നിലമ്പൂർ: ആര് വാഴും, ആര് വീഴും? മുന്നണികളുടെ നെഞ്ചിടിപ്പ് കൂടുന്നു; അൻവറിസം വോട്ടാകുമോ?

(KVARTHA) നിലമ്പൂരിൽ 74.35 ശതമാനം പോളിംഗ് രേഖപ്പെടുത്തിയതോടെ വിജയപ്രതീക്ഷയിൽ എൽഡിഎഫും യുഡിഎഫും സ്വതന്ത്ര സ്ഥാനാർത്ഥി പി. വി അൻവറും. 2021-ലെ 76.60 ശതമാനം പോളിംഗിനെ മറികടക്കാൻ ഇത്തവണ കഴിഞ്ഞില്ലെങ്കിലും, നിലമ്പൂർ ഇത്തവണ പിടിച്ചെടുക്കാമെന്ന ആത്മവിശ്വാസത്തിലാണ് യുഡിഎഫ് ക്യാമ്പ്. എന്നാൽ, പി. വി അൻവർ പിടിക്കുന്ന വോട്ടുകൾ തങ്ങളെ എങ്ങനെ ബാധിക്കുമെന്ന ആശങ്കയും യുഡിഎഫ് നേതാക്കൾക്കുണ്ട്.

കോൺഗ്രസിനും മുസ്ലീം ലീഗിനും ശക്തമായ സ്വാധീനമുള്ള നിലമ്പൂരിൽ, സ്വന്തം വോട്ടുകൾ ചോരാതെ മികച്ച പ്രവർത്തനം കാഴ്ചവെക്കാൻ കഴിഞ്ഞുവെന്നതാണ് യുഡിഎഫിന്റെ ആത്മവിശ്വാസം. നേരിയ ഭൂരിപക്ഷമെങ്കിലും നേടി വിജയിക്കാമെന്നാണ് സിപിഎമ്മിന്റെ കണക്കുകൂട്ടൽ. 

യുഡിഎഫ് ശക്തികേന്ദ്രങ്ങളിൽ പോളിംഗ് വലിയ തോതിൽ വർധിക്കാത്തത് എം. സ്വരാജിന് അനുകൂലമാകുമെന്നും അവർ വിലയിരുത്തുന്നു. മണ്ഡലത്തിൽ തനിക്കുള്ള പിന്തുണ തെളിയിക്കാമെന്ന ആത്മവിശ്വാസത്തിലാണ് പി. വി അൻവർ. എന്നാൽ, താൻ വിജയിക്കുമെന്ന അൻവറിന്റെ പ്രസ്താവനകളെ ആരും ഗൗരവമായി എടുത്തിട്ടില്ല എന്നതാണ് യാഥാർത്ഥ്യം.

യുഡിഎഫ് സ്ഥാനാർത്ഥി ആര്യാടൻ ഷൗക്കത്ത് പറയുന്നത്, യുഡിഎഫ് ശക്തികേന്ദ്രങ്ങളിൽ മികച്ച പോളിംഗ് ഉണ്ടായെന്നാണ്. പോളിംഗ് ശതമാനവും പ്രതീക്ഷയും തമ്മിൽ തനിക്ക് ബന്ധമില്ലെന്നാണ് എം. സ്വരാജിന്റെ പ്രതികരണം. നല്ല പോളിംഗ് ഉണ്ടാകുമ്പോളാണ് സമീപകാലത്തെല്ലാം ഇടതുമുന്നണി വിജയിച്ചിട്ടുള്ളതെന്നും അദ്ദേഹം കൂട്ടിച്ചേർത്തു. ഭൂരിപക്ഷം പ്രവചിക്കുന്നത് തന്റെ ശൈലിയല്ലെന്നും സ്വരാജ് മാധ്യമങ്ങളോട് വ്യക്തമാക്കി.

75,000 വോട്ടുകൾ ഒറ്റയ്ക്ക് നേടുമെന്നാണ് പി. വി അൻവറിന്റെ അവകാശവാദം. എൽഡിഎഫ് വോട്ടുകൾ തനിക്ക് ഗണ്യമായി ലഭിച്ചുവെന്ന അൻവറിന്റെ വാദം സത്യമാണോ എന്നറിയാൻ ഇനിയും മൂന്ന് ദിവസങ്ങൾ കൂടി കാത്തിരിക്കണം.

നിലമ്പൂരിലെ തിരഞ്ഞെടുപ്പ് ഫലം നിങ്ങളുടെ അഭിപ്രായത്തിൽ ആർക്ക് അനുകൂലമാകും? കമന്റ് ചെയ്യുക.

Article Summary: Nilambur election: LDF, UDF, and independent PV Anvar await results.

#NilamburElection, #KeralaPolitics, #ElectionResults, #LDF, #UDF, #PVAnvar