ചെന്നൈ: (KVARTHA) തമിഴ്‌നാട് മുഖ്യമന്ത്രി എം കെ സ്റ്റാലിൻ തന്റെ സ്ഥാനം രാജിവെച്ചു. നിയമസഭാ തിരഞ്ഞെടുപ്പിൽ ഡിഎംകെ സഖ്യത്തിനുണ്ടായ കനത്ത തിരിച്ചടിയെത്തുടർന്നാണ് നടപടി. രാജിക്കത്ത് ഗവർണർക്ക് സമർപ്പിച്ചു.

ഭരണത്തിലിരിക്കെ ജനങ്ങൾക്കായി നിരവധി വികസന പദ്ധതികൾ ആവിഷ്കരിക്കാൻ കഴിഞ്ഞുവെന്ന് സ്റ്റാലിൻ പ്രതികരിച്ചു. പ്രതിപക്ഷത്തിരുന്നും ജനങ്ങളുടെ അവകാശങ്ങൾക്കായി സന്ധിയില്ലാതെ പോരാടുമെന്നും വോട്ട് നൽകിയവർക്ക് നന്ദി അറിയിക്കുന്നതായും അദ്ദേഹം എക്സിലൂടെ വ്യക്തമാക്കി.

കോട്ടയിൽ അടിപതറി സ്റ്റാലിൻ

തിരഞ്ഞെടുപ്പിൽ ഡിഎംകെ മുന്നണിക്ക് ആകെ 74 സീറ്റുകൾ മാത്രമാണ് നേടാനായത്. മുഖ്യമന്ത്രി എം കെ സ്റ്റാലിൻ മത്സരിച്ച കൊളത്തൂർ മണ്ഡലത്തിൽ അദ്ദേഹം പരാജയപ്പെട്ടത് രാഷ്ട്രീയ കേരളത്തെയും തമിഴ്നാടിനെയും ഒരുപോലെ ഞെട്ടിച്ചു.

ടിവികെ സ്ഥാനാർത്ഥി വി എസ് ബാബുവിനോടാണ് സ്റ്റാലിൻ പരാജയപ്പെട്ടത്. സ്വന്തം മണ്ഡലത്തിലെ ഈ തിരിച്ചടി സ്റ്റാലിൻ്റെ നേതൃത്വത്തിന് കനത്ത പ്രഹരമായി മാറി.

വിജയുടെ ടിവികെ സർക്കാർ രൂപീകരണത്തിലേക്ക്

അതേസമയം, തമിഴ്‌നാട്ടിൽ പുതിയ സർക്കാർ രൂപീകരിക്കുന്നതിനുള്ള ചർച്ചകൾ നടൻ വിജയ് നേതൃത്വം നൽകുന്ന തമിഴക വെട്രി കഴകം (ടിവികെ) സജീവമാക്കി. ചെന്നൈ പനയൂരിലെ ടിവികെ ആസ്ഥാനത്ത് വിജയുടെ നേതൃത്വത്തിൽ നിയുക്ത എംഎൽഎമാരുടെ യോഗം ചേർന്നു.

കേവലഭൂരിപക്ഷമായ 118 എന്ന സംഖ്യയിലേക്ക് എത്താൻ വിജയിയുടെ പാർട്ടിക്ക് ഇനിയും കടമ്പകൾ ബാക്കിയുണ്ട്. ഡിഎംകെ സഖ്യത്തിലുള്ള കോൺഗ്രസ്, ഇടതുപക്ഷ പാർട്ടികൾ, വിടുതലൈ സിരുത്തൈകൾ കക്ഷി (വിസികെ), മുസ്‍ലിം ലീഗ് എന്നിവരെയും എഐഎഡിഎംകെ സഖ്യത്തിലെ പാട്ടാളി മക്കൾ കക്ഷി (പിഎംകെ) എന്നിവരെയും ഒപ്പം കൂട്ടാനാണ് വിജയുടെ ശ്രമം.

நடந்து முடிந்த தமிழ்நாடு சட்டமன்றப் பொதுத் தேர்தலில் திராவிட முன்னேற்றக் கழகத்தின் தலைமையிலான மதச்சார்பற்ற முற்போக்குக் கூட்டணிக் கட்சியின் வேட்பாளர்களுக்கு வாக்களித்த தமிழ்நாட்டு மக்கள் அனைவருக்கும் எனது மனமார்ந்த நன்றியை உண்மை உணர்வுடன் தெரிவித்துக் கொள்கிறேன்.

உங்கள்…

— M.K.Stalin - தமிழ்நாட்டை தலைகுனிய விடமாட்டேன் (@mkstalin) May 5, 2026

മുന്നണി മാറ്റം ലക്ഷ്യമിട്ട് ചർച്ചകൾ

അഞ്ച് സീറ്റുകളിൽ വിജയിച്ച കോൺഗ്രസ് നേതൃത്വവുമായി വിജയ് ചർച്ചകൾ നടത്തിയെന്നാണ് സൂചന. പുതിയ രാഷ്ട്രീയ സാഹചര്യം പരിഗണിച്ച് ടിവികെയ്ക്ക് പിന്തുണ നൽകുന്ന കാര്യത്തിൽ തീരുമാനമെടുക്കുമെന്ന് എഐസിസി ജനറൽ സെക്രട്ടറി കെ സി വേണുഗോപാൽ വ്യക്തമാക്കി.

അണ്ണാ ഡിഎംകെ വിട്ട് ടിവികെയിൽ ചേർന്ന കെ എ സെങ്കോട്ടയ്യൻ്റെ നേതൃത്വത്തിൽ എഡിഎംകെയിൽ നിന്ന് കൂടുതൽ എംഎൽഎമാരെ അടർത്തിയെടുക്കാനുള്ള നീക്കങ്ങളും നടക്കുന്നുണ്ട്. പിന്തുണ നൽകുന്നവർക്ക് മന്ത്രിസ്ഥാനം ഉൾപ്പെടെയുള്ള വാഗ്ദാനങ്ങളാണ് ടിവികെ നൽകുന്നത്.

ഗവർണറോട് സമയം തേടി

സർക്കാർ രൂപീകരണത്തിന് മുന്നോടിയായി മുന്നണി ചർച്ചകൾ പൂർത്തിയാക്കാൻ രണ്ട് ആഴ്ചത്തെ സാവകാശം നൽകണമെന്ന് ആവശ്യപ്പെട്ട് ടിവികെ ജനറൽ സെക്രട്ടറി എൻ ആനന്ദ് ഗവർണർക്ക് കത്ത് നൽകി. തമിഴ്നാട്ടിൽ ഒരു കൂട്ടുമന്ത്രിസഭ വരണമെന്നാണ് ജനങ്ങൾ ആഗ്രഹിക്കുന്നതെന്ന് വിസികെ അധ്യക്ഷൻ തിരുമാവലവൻ പറഞ്ഞു. ഇത് വിജയിയുടെ പാർട്ടിക്ക് പിന്തുണ നൽകാനുള്ള തീരുമാനത്തിൻ്റെ സൂചനയായാണ് രാഷ്ട്രീയ കേന്ദ്രങ്ങൾ വിലയിരുത്തുന്നത്.

കൂടുതൽ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. തമിഴ്നാട്ടിലെ ഈ രാഷ്ട്രീയ മാറ്റങ്ങളെക്കുറിച്ചും വിജയ് മുഖ്യമന്ത്രിയാകുന്നതിനെക്കുറിച്ചുമുള്ള നിങ്ങളുടെ അഭിപ്രായങ്ങൾ ഫേസ്ബുക്ക് പേജില്‍ വാര്‍ത്തയുടെ താഴെ കമന്റായി രേഖപ്പെടുത്തുക.

Article Summary: MK Stalin resigns as TN CM; Actor Vijay's TVK initiates coalition talks for government formation.

#TamilNaduElectionResults #MKStalinResigns #VijayTVK #TamilPolitics #KolathurDefeat #ThalapathyVijay #DMK #CongressSupport