോദിച്ചു.

ജമാഅത്തെ ഇസ്‌ലാമിയും യുഡിഎഫും

ജമാഅത്തെ ഇസ്‌ലാമി ആർ എസ് എസ്സിനെ പോലെതന്നെ മതരാഷ്ട്ര രൂപീകരണത്തിനുവേണ്ടി നിലകൊള്ളുന്ന തീവ്ര മതരാഷ്ട്രവാദികളുടെ വർഗീയ പ്രസ്ഥാനമാണ്. പി എഫ് ഐ ആകട്ടെ, വിദേശ തീവ്രവാദ ബന്ധം പോലുമുള്ള സംഘടനയാണ്. ഇതര ഇസ്‌ലാമിക സമുദായ സംഘടനകളുമായി ചേർത്തുവെച്ച് ഇവയെ കാണാൻ കഴിയില്ല. ആർ എസ് എസ്, ജമാഅത്തെ ഇസ്‌ലാമി എന്നിവ പരസ്പരം ശക്തിപ്പെടുത്തി നീങ്ങുന്ന രണ്ട് വർഗീയ പ്രസ്ഥാനങ്ങളാണ്. ഹിന്ദ രാഷ്ട്രവാദം മുൻനിർത്തി ആർ എസ് എസ്, ഇസ്‌ലാം രാഷ്ട്രവാദം മുൻനിർത്തി ജമാഅത്തെ ഇസ്‌ലാമി എന്നിവ ശക്തിപ്പെടുന്നു. ഒന്നിന്റെ വളർച്ചയെ ചൂണ്ടിക്കാണിച്ച് മറ്റൊന്ന് വളരുന്നു. ആ ജമാഅത്തെ ഇസ്‌ലാമി യു ഡി എഫിന്റെ അജണ്ട തീരുമാനിക്കുന്ന നിലയാണ് ഇന്നുള്ളത്. അവർക്ക് പ്രതിപക്ഷ നേതാവ് 'ഗുഡ് സർട്ടിഫിക്കറ്റ്' നൽകിയിരിക്കുകയാണല്ലോ. ഇടതു നേതാക്കളെ മുസ്‌ലിം വിരുദ്ധരാക്കി ചിത്രീകരിക്കാനുള്ള ഒരു ശ്രമം ജമാഅത്തെ ഇസ്‌ലാമിയുടെ നേതൃത്വത്തിൽ നടക്കുന്നുണ്ടെന്നും മുഖ്യമന്ത്രി കൂട്ടിച്ചേർത്തു. ഇവിടെയും ഒറ്റക്കാര്യമാണ് പറയാനുള്ളത്, ഇക്കൂട്ടരുടെ സർട്ടിഫിക്കറ്റ് തങ്ങൾക്കാവശ്യമില്ലെന്നും പിണറായി വിജയൻ വിശദീകരിക്കുന്നു.

കേരളവിരുദ്ധ മുന്നണിയും വികസന പ്രവർത്തനങ്ങളും

സമഗ്രവും സർവ്വതല സ്പർശിയുമായ ജനപക്ഷ വികസന പ്രവർത്തനങ്ങളുമായാണ് എൽ ഡി എഫ് സർക്കാർ കേരളത്തിൽ മുന്നോട്ടുപോകുന്നതെന്നും മുഖ്യമന്ത്രി വ്യക്തമാക്കി. കേരളത്തിനെതിരെ സങ്കുചിത രാഷ്ട്രീയത്തിന്റെ പേരിൽ നിലപാടെടുക്കുകയാണ് പ്രതിപക്ഷവും ബി ജെ പിയും ഉൾപ്പെടെ ചെയ്യുന്നത്. ഒരു കേരളവിരുദ്ധ മുന്നണിക്ക് തന്നെയാണ് ഇക്കൂട്ടർ രൂപം കൊടുത്തിരിക്കുന്നത്. ആ മുന്നണിയെ നേരിട്ടാണ് എൽ ഡി എഫ് സർക്കാർ കഴിഞ്ഞ 9 വർഷവും മുന്നോട്ടുപോയത്. ഈ ഘട്ടങ്ങളിലെല്ലാംതന്നെ കേരളത്തിലെ ജനങ്ങൾ നൽകിയ പിന്തുണ അതിരില്ലാത്തതാണെന്നും മുഖ്യമന്ത്രി അഭിമുഖത്തിൽ പറഞ്ഞു.

പോലീസിലെ രാഷ്ട്രീയ സ്വാധീനം സംബന്ധിച്ച് മുഖ്യമന്ത്രിയുടെ നിലപാടിനെ നിങ്ങൾ എങ്ങനെ കാണുന്നു? നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: Kerala CM warns against communal elements in police force.

#PinarayiVijayan #KeralaPolice #Politics #CPM #KeralaPolitics #RSS