തിരുവനന്തപുരം: (KVARTHA) നിലമ്പൂരിൽ ആര്യാടൻ ഷൗക്കത്താണ് യുഡിഎഫ് സ്ഥാനാർഥിയെങ്കിൽ പിന്തുണ നൽകുന്നത് പ്രയാസമായിരിക്കുമെന്ന് പി വി അൻവർ. തൻ്റെ രാജി പ്രഖ്യാപിച്ച വാർത്താസമ്മേളനത്തിലാണ്  കോൺഗ്രസ് നേതാവ് ആര്യാടൻ ഷൗക്കത്തിനെതിരെ അദ്ദേഹം വിമർശനം ഉന്നയിച്ചത്. ആര്യാടൻ ഷൗക്കത്തിനെ ഒരു സിനിമാ-സാംസ്കാരിക പ്രവർത്തകനായി മാത്രമേ പരിചയമുള്ളൂവെന്നും കണ്ടിട്ട് നാളുകളായെന്നും അൻവർ പറഞ്ഞു. 

സാധാരണ വിവാഹ ചടങ്ങുകളിൽ പോലും ഷൗക്കത്തിനെ കാണാറില്ല. സുഹൃത്തുക്കളോട് ചോദിച്ചപ്പോൾ അയാൾ ഇപ്പോൾ കഥയെഴുതുകയാണ് എന്നാണ് പറഞ്ഞതെന്നും അൻവർ കൂട്ടിച്ചേർത്തു. 'കഥയെഴുതുന്ന ഒരാളെ അധികം പുറത്തുകാണില്ലല്ലോ' എന്ന അൻവറിൻ്റെ പ്രസ്താവനയും ശ്രദ്ധേയമായി. നേരത്തെ, പി വി അൻവറിൻ്റെ യുഡിഎഫ്. പ്രവേശനത്തെ ആര്യാടൻ ഷൗക്കത്ത് എതിർത്തിരുന്നു.

നിലമ്പൂർ ഉപതിരഞ്ഞെടുപ്പിൽ യുഡിഎഫിന് നിരുപാധിക പിന്തുണ പ്രഖ്യാപിച്ച അൻവർ, ഡിസിസി പ്രസിഡൻ്റ് വി എസ് ജോയിയെ സ്ഥാനാർത്ഥിയാക്കണമെന്ന ആവശ്യവും ഉന്നയിച്ചു. നിലമ്പൂരിലെ മലയോര ജനതയുടെ പ്രശ്നങ്ങളെക്കുറിച്ച് നല്ല ധാരണയുള്ള വ്യക്തിയാണ് വി എസ് ജോയി എന്നും അതുകൊണ്ട് അദ്ദേഹത്തെ സ്ഥാനാർത്ഥിയാക്കണമെന്നും അൻവർ കൂട്ടിച്ചേർത്തു.

#KeralaPolitics #UDF #AryadanShoukath #PVAnwar #CongressKerala #Nilambur