തിരുവനന്തപുരം: (KVARTHA) ബിജെപി സംസ്ഥാന അധ്യക്ഷ സ്ഥാനത്തേക്ക് മുൻ കേന്ദ്രമന്ത്രി രാജീവ് ചന്ദ്രശേഖറിനെ തിരഞ്ഞെടുത്തതോടെ കേരളത്തിലെ രാഷ്ട്രീയ അന്തരീക്ഷം വീണ്ടും ചൂടുപിടിക്കുകയാണ്. ലോക്സഭാ തിരഞ്ഞെടുപ്പിൽ ഉൾപ്പെടെയുള്ള മികച്ച പ്രകടനം പരിഗണിച്ച് കേന്ദ്ര നേതൃത്വം അദ്ദേഹത്തിൻ്റെ പേര് നിർദ്ദേശിച്ചതിന് പിന്നാലെ സൈബറിടങ്ങളിൽ രാജീവ് ചന്ദ്രശേഖറിനെ അനുകൂലിച്ചും പ്രതികൂലിച്ചുമുള്ള ചർച്ചകൾ സജീവമായി നടക്കുകയാണ്. ഈ ചർച്ചകൾക്കിടയിൽ 2023 ഒക്ടോബറിൽ രാജീവ് ചന്ദ്രശേഖറിനെക്കുറിച്ച് മുഖ്യമന്ത്രി പിണറായി വിജയൻ നടത്തിയ ചില പരാമർശങ്ങളും സൈബറിടങ്ങളിൽ  വീണ്ടും ശ്രദ്ധ നേടുകയാണ്.

2023 ഒക്ടോബറിൽ കളമശ്ശേരിയിലെ യഹോവ സാക്ഷികളുടെ പ്രാർത്ഥനാ യോഗത്തിൽ നടന്ന സ്ഫോടനവുമായി ബന്ധപ്പെട്ട് രാജീവ് ചന്ദ്രശേഖർ നടത്തിയ വിദ്വേഷ പരാമർശമാണ് മുഖ്യമന്ത്രിയുടെ കടുത്ത വിമർശനത്തിന് കാരണമായത്. 'ഹമാസിൻ്റെ ജിഹാദിനുള്ള പരസ്യാഹ്വാനം ക്രിസ്ത്യാനികൾക്കെതിരായ ആക്രമണത്തിനു കാരണമാകുമ്പോൾ ഡൽഹിയിലിരുന്ന് ഇസ്രായേലിനെതിരെ പ്രതിഷേധിക്കുകയാണ് മുഖ്യമന്ത്രി' എന്നായിരുന്നു രാജീവ് ചന്ദ്രശേഖറിൻ്റെ അന്നത്തെ പ്രസ്താവന. ഈ പ്രസ്താവനക്കെതിരെ അന്ന് മുഖ്യമന്ത്രി ശക്തമായി രംഗത്തെത്തിയിരുന്നു.

കളമശ്ശേരി സ്ഫോടനത്തെക്കുറിച്ച് രാജീവ് ചന്ദ്രശേഖർ നടത്തിയ പ്രസ്താവനയെ 'വിടുവായത്തം' എന്നാണ് മുഖ്യമന്ത്രി വിശേഷിപ്പിച്ചത്. രാജ്യത്തെ ഒരു മന്ത്രി ഇത്തരത്തിലുള്ള വിഷയങ്ങളിൽ പ്രതികരിക്കേണ്ട രീതി ഇതാണോയെന്ന് അദ്ദേഹം ചോദിച്ചു. രാജീവ് ചന്ദ്രശേഖറിനെ വെറും വിഷമെന്നല്ല, കൊടും വിഷം എന്ന് വിളിക്കേണ്ട വ്യക്തിയാണെന്നും മുഖ്യമന്ത്രി അന്ന് തുറന്നടിച്ചു. കേരളത്തിൻ്റെ മതനിരപേക്ഷതയും സൗഹാർദ്ദവും തകർക്കുവാനാണ് രാജീവ് ചന്ദ്രശേഖർ ശ്രമിക്കുന്നതെന്നും മുഖ്യമന്ത്രി ആരോപിച്ചു. രാജ്യത്തെ അന്വേഷണ ഏജൻസികളിൽ അദ്ദേഹത്തിന് വിശ്വാസമില്ലേ എന്നും, മികച്ച രീതിയിൽ അന്വേഷണം നടക്കുന്നുണ്ടെന്നും, കേന്ദ്ര ഏജൻസികൾ പോലും സഹായത്തിനുണ്ടെന്നും മുഖ്യമന്ത്രി ചൂണ്ടിക്കാട്ടി.

സംഭവം അറിഞ്ഞ ഉടൻ തന്നെ കേന്ദ്ര ആഭ്യന്തരമന്ത്രി തന്നെ വിളിച്ചിരുന്നുവെന്നും, വിഷയങ്ങൾ ധരിപ്പിക്കുകയും ആവശ്യമായ സഹായങ്ങൾ നൽകാമെന്ന് അറിയിക്കുകയും ചെയ്തുവെന്നും മുഖ്യമന്ത്രി പറഞ്ഞു. ഇതൊന്നും മനസിലാക്കാതെ ഒരു പ്രത്യേക വിഭാഗത്തെ താറടിക്കാനുള്ള ലക്ഷ്യമായിരുന്നു രാജീവ് ചന്ദ്രശേഖറിൻ്റെ പ്രസ്താവനയ്ക്ക് പിന്നിലെന്നും, അദ്ദേഹത്തിൻ്റെ പ്രസ്താവനയെ ചില കൂട്ടാളികൾ ഏറ്റുപിടിച്ചെന്നും മുഖ്യമന്ത്രി വിമർശിച്ചു. കേരളത്തിൻ്റെ തനിമ നശിപ്പിക്കാൻ ഇത്തരം പ്രസ്താവനകൾക്ക് കഴിയില്ലെന്നും, അന്ന് അദ്ദേഹത്തെ വിഷം എന്ന് മാത്രമാണ് വിശേഷിപ്പിച്ചതെന്നും, എന്നാൽ ഇപ്പോൾ അതിലപ്പുറം കൊടുംവിഷമാണ് എന്ന് പറയേണ്ടിവരുമെന്നും മുഖ്യമന്ത്രി കൂട്ടിച്ചേർത്തു.

ഫലസ്തീനോടൊപ്പമാണ് കേരളം എപ്പോഴും നിലകൊണ്ടിട്ടുള്ളതെന്നും മുഖ്യമന്ത്രി ഓർമ്മിപ്പിച്ചു. എന്നാൽ രാജീവ് ചന്ദ്രശേഖറിൻ്റെ സർക്കാർ ഫലസ്തീൻ അനുകൂല പ്രകടനങ്ങൾ തടയുവാനാണ് ശ്രമിക്കുന്നതെന്നും അദ്ദേഹം കുറ്റപ്പെടുത്തി.  2023 ഒക്ടോബർ 29നാണ് കളമശ്ശേരിയിലെ സംറ കൺവെൻഷൻ സെന്ററിൽ യഹോവ സാക്ഷികളുടെ പ്രാർത്ഥനാ സ്ഥലത്ത് സ്ഫോടനമുണ്ടായത്. സംഭവത്തിൽ 12 വയസ്സുള്ള പെൺകുട്ടിയടക്കം എട്ടുപേർക്ക് ജീവൻ നഷ്ടപ്പെട്ടു. എറണാകുളം സ്വദേശി ഡൊമിനിക് മാർട്ടിനാണ് കേസിൽ പിടിയിലായ ഏക പ്രതി. 

വിദ്വേഷ പ്രചാരണം നടത്തിയെന്ന പരാതിയിൽ രാജീവ് ചന്ദ്രശേഖറിനെതിരെ വിവിധയിടങ്ങളിൽ അന്ന് കേസുകളും രജിസ്റ്റർ ചെയ്തിരുന്നു. ബിജെപി സംസ്ഥാന അധ്യക്ഷനായി രാജീവ് ചന്ദ്രശേഖറെ നിയമിച്ചുകൊണ്ടുള്ള ഔദ്യോഗിക പ്രഖ്യാപനം തിങ്കളാഴ്ച ഉണ്ടാകും. ഇതിനിടയിൽ തന്നെ അദ്ദേഹത്തെക്കുറിച്ചുള്ള പഴയ വിവാദ പരാമർശങ്ങൾ സൈബർ ലോകത്ത് വീണ്ടും ചർച്ചാവിഷയമായിരിക്കുകയാണ്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Chief Minister Pinarayi Vijayan's sharp criticism of Rajeev Chandrasekhar resurfaces online as BJP appoints him as state president, igniting fresh political debate.

#RajeevChandrasekhar #PinarayiVijayan #KeralaPolitics #BJP #Controversy #CyberDebate