ന്യൂഡൽഹി: (KVARTHA) 'ഒരു രാജ്യം, ഒരു തിരഞ്ഞെടുപ്പ്' സംബന്ധിച്ച ഉന്നതതല സമിതിയുടെ റിപ്പോർട്ടിന്  കേന്ദ്രമന്ത്രിസഭയുടെ അംഗീകാരം. വരുന്ന ശീതകാല സമ്മേളനത്തിൽ സർക്കാർ ബില്‍ അവതരിപ്പിച്ചേക്കുമെന്നാണ് സൂചന. മുൻ രാഷ്ട്രപതി രാംനാഥ് കോവിന്ദിൻ്റെ നേതൃത്വത്തിലുള്ള സമിതി ലോക്‌സഭാ തിരഞ്ഞെടുപ്പ് പ്രഖ്യാപിക്കുന്നതിന് മുമ്പ് മാർച്ചിൽ ഈ റിപ്പോർട്ട് സമർപ്പിച്ചിരുന്നു. മന്ത്രിസഭയ്ക്ക് മുമ്പാകെ റിപ്പോർട്ട് അവതരിപ്പിക്കുക എന്നത് നിയമമന്ത്രാലയത്തിൻ്റെ 100 ദിവസത്തെ കർമ്മ പദ്ധതിയുടെ ഭാഗമായിരുന്നു .

'മന്ത്രിസഭ ഏകകണ്ഠമായാണ് നിർദേശം അംഗീകരിച്ചത്. കോവിന്ദ് കമ്മിറ്റിയുടെ ശുപാർശകൾ ഇന്ത്യയിലെ വിവിധ വേദികളിൽ ചർച്ച ചെയ്യും. ഒരേസമയം തിരഞ്ഞെടുപ്പ് നടത്തുന്നതിനെ വലിയൊരു വിഭാഗം പാർട്ടികൾ പിന്തുണച്ചു. അടുത്ത ഏതാനും മാസങ്ങൾക്കുള്ളിൽ സമവായമുണ്ടാക്കാൻ ഞങ്ങൾ ശ്രമിക്കും', കേന്ദ്രമന്ത്രി അശ്വിനി വൈഷ്ണവ് പറഞ്ഞു. രണ്ട് ഘട്ടങ്ങളിലായി ഒരേ സമയം തിരഞ്ഞെടുപ്പ് നടത്തുമെന്നും അദ്ദേഹം വ്യക്തമാക്കി.

ലോക്‌സഭാ-നിയമസഭാ തിരഞ്ഞെടുപ്പുകൾ ഒരേസമയം 

ആദ്യപടിയായി ലോക്‌സഭയിലേക്കും സംസ്ഥാന നിയമസഭകളിലേക്കും ഒരേസമയം തിരഞ്ഞെടുപ്പ് നടത്താൻ ഉന്നതതല സമിതി ശുപാർശ ചെയ്തു. 100 ദിവസത്തിനകം തദ്ദേശസ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പ് നടത്തുമെന്നാണ് സൂചന. ശിപാർശകൾ നടപ്പാക്കുന്നത് പരിഗണിക്കുന്നതിനായി ഒരു 'ഇംപ്ലിമെൻ്റേഷൻ ഗ്രൂപ്പ്' രൂപീകരിക്കാനും സമിതി നിർദ്ദേശിച്ചിട്ടുണ്ട്. ഒരേസമയം തിരഞ്ഞെടുപ്പ് നടത്തുന്നത് വിഭവങ്ങൾ ലാഭിക്കുമെന്നാണ് സമിതിയുടെ വിലയിരുത്തൽ. 

സംസ്ഥാന തിരഞ്ഞെടുപ്പ് അധികാരികളുമായി കൂടിയാലോചിച്ച് തിരഞ്ഞെടുപ്പ് കമ്മീഷൻ ഏകീകൃത  വോട്ടർ ലിസ്റ്റും വോട്ടർ ഐഡി കാർഡും തയ്യാറാക്കാനും കമ്മിറ്റി ശുപാർശ ചെയ്തിട്ടുണ്ട്. നിലവിൽ ലോക്‌സഭാ, നിയമസഭാ തിരഞ്ഞെടുപ്പുകൾ മാത്രമാണ് തിരഞ്ഞെടുപ്പ് കമ്മീഷൻ നോക്കുന്നത്. മുനിസിപ്പാലിറ്റികളിലേക്കും പഞ്ചായത്തുകളിലേക്കും തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പ് നടത്തുന്നത് സംസ്ഥാന തിരഞ്ഞെടുപ്പ് കമ്മീഷനുകളാണ്. 

18 ഭരണഘടനാ ഭേദഗതികൾ സമിതി ശുപാർശ ചെയ്തിട്ടുണ്ടെന്നും അവയിൽ മിക്കതും സംസ്ഥാന നിയമസഭകളുടെ പിന്തുണ ആവശ്യമില്ലെന്നും റിപ്പോർട്ടുണ്ട്. എന്നിരുന്നാലും, ഇതിന് ചില ഭരണഘടനാ ഭേദഗതി ബില്ലുകൾ ആവശ്യമായി വരും, അത് പാർലമെൻ്റ് പാസാക്കേണ്ടതുണ്ട്. 18,626 പേജുള്ള റിപ്പോര്‍ട്ടാണ് കേന്ദ്ര മന്ത്രിസഭയ്ക്ക് മുമ്പാകെ സമര്‍പ്പിച്ചിരിക്കുന്നത്.

#OneNationOneElection #IndiaElections #ElectoralReforms #SimultaneousElections #IndianPolitics